Popular Bible Verses from Romanos 10

Share

Haskakẽ hawara hawẽ bakekiri hawẽ hãtxa yuishunika Deusũ nuku kenemashuni haratubũra txibãkĩ shabakabi dateama yuikĩ: “Jesus Cristo ẽ Shanẽ Ibuki”, iwanã, haska Jesus mawa Deusũ ana bestẽwani ikũ kayabi waibu hawenabu watã niti akama Deusũ habu matu mekekubaĩshanikiki, hiwekuĩmakinã.

Hanushũ Jesus txibãkĩ matũ huĩti merã ikũwãkĩ xinaĩ Deusũ matu ma pepawaya dateama haska shabakabi tashnimakĩ yuikĩ: “Txanima kayabi Jesus Cristõ ẽ txakabu buaniwẽ taea ẽ Shanẽ Ibuki”, ikaibu Deusũ matu hawenabu wakĩ niti akama habe matu hiwemariashanikiki.

Haskakiri Deusũ hãtxa yusĩmisbũ Jesus Cristokiri kakape yusĩkubainaibu besti hãtxa pepa hawẽrua nĩka pewatã yurabũ Cristo txibãkĩ ikũwãtirubuki, hatũ hãtxawenã.

Haska inũ, Deusũ hãtxa yuishunika Isaísĩ kenekĩ: “Tsuabũra Messiasĩ hãtxa ikũwãkĩ txibaĩbu ẽ hatu hawa dake wama ishanaii”, aniwẽ taeshũ judeubu inũ judeubumarã, tsuabũra Messias ikũwaĩ nukũ txakabu hatũ nuku buashũkĩ betsa tibiwẽ nuku ashuĩsmaki. Habias Shanẽ Ibu Deusũ hatũ dasibi meke keyua inãnanã txakaisma kẽwãkĩ mã ea akubainaibu hawa yauxiama matu duawakĩ inãkubaĩmiski. Ha inũ, Deusũ hãtxa yuishunika Joelĩ haskakiriri yuikĩ: “Haratubũra hawẽ mekenika ikũwãkĩ ea akĩ: ‘Yavé Deusuũ, ẽ txakabu buatã mina ea wawe, mekekinã’ ”, ikaibu Deusũ danãma hatu mekekubaĩshanikiki.

Ha inũ, Deusũ hãtxa yusĩnãbu habu anu Deusũ hatu yunuama kakape Cristokiri hatu yusĩtirubumaki. Haskakẽ Deus yuishũkĩ hawẽ hãtxa yuishunikatũ haskakiri kenekĩ: “Deusũ kakape yusĩmisbu hikixĩshũ Deusũ kakape hatu yusĩaĩ nĩkai ha huxiãwẽ taea benimai xinã txãkãshãkanikiki”, iniki.

Haskakẽkaĩ hau Deusũ hatu mekekubainũ habũ Cristo ikũwãriabumanã, haskatã Cristo ea atirubumaki. Ha inũ, tsuabũra Cristokiri yusĩabu hawa nĩkariabumã hawẽ kakape ikũwãtirubumariki. Ha inũ, hatu yusĩriabumanushũ Cristokiri hawa tapĩtirubumariki.

Haska inũ, hawẽ yunuti inũ hawẽ nemati hãtxa besti txibãkĩ Deus benimawapaibiabu nuku dasibibũ nũ atirumakẽ ha yusĩni Cristoki hikia hatũ shabakabi betsa wakĩ nukũ txakabu buai mawakĩ ha yununi ana hawẽ hiwetima wakĩ Cristo besti nũ ha ikũwaĩbu hau Deusũ nuku pepawashanũ Deus benimawai Cristo nuku ishuniki, Deusũ hãtxa Moisés hatu yusĩni txibaĩ ibubis pepai ana nũ haskayamashanũbunã.