Popular Bible Verses from Gálatas 5

Share

Hamẽ betsarã, heshe pepa banabu pepa hukũmis keskai tsuabura Deusũ Yushĩ Pepatũ mekeshũ amakĩ hatu pe hiwemabainairã, eska shabakabi hatu anua tashnimiski, abunamei hawenabuwẽ nuirã, benimakĩ Deus kẽwaĩnã, unãnuma hiwea tsuki sinatamarã, hĩ hĩ ikama hawara teneirã, hatu txikixwabu kũyã akamarã, hatu duawairã, yauxiama hawara pepa hatu inãkubainirã, hawara yubakashũ kaneama akirã, babutã hãtxaisma inũ shetxakaismarã, hamebi hawẽ yura pe mekemisrã. Mã haskakũkainaiwẽ taeshũ Moisés yusĩawẽ tsuã matu hawa nematirubumaki.

Eska ẽ matu yusĩmis ana matu yuinũ nĩkakãwẽ. Hawara Deusũ Yushĩ Pepatũ matu yusĩa nĩkatã haskai besti pepai hiwekubaĩkãwẽ. Hamẽ haska xinã txakakĩ matũ yurã haska abuai matu amanũ, iwanã, yunuaiwẽ matũmebi txakabukĩ xinãyamakubaĩkãwẽ.

Haska inũ, natiã Deusũ Yushĩ Pepatũ nuku hiwemaiwẽ taeshũ hawara ha bestitũ nuku yunukĩ amai nĩkatã hiwekubainãkãwẽ.

Hakia Jesus Cristo cruzki mastabu mawani keska wakĩ nũ Jesus ikũwaĩbu nukũ txakabu itxawatã Jesusbe cruzki nuku mastashunibu keskaki, ana txakabu nũ meyamanunã.

Haska inũ, heshe txakabu banabu txakabu hukũmis keskai tsuabura txakabũ hatu mekea habũ akĩ shabakabi txakabuwakubainaibu hatu uĩtirubuki, hatũ kemu txakabuwẽ aĩbuaibube inũ hunibube txutanamekinã, atimapa betsa betsapa beya wakinã. Haska inũ, yushĩ txakabu kẽwãkĩ hawẽ kuxipawẽ daunãnãkinã, yurabu hãtxaibu hatu nemakinã, kũyã ikirã, hawenabuwẽ nuiamarã, hawara betsa hayawẽ taeshũ hatu binũkatsis ikĩ danãkinã, yura betsabuki hawaira sinatakinã, hatuki ha ikĩ hatu sa akĩ keyukinã, ibubis hawara pepa bikĩ xinã betsa betsapa wai hiweabuki. Haska inũ, hawara tsuara betsa haya binũ, iwanã, hawẽ kemuirã, beyuskĩ nushuti paepa aki paeinã, pikehaira bestinũ ika yushĩ betsa kẽwaĩ nawakĩ hamapai txakabu betsa betsapa wamisbu hanu Jesus huaitiã ha yura haskabu habe buama ishãkanikiki. Haskakẽ bebũkiri bari betsatiã ẽ matu yusĩkĩ yuima: “Hamapai txakabu betsa betsapa akaibu dũkekubaĩkãwẽ”, iwanã, habiaskari ẽ ana matu yunuaii.

Ẽ betsabu inũ ẽ puibuũ, mã judeubũ beyauma hawama mã hiwekubainũbũ Deusũ matu katuniki. Haskai hiwekĩ matũ yura meke txakabuwama nukunabube duanamei hatube nui merabenamekubaĩkãwẽ.

Hakia hawara txakabu mã abuai Deusũ Yushĩ Pepatũ danãmiski. Haska inũ, hawara hawẽ Yushĩ Pepatũ abuai txakabũri danãriamiski. Ha dabe binunãnaĩbũ maturi pepapaikĩ haratura mã heneama mã kanemiski, ibubisrã.

Ha inũ, Deusũ hawẽ nemati inũ hawẽ yunuti Moisés nuku yusĩmakĩ itxawani matu yuinũ nĩkairakãwẽ: “Mimebi mĩ nuimis keskawẽ huni betsa nuitapai hawaumawẽ nuikĩ hatu merabewakubaĩkãwẽ”, iwanã, Deusũ Moisés kenema nukũ shenipabu nuku yusĩshuniki.

Haskakẽ nukuburã, ibubis keãma betsa binũkatsis ikama hawara yura betsã bimiswẽ kemuama inũ hawẽ nuiama hiwekubainãkãwẽ.

Haska inũ, Moisés nemati inũ hawẽ yunuti nũ ana txibãyamanũbũ Cristõ nuku kaĩmaniki, Moisés yusĩa txibaĩ nũ ana hatũ escravo iyamanunã. Matu haska nemanikẽ Jesus besti txibaĩ ana xinã betsa wama judeubũ yusĩa danaĩ ana hatũ dayaru escravo iyamakubaĩkãwẽ.