Popular Bible Verses from 2 Pedro 2

Share

Noé inũ Ló Deusũ pashawanishũ tsuabura hawenabu ikatsis ikĩ hatũ hiwea Deus inãmisburã, hawẽ taeshũ hawara bika tibi hatu memabiaibũ nukũ Shanẽ Ibũ unãkĩ hatu txakabu binumariakubaĩtiruki. Hamẽ habu txakabumisburã, hanu bari hawẽ heneaitiã hatu unãti watã hatu kupishanai unãriaikiki.

Ha dukũ Jesus Cristo txibãti unãma ikaiburã, mawaira txakabuma ikeãkanaii. Hakia Deusũ hãtxa meribi hatu yusĩabu unãtã ana txibãkatsi ikama danãkĩ henei txakabui pikukubaĩmisbuki. Ha panananãmisbu haskakiri hatu yuini txanima habiaskakanikiki. Uĩrakãwẽ. “Kamã hanãtã txĩtũkirã ana hawẽri pimisbuki. Ha inũ, ina yawa pupushaira datxukĩ shũpĩwãbiabu ana txĩtũkaĩ pupuski irumai ana hawẽ meweki pukumiski.” Haska ẽ matu yuiai keskakanikiki, txakabui ana pikuirã.

Habu txakabũ hatu tsumawawẽ taea ha hunibũ hawa hatu nematirubumaki, ha ikũwãkĩ taewaibũ akaiburã. Nuku tibirã, hatũ nuku mekearã nũ hawẽ tsumawẽ taea ha parananãmisbũ tsumarã, txakabu bestiki, tsuã danãkĩ henetirumarã.

Ha dukũ Nukũ Shanẽ Ibu mekenã Jesus Cristo unãtã hatũ txakabu putakĩ pewabiani habias txakabũ ana hatu atxishũ yabuarã, beshmas ibiani ana txakabui pikuhairamisbuki.

Israelbu ẽ shenipabu anu Deusũ hãtxa yuishunika matxupa naxui ika hayanibuki. Habiaskariai matu anuri yusĩnã matxupa matu naxui iria hayabuki. Habu hatũ hãtxa hawẽruabia hatũ xinã txakabuwẽ matu daũkĩ akawakanikiki, nukũ Shanẽ Ibũ ma nuku meketi pewabianikẽ hawẽ kuxipa danaĩ parananaĩburã. Haska matu yusĩkĩ husiaibu Deusũ hawaira hatu kupishanikiki.