Popular Bible Verses from Jesoiya 60

Share

“Shtay uf un shein, fa dei helling is kumma, un di hallichkeit fumm HAH is ivvah dich kumma.

Di heida zayla zu deim licht kumma, un kaynicha zu di helling es funn diah gayt.

Gukk moll, finshtahnis kumd ivvah di eaht, un deefi dunkelheit ivvah di leit, avvah da HAH kumd ivvah dich, un sei hallichkeit sheind uf dich.

Es vennichsht funn eich zayld en dausend vadda, un da glensht en mechtich folk. Ich binn da HAH; an di recht zeit doon ich awl dess kshvind.”

Di sunn soll nimmi dei licht sei im dawk, un di helling fumm moon soll nimmi uf dich sheina, fa da HAH zayld dei ayvich licht sei, un dei Gott zayld dei hallichkeit sei.

Dei sunn zayld nee nimmi unnah gay, un dei moon vatt nee nimmi glennah; da HAH zayld dei ayvich licht sei, un dei dawwa funn dreebsawl zayla enda.

No saynsht du dess un bisht oahrich froh, dei hatz zayld globba un's vatt fraylich; di keshtlicha sacha fumm say vadda zu diah gebrocht, un di heida iahra reichheit kumd zu diah.

Hayb dei awwa uf un gukk um dich rumm: Si fasamla sich un kumma awl zu diah; dei boova kumma funn veit ab, un dei mayt vadda in di eahm gedrawwa.

No zayla awl dei leit gerecht sei, un si zayla's land aykna fa'immah. Si sinn da blansa es ich geblanst habb, di eahvet funn mei hend, so es ich fagleaht va.

Unfashtand soll nimmi keaht sei in deim land, un aw nimmi funn fadauves un faveeshtes. Du zaylsht dei mavvahra ‘Saylichkeit’ haysa un dei doahra ‘Lohb’.

Dei doahra bleiva immah uf, si vadda nett zu gmacht dawk un nacht, so es di heida iahra reich sach zu diah gebrocht vatt, un iahra kaynicha kumma aynah noch em anra.

Feel kamayla zayla ivvah dei land kumma, yungi kamayla funn Midian un Epha. Di leit kumma aus Saba un bringa gold un insens, un zayla da HAH lohva.

Fremdi zayla dei mavvahra ufbauwa, un iahra kaynicha zayla dich deena. In meim zann habb ich dich kshlauwa, avvah in mei gnawt veis ich diah bamhatzichkeit.

Veil du falossa un kast voahsht, un nimmand deich dich ganga is, dann zayl ich dich ayvichlich fagleahra, un en frayt macha zu nohch-kummashaft noch nohch-kummashaft.

Du zaylsht di millich funn di heida sukla, un di brisht funn kaynicha. No zaylsht du vissa es ich, da HAH, dei Heiland binn, dei Frei-Shtellah, da Mechtich Gott fumm Jakob.