Popular Bible Verses from 5. Mosi 28

Share

Vann diah em HAH eiyah Gott folshtendich heichet, un acht gevvet fa awl sei gebodda halda es ich eich gevva habb heit, dann zayld da HAH eiyah Gott eich hohch ovvich awl di heida uf di eaht setza.

Awl dee sayya zayla uf eich kumma un mitt eich gay vann diah em HAH eiyah Gott heichet

Da HAH zayld eich da kobb macha un nett da shvans. Vann diah di gebodda fumm HAH eiyah Gott haldet es ich eich gebt heit, un goot acht gevvet fa si du, dann zaylet diah immah ovva druff sei un nett unna drunnah.

Da HAH zayld sei reich shtoah-haus, di himla, uf macha un zayld reyyah shikka an di recht zeit, un zayld di eahvet funn eiyah hend saykna. Diah zaylet sach layna zu feel heida avvah diah zaylet nix layna funn eena.

Da HAH macht eiyah feinda es sich ufshtella geyyich eich es si nunnah kakt vadda fannich eich. Si zayla ay vayk bei kumma geyyich eich, un sivva vayya funn eich vekk shpringa.

Da HAH shikt en sayya uf eich in eiyah sheiyahra un uf alles es diah doond mitt eiyah hend. Da HAH eiyah Gott saykend eich im land es eah eich gebt.

Ksaykend zayla diah sei am rei kumma un am naus gay.

Ksaykend zayla diah sei in di shtatt, un ksaykend draus im feld.

Ksaykend zayld di frucht funn eiyah leib sei, di frucht funn eiyah grund, di frucht funn eiyah diahra—di hamlen un shiblen funn eiyah fee.

Da HAH zayld's ausrichta es diah en heilich folk sind zu eem, so vi eah fashprocha hott zu eich. Dess is vann diah di gebodda fumm HAH eiyah Gott haldet un in sei vayya lawfet.

Ksaykend zayld eiyah koahb un eiyah dayk-drohk sei.

Da HAH zayld macha es diah oahrich goot ab sind im frucht funn eiyah muddahs-leib, im frucht funn eiyah fee un im frucht funn eiyah grund, im land es da HAH kshvoahra hott zu eiyah foah-feddah fa eich gevva.

No zayla awl di leit uf di eaht sayna es diah groofa sind beim nohma fumm HAH, un si zayla sich feicha veyyich eich.

Drayyet nett vekk funn ennichs funn di gebodda es ich eich gebb heit. Drayyet nett rechts adda lings fa anri gettah nohch gay un fa si deena.

Vann diah nett di shtimm fumm HAH eiyah Gott heichet, un acht gevvet fa awl sei gebodda un adninga halda es ich eich gebb heit, dann kumma awl dee flucha uf eich un nemma eich ivvah