Popular Bible Verses from Romans 2

Share

Bot unu, weh deh joj ada pipl, deh du di siem bad tingz, so dah wai unu deh joj dem fah? Unu tink seh unu gwain get-weh wid dat? Nuo sah! God gwain joj unu tu! Or, unu tink seh God kainis tu unu no miin notn ataal? Nuo man! God gat pieshens wid unu ahn ihn put'op wid unu fi wan lang taim, ongl bikaaz ihn deh trai fi get unu fi ton fahn unu sin dem!

So den, unu man weh mek unuself wan joj, unu no gat non ekskyuus ataal fi di bad tingz weh unu deh du. Ih no mata huu unu, bikaaz enytaim unu joj ada pipl —fi di siem bad tingz weh dehn deh du— unu deh joj unu uonself!

Unu si, God neva shuo fievaritizm nontaim. Ihn gwain joj evrybady di siem wie; ihn no gwain ponish evrybady difrent fahn di ada.

Jos bikaaz som pipl get fi hier weh di Laa seh, dat no mek dem rait wid God. Bot dem weh du weh di Laa seh, dah dem weh stan rait iina God sait.

Bikaaz God aalwiez gi evrybady weh dehn dizorv fi evryting weh dehn du, weda gud or bad.

Bot fi ada pipl weh jos deh liv fi demself ahn dehn no waahn obie di chruut —demde kain a pipl weh ongl waahn du weh rang— God gwain shuo dem how ihn uova beks wid dem, ahn ihn gwain ponish dem gud!

Bot unu haat haada an rak, ahn unu no waahn ton fahn unu sin dem! So den, unu deh mek tingz muo wosa fi unuself pahn Jojment Die, wen God gwain shuo ihn raat ahn joj aal di worl.