Popular Bible Verses from Pilipi 2

Share

Baku tao ngaa-ngaa dhu tenge dhoka paꞌoto ngiꞌu èu risi nèti dhèu leo. Aa baku pangee, na, èu risi nèti dhèu leo. Te pamone do pabhèni èu èèna, dènge boe kolo-kapua. Te ngaa èdhi hudꞌi pahaha iisi ku, sèna ka teꞌa, na, dhèu leo risi nèti èdhi. Aa baku dhoka uri mamuri miu mesa-mesa mi. Te ngaa èdhi hudꞌi ladhe kahèi, ngaa dhu dhèu leo parluu.

Te dꞌara èdhi hudꞌi sama ku sèmi dꞌara Yesus Kristus.

Masi ka Nèngu ca ropa dènge Ama Lamatua, aa Nèngu Kètu èdhi kahèi, èci èèna ka dènge Ama Lamatua, te ngaa Na tèke eele hak Na, aa pake boe dadedha dènge kapai Na. Hèia Na puru mai asa rai-haha ne, ca ropa dènge dhèu rai-haha. Na tèke eele hak Na aaꞌi-aaꞌi, sèna ka tao iisi Na jꞌajꞌi nuka sèmi ènu sa. Mesa boe jꞌajꞌi dhèu haha dꞌai seli di, te ngaa Na tao ngiꞌu Na jꞌajꞌi dhèu dhu laku-laku boe kahèi, sèna ka tao madhutu dadꞌèi Ama Lamatua. Masi ka ra pamadhe Ne ètu ajꞌu palolo-palèbha, Na sèmi nare kahèi, aa madhe, nuka sèmi dhèu bhelu.

Te Ama Lamatua mesa Na ka dhu sabꞌa ètu dꞌara miu. Nèngu ka dhu bhoke jꞌara, sèna ka miu neo nanene Ne. Aa Nèngu ka dhu hia koasa kahèi, ho miu dꞌèi sabꞌa pakarejꞌe dꞌara Na.

Lula Nèngu pahaha iisi sèmi èèna, nèti èèna ka Ama Lamatua dedꞌe Ne padedha-dedha. Aa pangèdꞌu Ne ngara dhu kapai aae. Te abhu boe ngara èci sa dhu kapai aae risi nèti Nèngu. Ama Lamatua dedꞌe padedha-dedha ngara Na èèna, sèna ka dhèu aaꞌi-aaꞌi pakabꞌua Ne. Nuka: dhèu ètu dedha-liru, dènge dhèu ètu rai-haha ne. Dhèu mamuri dènge dhèu madhe. Bèli-camèdꞌa dhèu aaꞌi-aaꞌi patitu kètu urutuu, ho pahaha iisi mi Nèngu. Aa bèli-camèdꞌa dhèu aaꞌi-aaꞌi peka na, “Yesus Kristus èèna, tareꞌa-reꞌa Lamatua!” Dènge sèmi èèna, rèngu koa-kio Ama Lamatua kahèi.

De ladhe sadꞌi miu tao ngaa èèna ka, na, baku kaꞌuu-kamuki, aa baku pasibha dꞌara lii. Tao sèmi èèna, sèna ka miu jꞌajꞌi dhèu dhu dꞌara mola-mèci, aa dhèu dhu dènge boe sasala. Miu mamuri ètu dꞌara talora aae dhèu bhelu dènge dhèu kapodꞌe-kabèli. Te ngaa baku madhutu si! Te mamuri miu hudꞌi mola-mèci ku, lula miu ana-ana Lamatua. Hèia mamuri miu hudꞌi heo ku, ho padꞌelo jꞌara hia rèngu, nuka sèmi hua-hètu dhu pasaraa ètu dꞌara maroga.

Aꞌari pasue aaꞌi-aaꞌi! Nanene paie-iie! Uru èèna, lodꞌo jaꞌa pea ètu kota Pilipi era, miu nanene lii padhai jaꞌa, ka miu madhutu jꞌara mola Ama Lamatua. Limuri ne, èdhi pahagꞌa, te ngaa jaꞌa manèngi ho miu titu èra ètu dꞌara mamuri mola. Sanèdꞌe, te ladhe miu nanene boe Nèngu, bèli-camèdꞌa pe mèdhi unu mi! Lula Nèngu ka dhu patalale miu nèti koasa sasala-sasigo mi. Hèia miu mamuri dhu mèci, te miu jꞌajꞌi le dhèu unu Na.