Popular Bible Verses from 2 Petrus 1

Share

Yesus dhu dènge koasa èci èèna ka dènge Ama Lamatua. Nèti èèna ka, Yesus papala èdhi aaꞌi-aaꞌi ti ngaa-ngaa dhu èdhi parluu, sèna ka mamuri mola madhutu dadꞌèi Lamatua. Nèngu tao sèmi èèna, lula èdhi tadhe mèu Ne. Aa Na paroa èdhi ho jꞌajꞌi dhèu unu Na, lula dꞌara hua iia dènge dadedha Na. Yesus hia le èdhi jꞌara aaꞌi-aaꞌi dhu hua iia. Te uru èèna, Na padhadha tèke le ho neo hia jꞌara seꞌe. Lii padhadha Na, aaꞌi-aaꞌi beꞌa titu kèna. Yesus hia aaꞌi mèu-mèu seꞌe mi èdhi, sèna ka dꞌara èdhi bisa sama sèmi dꞌara Lamatua. Aa èdhi bisa lehe tare jꞌara-jꞌara karehe dhu dhèu ètu rai-haha ne dꞌèi adꞌu-ue, lula rèngu mamuri dꞌèi dhoka tao madhutu dadꞌèi unu ra, aa dhu taha rare boe dꞌara ra.

Nèti èèna ka, jaꞌa manèngi sèna ka miu paꞌèra tao jꞌara dhu beꞌa. Mema miu parcaya le Yesus, te ngaa èèna dhae dꞌai mèka. Sabꞌa taruu jꞌara dhu beꞌa. Tadhe Lamatua dènge beꞌa risi hari. Te ngaa mage dꞌai dhoka sange èèna di. Patema mamuri ho taha mere dꞌara. Te ngaa sèra dhae dꞌai mèka kahèi. Lodꞌo-lodꞌo miu abhu sasusa, na, miu hudꞌi paꞌèra dꞌara ho baku hari kabodho. Te ngaa tao parisi hari nèti èèna. Tao aaꞌi mèu-mèu madhutu dadꞌèi Lamatua. Te ngaa mage dhoka dꞌai sange èèna di. Padꞌelo sasue mi aꞌari èdhi dhèu parcaya sèra. Te ngaa èèna dhae dꞌai mèka kahèi. Te miu hudꞌi mamuri pasue taruu.

Ladhe mamuri miu sèmi sèra ka, aa jꞌara dhu beꞌa asa tabha taruu, na, sèra sa hia miu asa tadhe mèu Kètu èdhi, Yesus Kristus. Te jꞌara dhu beꞌa ele boe iia dꞌara, aa core eele boe lodꞌo kahèi. Te jꞌara beꞌa seꞌe ka dhu tao dꞌara miu ho meꞌa mèu Nèngu.

Aꞌari pasue aaꞌi-aaꞌi! Miu limuri ne hudꞌi bori dhari asa paꞌèra. Lamatua hagꞌe nare le miu jꞌajꞌi dhèu unu Na, ka miu lami asa madha Na. De miu hudꞌi padꞌelo ku, na, miu jꞌajꞌi le ana-èpu Na. Ladhe jꞌara dhu jaꞌa peka se tabha taruu ètu mamuri miu, na, miu manahu boe.