Popular Bible Verses from 1 Tesalonika 5

Share

Pakarejꞌe dꞌara taruu. Sabajꞌa mèu-mèda. Sadꞌi paraga dènge ngaa èèna ka, jꞌajꞌèra, do karejꞌe-karae, manèngi makasi mi Lamatua. Te Ama Lamatua dꞌèi dhèu aaꞌi-aaꞌi dhu madhutu Yesus Kristus tao sèmi èèna.

Jaꞌa sabajꞌa manèngi Ama Lamatua ho pamèu dꞌara dènge mamuri miu aaꞌi-aaꞌi mi. Nèngu èèna ka dhu uri ho èdhi bisa mamuri dame èci dènge èci. Dènge jꞌara sèmi èèna, ladhe dꞌai lodꞌo mamai hari Lamatua èdhi, Yesus Kristus, miu bisa titu ètu katanga madha Na dènge ngiꞌu aae miu, dꞌara miu, dènge samanga miu dhu dènge boe sasala ngaa-ngaa. Jꞌara na sèmi èèna ka! Te Lamatua Yesus dhu paroa miu jꞌajꞌi dhèu unu Na, dhu monya boe. Ngaa dhu Na peka, Na tao madhutu sama sèmi èèna ka. De èèna na, Na lere nèti miu dènge mola-mèci asa katanga madha Ama Lamatua.

Sanèdꞌe, bhabhelu baku bꞌala dènge bhabhelu. Te ngaa tenge jꞌara sèna ka tao beꞌa dènge dhèu aaꞌi-aaꞌi ra. Baku tao beꞌa dhoka dènge dhèu èdhi di, te ngaa dènge dhèu leo kara kahèi.

Nèti èèna ka, pake lii-lii jaꞌa seꞌe, sèna ka hia karejꞌe dènge paꞌèra èci dènge èci, sèmi dhu miu tao le karèi nèti uru èèna ka.

Aꞌari aaꞌi-aaꞌi! Abhu pèri-pèri jꞌara era dhu jiꞌi neo pasanèdꞌe miu: dhèu dhu bai-eedꞌa sèra, peka si sèna ka ra sabꞌa dènge dꞌara majꞌèni. Dhu dꞌara roe, paꞌèra si. Dhu haha, sarimu mere si. Taha dꞌara aa lii mako mi dhèu aaꞌi-aaꞌi ra.

Ama Lamatua hagꞌe boe èdhi ho Na huku ti. Te ngaa Na hagꞌe èdhi sèna ka abhu mamuri, sadꞌi èdhi lèka Kètu èdhi, Yesus Kristus.

Aꞌari aaꞌi-aaꞌi! Mage dhoka mamai Na nuka sèmi dhèu manaꞌu dhu mai re talora mèda, lèke dènge miu dhu bhèjꞌi luu. Mage lèke miu sèmi èèna kahèi! Èdhi mamuri heka ètu dꞌara maroga, sèmi dhèu leo dhu bhèjꞌi luu era. De èdhi dhu lèka le Lamatua Yesus, mamuri le ètu dꞌara saraa, ti paꞌèra soru mamai Ne, aa jꞌaga paie mamuri èdhi. Jꞌara seꞌe aaꞌi-aaꞌi miu meꞌa le!