Popular Bible Verses from Rebaleisan - end blo ebriting 12

Share

Bat ebridem amenpamle bin bite em bikoz prom da blad blo da Smolsip, ane bikoz prom dempla ebritaim pris dem wod blo God. Ane ebriwan dempla i no bin prait ip ol go ded. Dempla i bin redi po ded po em.

Den ai bin lisen prapa laud bois prom eben i spik diskain: ‘Lo distaim ya nau, i soem God i seibe yumpla, ane em i gad ebridem paua ane i da taim po em po ruloba ebriwan, i bin kam nau, ane da Promiswan blo em i kare da lo blo em antap. Da wan uda ebritaim tok gense ebridem amenpamle blo yumpla prant lo God, ol i bin sakwei em godaun po ert. Em da seimwan uda ebritaim tok nugudwei baut dem amenpamle prant wea God, nomata i deitaim o naittaim

Da nugud dragan, ane ol einzel blo em, ol bin sakwei ausaid prom eben godaun po ert. Da nugud dragan, da sneik prom longtaim, uda yumpla kole em debol o Satana, em da wan uda trike ebri pipol blo dis ert po meke ol nugudting.

So nau, eben ane ebribodi uda i stap wea eben mas bi nadakain glad. Bat yupla ebribodi uda stap lo ert ane lo solwata, yupla mas lugaut bikoz Satana i bin kamdaun po yupla. Em i nadakain wail bikoz em i sabe em gad sottaim lept.’

Nau i bin gad bigpait i bin stat lo eben. Maikol ane ebridem einzel blo em, ol bin pait gense dat dragan ane ebridem einzel blo em.

Nau da dragan em i bin prapa nadakain wail po dat oman, so em i go ane pait gense ol dem nada pikinini blo dat oman. Demwan dem seim pikinini ya uda bin lisen ane obei dem lo blo God ane uda spik dempla blo Zizas.

Nau ai bin luk wan big sain i bin kamaut lo skai. Em i wan oman wea da san i sain raun lo em wase em i were klos. Ane em bin pute demtu leg blo em antap lo mun, ane tuelb sta i stap raun lo ed blo em wase kraun. Dat oman em i bin pamle tu ane em i bin krai laudwan bikoz em i bin gad bigpein wase em klosap po bone beibi.

Dat oman i bin bone wan boibeibi, ane dis boibeibi i go ruloba ebri kantri lo dis wold, ane em go gad paua po rule dem kantri ya wase prapa bigbos. Stretwei wen da boibeibi i bin bon, wan einzel i bin grabe da beibi ane i bin teke em go antap po God wea em i sidaun lo tron. Dat oman i bin ranwei go lo dezet eria, wea God i bin meke wan ples wea dat eria redi po em. Lo dat ples nau ol i bin lugaut em gud po 1,260 dei.

Ane nada sain i bin kamaut lo skai. Em i bin wan big dragan ane bodi blo em i redkala. Ane em bin gad seben ed ane ten on. Lo dem seben ed i bin gad seben kraun. Nau em bin yuze teil blo em po pulemaut wan terd blo dem sta, ane meke dempla ebriwan poldaun prom skai kamdaun po ert. Ane em bin kam ane stanap prant lo dat oman ane dat oman i bin redi nau po bone dat beibi. Dat dragan i bin weit po da beibi po bon redi po em go kaikai em.

Bat ol i bin gibe dat oman tu wing blo big igol solong em i go plai po ples blo em de lo dezet eria. Ane ol i go lugaut em de po 1,260 dei. Ane ol i nogo lete da dragan po kese em. Da dragan i bin trai po draune dat oman lo big pladwata wea i bin kamaut prom maut blo em. Bat da graun nau i bin elpe da oman. Wan big oll i bin open melen lo da graun, ane ol dem pladwata wea i bin kamaut lo maut blo da dragan, i bin ran go poldaun insaid lo dat oll.