Popular Bible Verses from Leta po Sos blo Pilipi 2

Share

Yupla mas no wande ebriting po yuplaselp. No meke yuplaselp mospesil den ol nada pipol. Yupla mas ambol yuplaselp ane trite ol nada pipol wea wei dat dempla i mogud den yupla. Wa, yupla mas elp lugaut ol nada pipol ane no mata lugaut yuplaselp.

Wa, da tingking ane da wei blo yupla po meke ol samting i mas seimkain wiskain Kraist i meke ol samting.

Nomata Zizas i bin God, em no bin meke emselp seimkain wase God wail em bin ya wea yumpla. Bat Zizas bin mina meke emselp kam smol. Em bin pute bigpaua blo em ane glori wansaid ane bin teke wei blo ambol sebant. Em bin kam wase pipol, bon seimkain wase beibi, gro kam man. Em bin meke emselp ambol ane em bin meke emselp wase yumpla. Em bin mata lisen ane mekem wanem God i bin wandem raitap go antil dat taim wen em bin ded wea da kros wase man uda bin broke dem lo.

God em i wok insaid laip blo yupla ane gibe yupla da piling po prapa lisen em ane da strong po meke wok blo em wea i meke God api.

Bikoz Zizas bin lisen ane mekem wanem God i spik, God bin teke em go antap po eben ane meke em nadakain spesil. God bin gibe em spesil neim, ane dat neim i moantap wea ebri nada neim. Ane lo dat neim blo Zizas, ebri pipol i go baudaun de antap lo eben, ane ya daun wea ert ane andanit lo ert. Ebri maut blo ebri pipol i go spik Zizas Kraist i BosLod ane ol go mata gibe ona po God uda i da PapaGod.

Ebridem samting wea yupla mekem, yupla no smolsmoltok ane graul gense wananada, solong nobodi i kan bleime yupla. Yupla mas stap klin, nogad nating rong. Stap tugeda wase pipol blo God midel wea ol pipol blo dis wold uda i nadakain nugud wea laip blo dempla, wea dempla ebritaim meke sin. Wa, laip blo yupla mas sain midel wea dem pipol wase lait i sain wea dak.

Ol mai labing amenpamle, yupla i bin ebritaim lisen ane mekem wanem ai bin spik yupla po mekem wen ai bin de wea yupla. Ane nau ai no de, yupla mas kipgo meke mo samting blo God wanem ai bin spik yupla po mekem. Ane mata ebritaim prapa rispekt God ane yupla mas prapa prait prom em tu.