Popular Bible Verses from Leta po Ibrupipol 1

Share

Da Boi i sain prom dat seim sainilait, da truglori blo God, ane ebriting baut da Boi i seimkain wase God. Dem prapa nadakain strongwod blo em meke da wold ran stret. Dem strongwod blo em i kipe ebriting tugeda. Apta wen em bin ded po meke yumpla pri prom sin, em bin go antap eben ane em sidaun lo da raitansaid blo da prapa nadakain big God blo eben.

God i bin spik prapa longtaim de pas, tru dem spesilmesizman, plentitaim lo diprenwei po ol ate blo yumpla. Nau lo dem lasdei, God i tok po yumpla tru Boi blo em. Ane em i bin promis ebriting po Boi blo em. Em i bos blo ebriting. Ane tru Boi blo em, God i bin meke da wold ane ebriting wea i stap insaid.

Bat dem einzel i mata ol sebant blo God. Dempla i ol spirit wea God i sanem po lugaut dem pipol uda God i go seibem.

Ane God i kip spik: ‘BosLod, de prapa longtaim pas, yu bin meke da ert. Wea oun an blo yu, yu bin meke da skai ane ebriting de. Demting i go pinis, bat BosLod, yu nogo pinis. Yu go mata stap poeba. Demting i go kam wase oul klos wea i brok ane sakwei.