Popular Bible Verses from Aisaiya 60

Share

Wal YAWEI bin tok, “Gidap ol yumob pipul langa Jerusalem! Jandap en larram det lait blanga yumob shain. Dumaji det lait brom YAWEI det trubala God im shain brabliwei langa yumob.

Ola king en ola pipul brom detlot najalot kantri garra luk det lait, en olabat garra kaman langa yumob.”

Ola pipul langa najalot kantri langa dijan wel oldei jidan langa dakbala, bat det brabli braitwan lait en pawa blanga mi na YAWEI garra oldei shain langa yumob.

Eni lilwan femili garra jidan brabli bigwan femili en klen en traib. Wen det rait taim garra kaman bambai, ai garra meigim dijan hepin kwikbala.” Lagijat na YAWEI bin tok.

“Det san en mun kaan jidan enimo blanga gibit yu lait. Mi na YAWEI garra jidan det lait blanga yu, en main lait garra shain mowa braitwan langa det mun en san. Main brabli shainiwan lait garra shain langa yu.

Det soribala taim blanga yu garra binij, en mi na YAWEI garra jidan det olagijawan lait blanga yu.

Wen yumob garra luk dijan hepin, blanga yumob feis garra shain nomo lilbit. Yumob garra hatjamp en yumob garra jidan brabli gudbinjiwei. En najalot pipul garra bringimap ola gudbala ting brom detlot kantri najasaid langa det solwoda.

Wal YAWEI bin kipgon tok, “Wal yumob opinim det dubala ai blanga yumob. Yumob luk olaran. Bigismob pipul kaminap. Ol yumob san kaminap brom longweiwan kantri, en sambala pipul garrimap yumob doda jis laik lilwan biginini.

Blanga yu pipul olabat garra dumbat ola raitwan ting, en olabat garra abum olabat ronwan kantri olagijawan. Olabat jis laik detlot tri aibin plentim en meigim olabat blanga shoum main strongbala pawa langa najalot pipul.

En langa det taim yu kaan irrimbat enibodi faitfaitbat enimo. En nogudbala trabul kaan spredat langa yu kantri igin. Ai garra oldei maindimbat en lukaftumbat yu. Mi na jis laik det bigwan wol. Yu garra oldei preisimbat mi, dumaji aibin seibum yu.

Yu garra abum detlot geit jidan opinwan deitaim en naitaim wulijim detlot boswan langa najalot kantri garra bringimap ola pipul garram ol detlot gudbala ting blanga olabat langa yu.

“En bigismob pipul garra kaman garram olabat kemulmob brom det dubala kantri gulum Midiya en Ifa en dei garra bringimap ola gudwan enijing. En najalot pipul brom Shiba garra kaman garram ola gol en gudsmelwan medisin blanga preisimbat mi.

Wal YAWEI bin kipgon tok, “Jerusalem, detlot pipul brom najalot kantri garra bildimbek detlot wol blanga yu, en ola boswan garra wek blanga yu. Aibin wail langa yu en aibin panishim yu, bat ai garra shoum yu ai laigim yu detmatj, en ai garra kain langa yu.

“Basdam ola pipul bin fogedabat yu, en heidimbat yu. Bat ai garra meigim yu brabli bigwan en purdiwan, en ai garra meigim yu jidan brabli gudbinji olagija.

Yu garra abum ola gudwan ebrijing brom ola king brom najalot kantri, en yu garra sabi mi na det brabli strongbalawan God blanga ola Isreil pipul hubin seibum yu en larramgo yu fri.