Popular Bible Verses from Fes Karinthiyans 3

Share

Maitbi yumob nomo sabi. Ol yumob Kristjan pipul, yumob na det serramoni pleis blanga God, en det Holi Spirit im jidanbat langa yumob.

Wal ai dalim yumob. Ebribodi garra jinggabat weya im bildimap det haus, dumaji God bin meigim Jisas Krais na det bodampat blanga det haus blanga im, en nobodi kaan meigim najawan bodampat blanga bildimap haus.

Yu si? Det sambodi hu dalimbat det gudnyus, im nomo enijing. En det sambodi hu kaman biyain en titjimbat det gudnyus, im nomo enijing du. Oni God na im haibala, dumaji im na meigim det gudnyus wek langa yumob laif.

Yumob sabi na? Minbala Apalas wek mijamet blanga God jis laik dubala fama weya dubala wek mijamet, en yumob na jis laik det gadin blanga God weya minbala oldei wek. En yumob jis laiga haus blanga God du.

En ebribodi garra jinggabat hau im bildimap det haus ontop langa det bodampat, dumaji ebribodi wek garra kamat langa det dei weya Jisas Krais garra kambek, en God garra luk det wek weya ebribodi bin dum, en im garra testimbat ebribodi wek garram faiya, en det wek blanga detlot pipul hubin bildimap det haus garram gol en silba en purdiwan ston kaan barnap. Bat det wek blanga detlot pipul hubin bildimap det haus garram olkain wud en gras garra barnap.

En det dubala hu dalimbat en titjimbat det gudnyus, wal dubala seim, en God garra peiyim dubala blanga det wek weya dubala dumbat.

Yumob sabi na? Yumob nomo wandi jinggabat nogudbalawei en bulurrum yumob ronwei. Pipul oldei jinggabat olkainwei blanga dijan wel, en dei reken miselp dei sabi ebrijing. Bat detkain ting weya dei oldei jinggabat nomo enijing langa God. Yu si? If enibodi wandi sabi det wei blanga God, en if im reken miselp klebabala langa det wei blanga dijan wel, wal im garra libum det klebabalawei en jidan jis laik im nomo sabi enijing en lisin langa God. Wi sabi tharran, dumaji langa oltestaman im tok, “God garra blokim detlot pipul hu reken dei sabi ebrijing, en im garra blokim olabat garram olabat ronwan klebabala plen.”