Popular Bible Verses from Roma 8

Share

Ke i'a alogo, Deo kapa ma'oai ekapa'i auga, papiau kapa'i alo'i ko'agai Isa anina keani, ke ifo kapa'ina fekekapa eoma kainai eifani'i au'i fau'iai felo mo femia eoma puo ekapa'i.

Gome lau alou ko'agai lapako'ania auga, kapa aga'omo ganinagai, i'a a'a Lopia Iesu Kristo faagagai Deo alo ko'agai i'a ani'a eani epakinai'a auga eegai agepapealai'a afaekaina. Iifa gome mae, o mauni, agelo o tiapolo, pau aague auga o muni agaagu auga, o isapu, o ufa gua o a'isa papagai, o Deo ega pagama kapa'i aga'omo ganinagai, Deo alo ko'agai i'a ani'a eani auga eegai agepapealai'a afaekaina.

Ke i'a alo'aisai apinapina koa i'opoga, Deo ega Spiritu isafa i'opoga mo ekapa i'a a'a apokeai epalagaini'a. Gome i'a ala famegamega oma auga alalogo kai, Deo ega Spiritu ifo maipinapinaga mo, nini'ani agaifa'opo'i afaekaina au'i nini'ani'iai i'a fau'aisai Deo emegamega penia.

Ega koa aisama, i'a ega'ina faagagai kapa'ina agaifania? Deo i'a afe'aisai eaulao koa aisama, kai aga'o i'a agekaisapui'a afaekaina.

Ega puo pau kaisau Iesu Kristo fou kemia au'i, Deo isa e'i laomai apala afa afaepeni'i.

Gome kaisau papiau aumauni laoga maina apala mino keafia muninai kepea au'i Deo maagai kemae. Kai kaisau Deo ega Spiritu alo'iai eague auga muninai kepea au'i, mauni keafia ke gagaoai keagu.

Ega'ina mo laa'i kai, Iesu Kristo alo ko'agai i'a ani'a eani auga faagagai, ega'ina kapa'i ma'oai agapalutini'i.

Lau ega laifa oma, gome lau e'u opola auga pau kapa'ina kiekie'i apa'aua au'i, muni Deo isapu akaiki'a ke eaea i'a agepakinai'a auga kapa akaiki'a ipauma puo, ega'ina kiekie'i fou agaoge opo'i afaekaina.

I'a Iesu Kristo apako'ania au'a ala aagu oma auga fouga, Deo ega iifa pukagai iina kepapua oma: “Lopia oi faumuai, lai auga sipi keaupugu'i au'i koa kepamiaimai. Ega koa aufa kina lai mae mauni epogai aagu.” Kai kaisau i'a Iesu Kristo alo ko'agai ani'a eani auga laoga maina eegai agepapealai'a? Kina apala'i ma? O alo kiekie kina'i ma? O afi apala kina'i ma? O magea kina'i ma? O aulalu alogaina tiapu ee'a laa'i auga ma? O mae mauni epogai falao famai auga ma? O a'ifai fekeaupugui'a auga ma? Ega'ina epo'iai kapa aga'o Iesu Kristo alo ko'agai i'a ani'a eani auga laoga maina eegai agepapealai'a afaekaina.

Ke Deo i'a gua'a alo eisa auga, Spiritu kapa'ina eopolaga auga elogo. Gome Deo ega Spiritu Deo ega papiau fau'iai, Deo kapa'ina anina eani auga kainai mo emegamega.

Gome kaisau Deo ega Spiritu epapea'i kapa'ina kekapa au'i, Deo gauga.

Gome kaisau papiau aumauni laoga maina apala agugai keague au'i, opo'i papiau aumauni laoga maina apala kapa'ina emaaga auga eegai keoge. Kai kaisau Deo ega Spiritu agugai keagu au'i, opo'i Deo ega Spiritu kapa'ina emaaga auga eegai keoge.

Ke Deo ifo Gauga aeafiapia kai, elogoaina i'a ma'oai fau'aisai emae koa aisama, i'a Isa Gauga fou amia au'a, ega gafegafe akaiki'agai kapa ma'oai isafa agepeni'a.

Ke Spiritu ega'ina ifo i'a a'a spirituai epaini'a, i'a Deo gauga auga ko'a ipauma eoma. Ke i'a Deo gauga koa aisama, Deo gauga kapa'ina akeafia eoma auga, i'a isafa agaafia. Ke Deo kapa'ina Iesu Kristo apuga eoma auga isafa Iesu fou kai'alao agaafia. Gome Iesu Kristo kapa'ina kiekie epa'aua auga koa i'opoga, i'a a'a agu alogai ega agakiekie oma koa aisama, Deo isa isapu ke eaea akaiki'a epeniia auga, i'a isafa isa fou agaafia.

Lau ega laifa oma, gome papiau aumauni laoga maina apala mino auga Deo fou ke'ou. Gome papiau aumauni laoga maina apala mino auga, Deo kapa'ina eifania auga kainai afaepea, ke agekapa isafa afaekaina.

Gome Deo ega pagama kapa'i ma'oai auga Deo Isa gauga au'i kina fuagai agepaapafoki'i auga alo'i ko'agai keague ke'ima.

Gome i'a alogo Deo ega pagama kapa'i ma'oai auga, laomai apala kainai ega omagai kekiekie alogaina kepinapina mo emai i'ina kina.