Popular Bible Verses from 1 Corinthians 5

Share

Ngay pam wanch wiy anangan waaꞌ-waaꞌang thananga keꞌ Christians.an waaꞌ-waaꞌwuntana, puth yaꞌa, thaniya way paththam iiy-iiyantan, maarich keeꞌ-keeꞌantan, yangk moꞌ-moꞌantan, yuk thaaꞌ-kuump-kuumpantan keꞌ god thanttam yimanangana, wik way kal-kalantan, ngak way mungkan iiy-iiyantan, aꞌ putha yuk way min wiyantam maꞌ-kuchathantan. Ngay pam wanch inangan waaꞌ-waaꞌang thanang. Niiy keꞌ iiy-iiyān thanttangana aꞌ keꞌ nyiinān thak thanttangana, aꞌ putha may thak keꞌ mungkān thanttangana, yaꞌa.

Yaa, niiy puth wayan wantāna, niiy yipam min anman iiy-iiyāna, puth niiy pam wanch Christ.antam, nil kan pachath niiyang niiy wayan iiy-iiyan. Nil puth kanam theetath nungamang uthamow way ngamparamakana, nil keꞌ minh lamb Piip God.antam. Than puth keenkanamana may piꞌan Passover.an mungk-mungkin aꞌ minh lamb mulathin, nil God.angan yipam chaapar minh lambantaman thathow, aꞌ nilan-a, kaaꞌ-piichanathow thanang ngul.

Than pam wanch wiy ananganiya than yippak keꞌaman thiichin nunang God.ana, an than maꞌ ngatharang yaꞌa, ngay keꞌ mep-meping thanang, yaꞌa. God.angan ep ngangk thath-thathan thanang, aꞌ nilaman ep ngul mepow thanang. Puth niiy weeꞌ-weeꞌanangan Christians.an iiy-iiyaniy-a, niiy thath-thathwun niiyantakamana. Than weeꞌ-weeꞌanangana nath way iiy-iiyantan-a, niiy wakān thananga. Than weeꞌ-weeꞌanangana nath way anman iiy-iiyiythanwey-a, niiy kenthān thanang, than niiyantang anman keꞌ-ngul iiy-iiyayn.