Popular Bible Verses from Filipos 2

Share

Subay ndaꞌi baalen niu meksekat di kesingit. Subay ndaꞌ dademai penggulaulaan niu meksekat di mauyaꞌan nu getaw mangyaꞌ. Iin sungkini mpia niu pegdelendemen, puun tu kekpebabaꞌ niu, pemilangen niuig duma niu mekesuun pa diniu. Ndiꞌ niu pa pagid tagikulen laak su kepia diniu, segaga tagikul niu su kepia di ngag duma niu.

Subay penunggilingan niu su ginaa ni Kristu Isus mukaꞌ sug delendemanen maꞌniniꞌ

Si Kristu, piai gasalen, gasal nug Megbebayaꞌ, ndaꞌen pemilangay gembagel pantageni kesamanen tu Megbebayaꞌ. Sinangkaliꞌ pa tanan, puun tug daniin delendeman, bilengen su ketaasen, puꞌ midawaten su gasal sesuguꞌen, puꞌ migigetaw maaꞌ da nug betad getaw. Palasen gupia, palas kilawan. Mikpebabaꞌ di ginaanen, mukaꞌ su pigbetaden, mikpetuud gupia ditu mauyaꞌan nu Gamaꞌen, pia deksuꞌanen ia, minatay ditu kurus.

Puꞌ su Megbebayaꞌi megabang diniu lelayun, begayan amu niin delendeman niu mukaꞌ gaga niu menggulaula amu mauyaꞌanen.

Kaas pitaas na nug Megbebayaꞌ, pilentu ditu gekbus langit, mukaꞌ bigay diniini gelal metaas pa dig launan gelal di gekleb langit buꞌ lupaꞌ. Iini bigay dun diniin, puꞌ adun saꞌ medengegi ngalan ni Kristu, megbasa gelaꞌ diniin kig launan bitang ditug langit mukaꞌ dinig dibabaw lumbang sampay ditug bayaꞌ. Tibaꞌan nilan dayun meglegintuud puꞌ si Isukristui Kaunutan, puꞌ adun megdedengeg gupia su Gamaꞌ ta Megbebayaꞌ.

Kaas adin sug baalen niu, baal niu di ndaꞌi sualan niu, mukaꞌ betang niu di pianan ginaa, adun ndiꞌ amu medangat, puꞌ nga tantu bataꞌ namu nu Megbebayaꞌ, di ndaꞌi melamug diniu melaat. Kiin, pia meksala amu megbenwa di nga getaw nemun, su nga medupang mukaꞌ mipenulay. Subay tuiag amu maaꞌ nu ngag bitun tuiag dig dalan nu medupang mukaꞌ mipenulay

Mendadi, yamu nga petailen ku, su saanan ku dia niu, mikpetuud amu gupia. Kaas, selian ku melayuꞌ na pelum diniu, pekpetuud amu gusay, adun mpengganget niu su keksalabuuk nu pikumpungan niu di kegbasa niu tu Megbebayaꞌ.