Popular Bible Verses from Galacia 5

Share

Iin sungkini pegbetaden nu getaw megbayaꞌ dun sug Balakat nu Megbebayaꞌ. Mekpetail di nga samatawen, leliagen lelayun, mekpeseksud di ngag duma, mektigel lelayun di kelegenayen mukaꞌ kepeleget dun, melilelaaten, mekesuun gupia, meseligan tantu, mesumayaꞌ, sampay metau megbenaꞌbenaꞌ di gayaken. Ki pegbetaden kia, ndaꞌ benduay nu Palinta.

Kaas, pektalentenay niu ini. Kig Balakat nu Megbebayaꞌ, pekpetuud amu diniin, buangen niu iin megbayaꞌ dig delendeman niu mukaꞌ di pegbetaden niu. Ndiꞌ niu dayun dunutani melaat gayak nu kekinilawan niu.

Naa, kagina bigayan ita nug Balakat nu Megbebayaꞌ ketubuꞌ ndaꞌi tamanen, subay pepegbayaꞌ ta dadema diniin su pegbetaden ta.

Mukaꞌ pa padun, su nga sakup ni Kristu Isus, pimalaw na nilan su kekinilawan nilan kampuꞌ nu ngag launan melaat gayak, maꞌniin linansang nilan sug daan lawas nilan ditu kurus.

Naa kig betad nu kekinilawan ta, gempantek gupia, ndiꞌ ba? Maꞌniinig betad nu nga getaw megbayaꞌ pa dinilan su gayak nu kinilawan, megdusa, menggulaula mekepiidpiid sampay menlelaug. Mektamuy dailan dema di ngag ledawan nu sagya diwata, mensaled ilan, meksininaay ilan, meksesualay ilan, mengimbegu ilan, meglipunget ilan sampay meglelebaway ilan. Meksesuayay ilan pa pagid, ndiꞌ ilan meksalabuuk, meksesigiay ilan, megbebulek ilan, meglekebibu ilan sampay ndaiꞌ taman nug dupangan nilan, mukaꞌ penggulaulaan nilanig lain gulaula maꞌniai kelaaten. Laak yamu, pegadan ku amu puliꞌ maaꞌ danug daansamaꞌ pigadu diniu, adin su menggulaula maꞌnia kia, ndiꞌ mekesakup tu Keglekaunutan nu Megbebayaꞌ.

Naa yamu pa pagid, Mingumpated, inggat namu tuꞌu nu Megbebayaꞌ, adun beluyen amu niin dig launan migbalud diniu. Kagina biluy namu, ndiꞌ niu mpia pesikaun su gayak niu mekegbayaꞌ di ginaa niu sampay di pegbetaden niu. Segaga, kagina dinawat na niu su kepetail nu Megbebayaꞌ, gempia namu mektinebangay puun tug linelaatay niu.

Puꞌ su mauyaꞌan nu kekinilawan tai memilas lelayun tu mauyaꞌan nug Balakat nu Megbebayaꞌ. Kig Balakat, kumuntra dadema lelayun di mauyaꞌan kinilawan. Kagina miglelekuntra ilan duaꞌ, ndiꞌ niu mpenggulaula su mauyaꞌan niu penggulaulaay.

Puꞌ ndiꞌ ba mitingeb su tibuuk Palinta di sektaang taluꞌ kini, “Petail mu dadema sug duma mu. Su kepetail mu diniin, pelepeng mu di kepetail mu dig lawas mu?” Mitingeb lai daan!

Kaas subay ndiꞌ ita mekpelabawlabaw, ndiꞌ dadema ita melisualen mukaꞌ ndiꞌ ita megegimbeguay.

Naa mendadi, biluy naita ni Kristu di kedunut ta tu Palinta, adun kanaꞌ naita gulipen nu Palinta. Kaas, pekpetubud amu gupia, ndiꞌ niu begay duuni mengulipen diniu puliꞌ tu kedunut tu Palinta.