Popular Bible Verses from Impezayag 14

Share

Ne zutun nezineg ku is egkag̵i ziyà te langit te, “Isurat nu heini: Utew mulà meupiya is egkengeulaula te menge etew he ebpatey ke menge tumutuu sikandan te Nengazen.” “Benar iyan,” egkag̵i is Wag̵as he Mulin-ulin. “Utew zan en egkengelipey su wazè en igkehag̵ù dan ne ebpekehimeley sikandan. Ne zutun edsuhulan sikandan tenged te menge meupiya he menge vaal zan.”

Ne tenged dutun, sikan is menge etew he neg̵aked te Megbevayà, sikan is ebpememineg te menge sug̵ù te Megbevayà wey edtuman te menge lalag ni Jesus, kinahanglan he med-antus sikandan.

Ne mibpekezag̵ing is egkag̵i te, “Tehuza niw is Megbevayà wey ventug̵a sikandin su neuma en is timpu te kedsusi zin te menge ulaula te tivuuk he menusiyà! Ezapa niw is Megbevayà he iyan nenlimbag te langit wey tanà wey zag̵at wey menge puunà te wahig!”

Ne midlepew is iketelu he velinsug̵uen he midsunud dutun te nehuna he zezuwa ne mibpekezag̵ing is egkag̵i te, “Is minsan hentei he etew he ed-ezapen din haazà is langgam wey ledawan duen te langgam, ne ebpemarka sikandin diyà te vuked din, ne emun kenà, ne ziyà te velad din, ne ibpeinum kandin is binu te pauk te Megbevayà, he ke và dà egkeg̵iya, silut kandin te Megbevayà, ne heini is mepait he vinu, midtag̵ey en te Megbevayà diyà te tasa he iyan sikan is meinit he pauk din. Ne haazà is menge etew, edresayen sikandan diyà te meregreg he esupri ziyà te Impirnu. Ne egkeahà haazà dutun te nati he kerehidu wey te menge velinsug̵uen te Megbevayà. Ne haazà is hapuy he idrasey kandan, ed-evel te wazà pidtemanan ne te maandew wey mezukilem kenà egkeengked is kedresaya kandan su ed-ezapen dan kes langgam wey kes ledawan duen te langgam ne ebpemarka sikandan te tuus duen te ngazan te langgam.”

Ne zutun neehè ku is buntud he Siyun ne zutun edhithitindeg sikan is nati he kerehidu ne zuma zin daan dutun is nenggatus wey kepatan wey heepat he libu he menge etew. Ne haazà is menge etew, insurat diyà te menge vuked dan is ngazan dutun te nati wey is ngazan daan te Amey zin he Megbevayà.

Ne zutun neehè ku en maan is selakew en maan he velinsug̵uen he edlayang he utew mibpeketikang diyà te udtuwan. Ibpesavut din dutun is Meupiya he Tudtulanen he kenà egkehanew te minsan keenu. Impesavut din haazà te tivuuk he menusiyà, diyà te menge etew te minsan hengkey he kineg̵iyan wey minsan hendei he g̵inhedian, wey tribu, wey kepuun.

Ne zuen daan ikezuwa he velinsug̵uen he nekesunud dutun te nehuna ne migkag̵i sikandin te, “Na, nezeetan en! Utew nezeeti is dekelà he inged he Bebilunya! Midlangut din te vinu zin is tivuuk he menusiyà, he ke và dà egkeg̵iya, impenurù din te tivuuk he menusiyà is ked-ezapa te menge ledawan!”