Popular Bible Verses from Pilipus 3

Share

Netuenan ku, menge suled, he wazè pa heini metuman dini te kedì, iyan, mid-awè ku ziyà te isip ku is nengehuna he nengetuman ku en, ne edhimuwen ku is taman te egkehimu ku wey ku mekuwa is langun he egkesuatan te Megbevayà he mekuwa ku keuzemà. Ebpenigudu e pa wey ku mekuwa is suhul te Megbevayà su iyan heini ketezengan ke maan is mid-umew kiw zin te ked-angken te untung he wazà pidtemanan pinaag̵i te kebpekidsevaha tew ki Jesu Kristu.

Iyan dà guntaan ibmeupiya te g̵ehinawa ku is kegketueni ku te menge ulaula ni Kristu wey is kebulusi kedì te g̵ehem he iyan sikan is gehem he ingkevanhew zin. Egkesuatan ku he mekeambit a zaan duen te kemeresayan he mid-antus din he iyan is ked-engkezi ku te kediey he egkesuatan iring te kandin he kebelevag̵a te untung din. Umba egkesuatan ku heini su wey mehimu he mevanhew a keuzemà.

Ne kenà dutun dà taman is mid-engkezan ku, kekenà, mid-eminan ku engkezi is minsan hengkey he zekelà dini te g̵ehinawa ku su wey ku mekuwa is utew pa lavew he mahal he iyan is kebpekidsevaha ku ki Jesu Kristu te Nengazen ku. Tenged kandin mid-engkezan ku is langun ne mid-isip ku heini he abper zà dini te kelibutan wey a mekepekidsevaha ki Kristu

Iyan, is langun he iring dutun he kunaan ku ke egkeserig̵an ku wey a melibri te silut, mid-engkezan ku en wey ku maangken si Kristu.