Popular Bible Verses from 1 Juan 3

Share

Menge mahal ku he anak, kinahanglan he kenà menge lalag dà is kebmahala ta te menge zuma ta, kekenà, kinahanglan he ibpeehè ta is kebmahala ta kandan pinaag̵i te menge ulaula ta.

Umba netuenan tew en he utew zekelà is kebmahala kenitew te Megbevayà diyà te g̵ehinawa zin su mibpehimatey si Jesu Kristu he elili kenitew. Ne sikitew zaan, kinahanglan he edtevangan tew is menge zuma tew he tumutuu minsan ke ibpatey ta haazà is kedtavang.

Utew kiw mahal ziyà te g̵ehinawa te Amey tew he Megbevayà su ahaa niw man migngezanan kiw zin en he menge anak din ne menge anak kiw zin en iyan. Is menge etew zini te kelibutan he kuntada te Megbevayà, kenè kiw zan egkekilala he menge anak kiw te Megbevayà su kenè dan daan egkekilala ke hentei sikandin.

Ke zuen etew he layun ed-ulaula te mezaat ne sakup sikandin ni Setanas su layun daan si Setanas ed-ulaula te mezaat puun pa te kedlimbag̵a te kelibutan. Umba midhendini te kelibutan is Anak te Megbevayà su wey zin ikeawà is gehem te menge ulaula ni Setanas.

Is minsan hentei he nehimu en he anak te Megbevayà, kenè en sikandin egkesuat he ed-ulaula te mezaat su midsempù en man te Megbevayà. Geina te iyan Amey zin is Megbevayà kenà egkehimu he layun sikandin ed-ulaula te mezaat.

Ke zuen minsan hentei kenitew he egkehimu he edtevangan din is duma zin he edlised, iyan, kenè din edtevangan, kenà egkehimu he mahal ziyà te g̵ehinawa zin is Megbevayà.

Is minsan hentei he edtuman te menge sug̵ù te Megbevayà, nekidsevaha sikandin te Megbevayà ne ziyà te kandin ed-ubpà is Megbevayà. Egketuenan ta he zini te kenita ed-ubpà is Megbevayà su mid-ulinan ki te Wag̵as he Mulin-ulin.

Ne ke zuen etew he kenà metazeng is menge ulaula zin, tuus heini he kenà sikandin anak te Megbevayà. Ne kenà daan anak te Megbevayà is minsan hentei he kenè din ebmahalen is duma zin. Pinaag̵i kayi egketuusan ta ke hentei is menge anak te Megbevayà wey ke hentei is menge sakup ni Setanas.

Kinahanglan he ebmahalen tew te kada sevaha is menge zuma tew. Iyan heini impenurù kenitew hein aney kiw meketuu.

Menge suled, kenè kew meinuinu emun ebpekigkuntada keniyu is menge etew zini te kelibutan he kuntada te Megbevayà.