Popular Bible Verses from 1 Juan 1

Share

Emun idtug-an ta ziyà te Megbevayà is menge salè ta, kenà egkehimu he kenè ki zin ebpeseyluwen su metazeng sikandin ne metinumanen te pesarig din. Edlumpiyuwan ki zin te langun he menge ulaula ta he kenà metazeng.

Emun merayag mulà is ibayè tew iring te merayag is Megbevayà, he ke và dà egkeg̵iya, emun mibpesakup kiw te Megbevayà, egkeupakat kiw ne layun kiw edlumpiyuwi te minsan hengkey he salè tew pinaag̵i te kebpelisi kenitew te lengesa ni Jesus he Anak te Megbevayà.

Emun egkag̵i ki he wazè ta salà, tarù is ebpetuuwan ta te g̵ehinawa ta ne kenè ki ves edtuman te tutuu he tuluuwen.

Ibpesavut ku keniyu is impesavut kenami te Anak te Megbevayà he is Megbevayà, iyan sikandin puunà te kerayag ne wazà minsan hengkey he merusirem diyà te kandin. Emun egkag̵i ki he nekid-upakat ki te Megbevayà, iyan, diyè ki pa te kerusireman, he ke và dà egkeg̵iya, mezaat pa is menge ulaula ta, teruen ki. Teruen ki pinaag̵i te menge lalag ta wey pinaag̵i te menge ulaula ta.

Iyan, ke egkag̵i ki he wazè ki mekesalà, henduen be te migkag̵i ki he teruen is Megbevayà ne wazè ki mebpezumazuma te lalag din.