Popular Bible Verses from KO NEHEMAIA 9

Share

Ka ko kinautolu mo ‘emau ngaahi kui na‘a nau mofuta, ‘o nau fakakekeva honau kia, ‘o ‘ikai te nau momo‘i muitala ki ho‘o ngaahi tu‘utu‘uni; pea na‘e ‘ikai te nau loto ke talangofua, pea na‘e ‘ikai te nau manatu ho‘o ngaahi me‘a fakaofo, ‘a ia kuo ke feia ‘i ho‘o feangai mo kinautolu; ka nau fakakekeva honau kia, pea ‘i he‘enau angatu‘u na‘a nau fokotu‘u ha kapiteni ke nau foki ki he‘enau nofo pōpula. Ka ko e ‘Otua mohu fakamolemole ‘a e ‘Afiona, ko e Angalelei mo ‘Alo‘ofa, Tuai-ki-he-houhau, pea Fonu-‘i-he-kelesi, pea na‘e ‘ikai te ke li‘aki kinautolu.

Ko koe ‘a Sihova, ‘io, ko koe toko taha; ko koe na‘a ke ngaohi ‘a e ngaahi langi, ‘io, ‘a Langi taupotu, mo honau ngaahi hōsitē, ‘a māmani mo e me‘a kotoa pē ‘oku ‘i ai, ‘a e ngaahi tahi mo ‘enau me‘a kotoa, pea ‘oku ke ‘ange mo‘ui kiate kinautolu kotoa; pea na‘a mo e hōsitē ‘o langi ‘oku nau hū ai pē ki he ‘Afiona.

ka na‘e pehē ho‘o mohu ‘alo‘ofa, ko ia na‘e ‘ikai te ke li‘aki kinautolu ‘i he Toafa; na‘e ‘ikai mahu‘i ‘a e Pou-‘ao mei he‘ene fotu ‘aho kiate kinautolu, pe ko e Pou-afi po‘uli, ke huluhulu ‘a e hala ‘oku nau ‘alu ai. Pea na‘a ke foaki ho Laumālie Lelei ke ako kinautolu, pea na‘e ‘ikai te ke mamae‘i ho‘o mana mei honau ngutu, pea na‘a ke ‘ange vai ma‘a ‘enau fie inua. ‘Io, ko e fāngofulu ta‘u na‘a ke tauhi kinautolu ‘i he Toafa; na‘e ‘ikai te nau masiva; na‘e ‘ikai luku honau kofu, pea, na‘e ‘ikai fepulopulasi honau va‘e.