Popular Bible Verses from 1 Kolin 1

Share

Ko꞉sega Gode eyo꞉ henfelo꞉ wenamilo꞉ asulo꞉lo꞉ di kalu a꞉no꞉ ko꞉lo꞉ sendeloma꞉kiyo꞉, henfelo꞉ kaluwa꞉ siwa꞉l amilo꞉ asulo꞉lo꞉ mo꞉di kalu a꞉lab a꞉no꞉ ko꞉lo꞉ da꞉fe alita꞉sen. Gode eyo꞉ henfelo꞉ wenamilo꞉ halaido꞉lo꞉ bo꞉fo꞉lowan kalu a꞉no꞉ sendeloma꞉kiyo꞉, halaido꞉lo꞉ma kalu a꞉no꞉ ko꞉lo꞉ da꞉fe alita꞉sen.

Kaluka꞉isale nolo꞉ Ya꞉su e i malana sowo꞉ a꞉la꞉bo꞉ da꞉dakiyo꞉, no꞉nolo꞉ to sa꞉lab a꞉la꞉asulab. Kaluka꞉isale i a꞉no꞉ de hena sulufa꞉ ha꞉nakigab. Ko꞉sega Godeya꞉lo꞉ asuwa꞉takilo꞉ gasilia꞉lab kaluka꞉isale niliyo꞉, Ya꞉su i malan amilo꞉ sowo꞉ a꞉no꞉ Godeya꞉ ene halaido꞉ a꞉ma꞉ go꞉.

Henfelo꞉ kaluwa꞉yo꞉ Godeya꞉ ene asulo꞉ a꞉no꞉ o꞉ngo꞉ma a꞉la꞉asula꞉sen. Ko꞉sega Godeya꞉ ene asulo꞉ a꞉ma꞉yo꞉ henfelo꞉ amilo꞉ asugdo꞉ di fa꞉la꞉dowab a꞉no꞉ tininila꞉ ko꞉lo꞉lab. A꞉la꞉ta꞉ga꞉ henfelo꞉ kaluwa꞉yo꞉ Godeya꞉lo꞉ dimido꞉ a꞉no꞉ halaido꞉lo꞉ma a꞉la꞉asula꞉sen ko꞉sega, Godeya꞉lo꞉ dimido꞉ a꞉ma꞉yo꞉ henfelo꞉ kaluwa꞉ halaido꞉ a꞉no꞉ tininila꞉ ko꞉lo꞉lab.

Gode eyo꞉ hendele dimida꞉sen ko꞉lo꞉, elo꞉ sio꞉ a꞉no꞉ tambo ilili alifa꞉ib. A꞉la꞉ta꞉ga꞉ Gode imilise a꞉ma꞉yo꞉ gio꞉ ene so꞉wa Alan Ya꞉su Keliso o꞉lia꞉ doma꞉ki ho꞉ido꞉.

Ni nao nado i, Alan Ya꞉su Kelisowa꞉ wiya ilikiyo꞉, niyo꞉ towo꞉ halaido꞉ gimo꞉ sa꞉ma꞉nigo꞉l. Keliso kaluka꞉isale nol o꞉lia꞉yo꞉ asulo꞉ imilig dowaki, gi usamio꞉ aloba꞉da꞉so꞉bo. Gio꞉ ua dowaki asulo꞉wo꞉ imilise dowa꞉bi.

A꞉la꞉fo꞉ko꞉lo꞉ asugdo꞉ di kaluka꞉isale i a꞉no꞉ wagama꞉iba? Mo꞉sa꞉sa꞉ elelo꞉ asulo꞉ kalu i o꞉mo꞉wo꞉lo꞉ waga fa꞉la꞉doma꞉iba? A꞉la꞉ta꞉ga꞉ henfelo꞉ wenamilo꞉ asulo꞉wo꞉ nafa dia꞉sa꞉ga꞉lo꞉ nenelakilo꞉ saeta꞉lowan kalu i a꞉no꞉lo꞉ wagama꞉nigaba꞉le? Asulo꞉ nafayo꞉ henfelo꞉ amilo꞉ di a꞉no꞉ Gode eyo꞉ no꞉nolo꞉ alitaki o꞉ngo꞉malo꞉ngo꞉ ta꞉felo꞉ ko꞉lo꞉lab