Popular Bible Verses from Kene 12

Share

Uma a̱ tsu a lyaꞋa ta̱ utsura u Kalijani adama a mpasa m Ma̱giri ma, n akaka a̱ Ka̱shile a na kpamu i a kudansa. A pana wovon wu ukpa̱ ba.

Ɗaɗa m panai vuza yoku ɗe gaɗi u danai n ka̱la̱ka̱tsu ka gbayin: “Gogo na Ka̱shile ka̱ tsu ki ta̱ a kisa uma a̱ ni! Gogo na wi ta̱ a kuyaꞋan ulinga n utsura u ni, ka̱ta̱ u lyaꞋa tsugono an mogono! Gogo na Kishi ka̱ ni ki ta̱ o kuyotsongu utsura u ni wa aduniyan! Adama a na Kalijani ko doku ka shamgba a̱ ubuta̱ u Ka̱shile u tsu ba, u buwa a kusatangu itoku i tsu agbashi kanna n kayin ba. A taɗuku ta̱ Kalijani pulai vu gaɗi!

Ɗa MikaꞋilu n alingata a̱ ni a taɗuki vungu vu nan lo a kubana a iɗika n aza a̱ ni. Vungu vu nam pa a̱yi ɗa vuza na u yongoi ali n ayin a mani-mani, a̱yi ɗa vuza na feu e ci ɗeke Kalijani ko MalyaꞋi. A̱yi ɗa vuza na u tsu ya̱nsa̱ yaba dem ka̱ta̱ u yaꞋan unushi.

A̱ɗa̱ vu na yi gaɗi ra̱ka̱ yaꞋin ma̱za̱nga̱. Amma a̱ɗa̱ vu na yi a iɗika n asuvu a mala yi ta̱ o kusoꞋo atakaci ka̱u. Na va ɗaɗa adama a na Kalijani ka̱ cipa̱ ta̱ wa̱ ɗa̱, u yaꞋan ta̱ kpamu wupa ka̱u adama a na u yeve ta̱ ayin a̱ gusa̱ yi ta̱ an wa shamgba.”

Gogo lo ɗa a̱ gita̱i kuvon gaɗi: kalingata ka gbayin MikaꞋilu n alingata a̱ ni a̱ shilika̱i n vungu, ɗa vungu va n aza a̱ ni feu a shamkpai vishili.

Ɗa vungu va vi yaꞋin wupa n vuka va ka̱u, ɗa u ɗenga̱i kuyaꞋan kuvon m muku n ni n na m buwai ra̱ka̱. Muku n ni ma ele ɗa aza a na o tonoi wila̱ u Ka̱shile n aza na o tonoi akaka a na Yesu u yotsongushi.

Ɗa me enei urotu u gbayin na ɗe gaɗi, u na u nekei yaba dem mereve. Vuka vi yoku ɗa vi lo, mayaga ma na u shiyai kpamu kanna kaꞋa. Ene a̱ ni i ta̱ ukiyangi a gaɗi vu wotoi. Wi ta̱ kpamu n oroliko n azangata kupa n e re a kaci ka̱ ni. Limata i yawa yi ta̱ ɗevu, mɓa̱la̱ n atakaci a̱ a̱ga̱nda̱ a limata kpamu a zuwa yi ta̱ ma̱shi.

Ɗa u matsai maku mo kolobo, ma na mi nu utsura ra̱ka̱ ma lyaꞋa tsugono n usuɗukpi a̱ ubuta̱ u uma a aduniyan ra̱ka̱. Amma ɗa kalingata ka kikpatsai maku ma, ɗa u bankai ni u Ka̱shile adama a na u da̱sa̱ngu a kakuba ko tsugono ka̱ ni. Vuka va vu sumai ɗa vu banai a kakamba a̱ ubuta̱ u na Ka̱shile ko foɓusokoi ni. I ta̱ a̱ kula̱na̱ yi ɗe ali ayin ka̱kpa̱n ke te n amangatawenre n amangatatsu (1,260).

Gogo lo ɗa me enei urotu u yoku gaɗi. Me enei vungu vu gbayin vi shili n aci e cindere n avana kupa. Kaci dem ki ta̱ n oroliko e kenu. Winja u ni u ronoi kazangata ke te a̱ ka̱tsuma̱ ka azangata a tatsu dem a gaɗi, ɗa u taɗuki le a aduniyan. U shamgbai e kelime ka vuka ka adama a na u soɗongu maku ma̱ ni gogo lo a ayin a na baci u matsai.

Vuka va vi isai evelyu a kajimba ka gbayin adama a na u ciya̱ u imkpa o kubono a̱ ubuta̱ u ni a kakamba. Adama a na ta ɗe a̱ kula̱na̱ yi ali a̱ya̱ a tatsu n kagimi, vungu ta na wa kufuɗa wa yaꞋanka yi muna ba. Ɗaɗa vungu vu cikpa̱i mini ɗa mo okpoi an kuɗolu ku na ka kulyaꞋa vuka va, adama a na ma laza n a̱yi. Amma ɗa iɗika i ɓa̱nka̱i vuka va: i ɓa̱yuwa̱i una̱ u ni ɗa i soɗongi mini ma na vungu u cikpa̱i va.