Popular Bible Verses from 1 Biturusu 1

Share

Cikpai Ka̱shile, vuza na wi Esheku e Yesu Kishi Vuzagbayin vu tsu. Wi ta̱ n asuvayali ka̱u ɗa u matsasakai tsu kpamu usavu. Adama a umaci u savu wa ɗaɗa ci n a̱pa̱Ꞌa̱ a na i n wuma, ci ciya̱ ta̱ kpamu u ɗa adama a na a̱ ɗengusa̱ ta̱ Yesu Kishi a kasaun. Umaci u savu wa feu u tuka̱ tsu ta̱ n agadu a na a̱ kuna̱mgba̱ ba, i ta̱ ciɗa a ɗa ta na a ci yaꞋan matsafu ba. Ka̱shile ki ta̱ n agadu a̱ ɗa̱ gaɗi, wi a̱ kuka̱sa̱kpa̱ ili i saꞋwa a ɗa ba.

Ili i nam pa ya mayun ɗa u yotso ta̱ kpamu i yaꞋan ma̱za̱nga̱ n i ɗa. Amma gogo na yi ta̱ o kusoꞋo atakaci o kukondo kakau ayin kenu. Atakaci a a̱ ta̱wa̱ ta̱ adama a na o yotsongu uneki u ka̱ɗu u ɗa̱ ko mayun ɗa. Uneki u ka̱ɗu u ɗa̱ wi ta̱ n ugaꞋin ka̱u, u ɗa u laꞋa ta̱ ugaꞋin wa azanariya. Akina a tsu zuwa ta̱ azanariya o okpo ciɗa amma ko n nannai a ɗa o tso okpo ta̱ ili i gbani a kubana megeshe. A ayin a nan lo o yotsongu baci Yesu Kishi u yaba dem, yi ta̱ a̱ kuciya̱ ucikpi, n tsugbayin, m babu kugoyi adama a uneki u ka̱ɗu u mayun u ɗa̱.

Ka̱shile ka zagba ɗa̱ ta̱ yo okpo muku n ni, gogo na kpamu mayun ɗa yo okpo ciɗa† a̱ ubuta̱ wi ili i na yi a kuyaꞋan dem, uteku u na Ka̱shile ki ciɗa. Adama a na Ka̱shile a̱ ka̱ci ka̱ ni u dana ta̱, “Mayun ɗa yo okpo ciɗa adama a na mpa mi ta̱ ciɗa.”

Panakai Ka̱shile adama a na muku n ni n ɗa yi. Ka̱ta̱ kpamu i kucikpa i bono i yaꞋan ili i kavama uteku u na i yaꞋin ci cau ba. A ayin a nan lo i yeve uteku u na i kuyaꞋan ili i singai ba.

Adama a ili i nam pa ra̱ka̱, sheshei tsu na u yotsoi ka̱ta̱ i yongo n kureme ku ka̱ci ka̱ ɗa̱. Sheshei uteku u na Ka̱shile ko kuyotsongu ugaꞋin u ni wa̱ ɗa̱ a ayin a na Yesu Kishi u kubono. A ayin a na dem i ciɓai n kakuna ka nan lo yi ta̱ a̱ kuciya̱ a̱pa̱Ꞌa̱.

Keneki Ishaya u ɗanai: “Uma ra̱ka̱ i ta̱ an mita̱ ma na ma̱ tsu kuwa̱ babu megeshe; ugaꞋin u le u tsu laza ta̱ gogoꞋo an ugaꞋin wa̱ a̱pa̱lu a na i a kakamba. Mita̱ ma̱ ci ɗekpe ta̱, ka̱ta̱ a̱pa̱lu a o ɗoɗo a iɗika. Amma Kadanshi ka Vuzavaguɗu ki ta̱ o kuyongo ko wanai.” Kadanshi ka Vuzavaguɗu ka nam pa kpamu ka ɗaɗa Arabali a Singai a na tsu danai ɗa̱ va.