Popular Bible Verses from ပျႃႇတိၵ်ႈ 13

Share

လွင်ႈ​ဢၼ်​ၼႆႉ​ၸမ်ႉ၊ႁႂ်ႈ​မီး​ၺၢၼ်ႇ​ပိင်ႇၺႃႇ​ဢၼ်​လီ​တႃႉ။ ပေႃႈ​ၽူႈလႂ်​မီး​ပိင်ႇၺႃႇ​ၸိုင်၊ႁႂ်ႈ​မၼ်း​ၼပ်ႉဢၢၼ်ႇ​တႂၢၵ်ႈ​ဢဝ်​ဢၼၢၵ်ႈ​ဢထိၵ်ႈပႄႇ​ၼၢမ်ႇ​ပၢတ်ႈ​ၸိုဝ်ႈ​တူဝ်ထိူၼ်ႇႁၢႆႉ​ၼၼ်ႉ​တႃႉ။ လွင်ႈ​မၼ်း​ၸမ်ႉ၊ၼၢမ်ႇ​ပၢတ်ႈ​ၼၼ်ႉ​ပဵၼ်​ၼၢမ်ႇ​ပၢတ်ႈ​ဢၼ်​တႅၼ်း​ၸိုဝ်ႈသဵင်​ၵူၼ်း​ၵေႃႉ​ၼိုင်ႈ​ဢေႃႈ။ ၼၢမ်ႇ​ပၢတ်ႈ​ၼၼ်ႉ​ၸမ်ႉ၊ပဵၼ်​ႁူၵ်း​ပၢၵ်ႇ​ႁူၵ်း​သိပ်း​ႁူၵ်း​ဢေႃႈ။

ၵူၼ်း​ဢၼ်​ဢသၢၵ်ႈလိပ်း​ယူႇ​ၵႃႈၼိူဝ်​လိၼ်မိူင်း​တင်းသဵင်ႈတင်းမူတ်း​ၸိူဝ်း​ဢၼ်​ၸိုဝ်ႈသဵင်​ၶဝ်​ဢမ်ႇ​ပႆႇ​လႆႈ​တႅမ်ႈ​မၢႆ​ဝႆႉ​ၵႃႈၼႂ်း​ၽိုၼ်လိၵ်ႈ​ဢသၢၵ်ႈ​သူဝ်းဢွၼ်ႇ​ၸဝ်ႈ၊ဢၼ်​ၶၢမ်ႇတၢႆ​ၸႃႉၸဵမ်​မိူဝ်ႈ​ငဝ်ႈ​ၵမ်ႇၽႃႇ​ဢမ်ႇ​ပႆႇ​တႄႇပဵၼ်​မႃး​ၼၼ်ႉ၊ဢွၼ်ၵၼ်​ဝႆႈ​တူဝ်ထိူၼ်ႇႁၢႆႉ​ၼၼ်ႉ​ဢေႃႈ။

မၼ်း​သမ်ႉ​တဵၵ်းငႅၼ်း​ႁႂ်ႈ​ၵူၼ်း​ၼႃႈယႂ်ႇ​လႄႈ​ၼႃႈလဵၵ်ႉ၊ၵူၼ်းၽၢၼ်​လႄႈ​ၵူၼ်း​မီး၊ၶႃႈ​လႄႈ​ၵူၼ်း​လွတ်ႈ​ၵႃႈမီး​တင်းသဵင်ႈတင်းလူင်​ၼၼ်ႉ​ႁႂ်ႈ​ဢဝ်​တၼ်းသိၵ်ႈ​တွၵ်ႇ​ဝႆႉ​ၵႃႈတီႈ​မိုဝ်း​ၽၢႆႇၶႂႃ​ဢမ်ႇၼၼ်​ၵႃႈတီႈ​ၼႃႈၽၢၵ်ႇ​ၶဝ်​ဝႆႉ​ဢေႃႈ။- ၽူႈလႂ်​သေဢမ်ႇဝႃႈ၊ပေႃး​ယင်း​ဢမ်ႇ​မီး​ႁွႆး​တၼ်းသိၵ်ႈ​ၼၼ်ႉ​ၸိုင်၊မၼ်း​ဢမ်ႇ​မီး​ဢၶႂၢင်ႉ​ဢၼ်​လႆႈ​သိုဝ်ႉ​လႆႈ​ၶၢႆ​သေ​ၸိူဝ်ႉ​သေ​ပိူင်။ ႁွႆး​တၼ်းသိၵ်ႈ​ၼၼ်ႉ၊ပဵၼ်​ၸိုဝ်ႈသဵင်​တူဝ်ထိူၼ်ႇႁၢႆႉ​ၼၼ်ႉ​ဢေႃႈ။ ဢမ်ႇၼၼ်​ပဵၼ်​ၼၢမ်ႇ​ပၢတ်ႈ​ဢၼ်​တၢင်တူဝ်​ၸိုဝ်ႈသဵင်​မၼ်း​ၼၼ်ႉ​ဢေႃႈ။

“ပိူဝ်ႈ​ၼႆ​လႄႈ​ၽူႈလႂ်​မီး​ႁူ​ၵေႃႈ​ထွမ်ႇငိၼ်း​ဢဝ်​တႃႉ။ ၽူႈလႂ်​သေဢမ်ႇဝႃႈ၊ၵေႃႉ​ဢၼ်​ၽြႃးပဵၼ်ၸဝ်ႈ​တႅပ်းတတ်း​ဝႆႉ၊ပုၼ်ႈတႃႇ​တေ​လႆႈ​ၶၢမ်ႇ​တိဢဝ်​ၵႂႃႇ​ပဵၼ်​ၶႃႈ​ၼၼ်ႉ​ၵေႃႉ​ၼၼ်ႉ​တၵ်း​လႆႈ​ၶၢမ်ႇ​တၢင်း​ဢၼ်​တိဢဝ်​ၵႂႃႇ​ပဵၼ်​ၶႃႈ​တႄႉ​ဢေႃႈ။ ၵေႃႉ​ဢၼ်​ဢဝ်​လၢပ်ႇ​ၽၼ်း​ပိူၼ်ႈ​တၢႆ​ၼၼ်ႉ​ၵေႃႈ​တၵ်း​လႆႈ​ၶၢမ်ႇ​တၢင်း​ဢၼ်​ၽၼ်း​တၢႆ​လူၺ်ႈ​လၢပ်ႇ​ဢေႃႈ။ ၼႆႉ​ၸမ်ႉ၊ပဵၼ်​လွင်ႈတၢင်း​ဢၼ်​ယိူၼ်ႉၶၢမ်ႇ၊ပဵၼ်​လွင်ႈတၢင်း​ဢၼ်​ယုမ်ႇမၢတ်ႈ​ဢၼ်​ၵူၼ်း​ၽြႃးပဵၼ်ၸဝ်ႈ​တင်းလၢႆ၊တၵ်း​လႆႈ​မီး​ဢေႃႈ။”

ၵဝ်​လႆႈ​ႁၼ်​တူဝ်ထိူၼ်ႇႁၢႆႉ​တူဝ်​ၼိုင်ႈ၊ဢွၵ်ႇ​သေ​ၵႃႈတီႈ​ပၢင်ႇလၢႆႇ​မႃး​ဢေႃႈ။ မၼ်း​ၼၼ်ႉ​မီး​ႁူဝ်​ၸဵတ်း​ႁူဝ်၊ဢိၵ်ႇတင်း​မီး​ၶဝ်​သိပ်း​လႅမ်ႈ​လႄႈ၊ၵႃႈၼိူဝ်​ၶဝ်​ယေႈ​လႅမ်ႈ​ၼၼ်ႉ​တိုဝ်း​သရၽူႇ​ဝႆႉ​ယေႈ​ဢၼ်​သေ၊ၵႃႈၼိူဝ်​ႁူဝ်​ယေႈ​ႁူဝ်​သမ်ႉ​တႅမ်ႈ​ဝႆႉ​ၸိုဝ်ႈသဵင်​ဢၼ်​ယႃႉသရေႇ​ၽြႃးပဵၼ်ၸဝ်ႈ​ၼၼ်ႉ​ဢေႃႈ။

မၼ်း​လႆႈ​ဢၶႂၢင်ႉ​ဢၼ်​တၵ်း​တိုၵ်းတေႃး​ၵၼ်​တင်း​ၵူၼ်း​ၽြႃးပဵၼ်ၸဝ်ႈ​တင်းလၢႆ​လႄႈ​လႆႈ​ပႄႉၼႅင်ႇ​ၼၼ်ႉ​သေယဝ်ႉ၊လႆႈ​ဢၶႂၢင်ႉ​ဢၼ်​လႆႈ​ဢုပ်ႉပိူင်ႇ​ၵႃႈၼိူဝ်​ၵူၼ်း​ၵူႈၶိူဝ်းၶိူဝ်း၊ၵႃႈၼႂ်း​ၵူႈ​မိူင်း​မိူင်း​ဢၼ်​လၢတ်ႈ​ၵႂၢမ်း​ၽႃႇသႃႇ​ၵူႈမဵဝ်းမဵဝ်း​ၼၼ်ႉ​ဢေႃႈ။

ၵွပ်ႈ​လူၺ်ႈ​လွင်ႈ​ၼိမိၵ်ႈ​လၢၵ်ႈၶၼႃႇ​ဢၼ်​မၼ်း​လႆႈ​ဢၶႂၢင်ႉ​သေ​ၼႄပျႃး​ၽၢႆႇၼႃႈ​တူဝ်ထိူၼ်ႇႁၢႆႉ​တူဝ်​ဢွၼ်တၢင်း​ၼၼ်ႉ​လႄႈ​မၼ်း​ပႅတ်ႉလႅၼ်​ဢဝ်​ၵူၼ်းလေႃးၵီႇ​တင်းလၢႆ​ၸႂ်ႉ​ႁႂ်ႈ​ၶဝ်​ႁဵတ်း​ႁုၼ်ႇႁၢင်ႈ​တူဝ်ထိူၼ်ႇႁၢႆႉ၊ဢၼ်​လႆႈ​ၶၢမ်ႇတၢမ်ႇ​ႁွႆး​ၸဵပ်း​ဢၼ်​လႆႈ​ၶၢမ်ႇ​တၢင်း​ဢၼ်​လႅဝ်း​ၽၼ်း​လႄႈ​ဢသၢၵ်ႈ​ယင်း​လိပ်း​ယူႇ​ၼၼ်ႉ​ဢေႃႈ။- မၼ်း​ၼၼ်ႉ​မီး​ဢၶႂၢင်ႉ​ဢၼ်​လႆႈ​သႂၢင်း​ပၼ်​ဢသၢၵ်ႈ​တီႈ​ႁုၼ်ႇႁၢင်ႈ​တူဝ်ထိူၼ်ႇႁၢႆႉ​တူဝ်​ဢွၼ်တၢင်း​ၼၼ်ႉ၊ႁႂ်ႈ​လၢတ်ႈ​ၵႂၢမ်း​လႆႈ၊ဢိၵ်ႇတင်း​ႁႂ်ႈ​ဢဝ်တၢႆ​ၶဝ်​ၸိူဝ်း​ဢၼ်​ဢမ်ႇ​ဝႆႈ​ႁုၼ်ႇႁၢင်ႈသၢင်းထု​ၼၼ်ႉ​ဢေႃႈ။

တူဝ်ထိူၼ်ႇႁၢႆႉ​ၼၼ်ႉ မိူၼ်​ၸိူဝ်ႉ​ၼင်ႇ​သိူဝ်ၸုမ်ႈ​လႄႈ​တိၼ်​မၼ်း​မိူၼ်​ၸိူဝ်ႉ​ၼင်ႇ​တိၼ်​မီ​ဝႆႉ၊သူပ်း​မၼ်း​ၵေႃႈ​မိူၼ်​ၸိူဝ်ႉ​ၼင်ႇ​သူပ်း​သၢင်ႇသီႈ​ဢေႃႈ။ ၼၵႃး​ၼၼ်ႉ​ဢဝ်​တၼ်းၶူဝ်း​တူဝ်ၸဝ်ႈၵဝ်ႇ၊ဢိၵ်ႇတင်း​ဢဝ်​ပလၢင်ႇ​တူဝ်ၸဝ်ႈၵဝ်ႇ၊ဢိၵ်ႇတင်း​ဢဝ်​ဢႃႇၼႃႇ​တူဝ်ၸဝ်ႈၵဝ်ႇ​ဢၼ်​ယႂ်ႇ​ၼႃႇ​ၼၼ်ႉ​ဢၢပ်ႈပၼ်​တီႈ​တူဝ်ထိူၼ်ႇႁၢႆႉ​ၼၼ်ႉ​ဢေႃႈ။

တူဝ်ထိူၼ်ႇႁၢႆႉ​ၼၼ်ႉ​မီး​ၸႂ်​ဢၼ်​ၽႅၼ်သုင်​လႄႈ​လၢတ်ႈ​ၵႂၢမ်း​ဢၼ်​ယႃႉသရေႇ​ၽြႃးပဵၼ်ၸဝ်ႈ၊ဢိၵ်ႇတင်း​လႆႈ​ၶႂၢင်ႉ​ဢၼ်​မီး​ဢႃႇၼႃႇ​တၼ်းၶူဝ်း​သီႇ​သိပ်း​ပၢႆ​သွင်​လိူၼ်​တဵမ်တဵမ်​ဢေႃႈ။

ၵႃႈၼႂ်း​ၵွၵ်းႁူဝ်​တူဝ်ထိူၼ်ႇႁၢႆႉ​ၼၼ်ႉ​ႁူဝ်​ၼိုင်ႈ၊မိူၼ်​ၸိူဝ်ႉ​ၼင်ႇ​ႁၢင်ႈ​မီး​ႁွႆး​ၸဵပ်း​ဢၼ်​ၸၢင်ႈ​ႁႂ်ႈ​ထိုင်​တၢႆ​လႆႈ​ၼၼ်ႉ​ဢေႃႈ။ ၵူၺ်းၵႃႈ၊ႁွႆး​ၸဵပ်း​ၼၼ်ႉ​လႆႈ​ယႃ​ႁၢႆ​ဝႆႉ​ယဝ်ႉ​ဢေႃႈ။ ၵူၼ်းလေႃးၵီႇ​တင်းသဵင်ႈတင်းမူတ်း​မီး​တၢင်း​ဢၼ်​ဢၢမ်း​ၼႃႇ​လူင်လၢင်​လႄႈ​ၸွမ်း​ၽၢႆႇလင်​တူဝ်ထိူၼ်ႇႁၢႆႉ​ၼၼ်ႉ​ၵႂႃႇ​ဢေႃႈ။

ၵမ်း​ၼၼ်ႉ ၵဝ်​လႆႈ​ႁၼ်​တူဝ်ထိူၼ်ႇႁၢႆႉ​တၢင်ႇ​တူဝ်​ပေႃႇ​ဢွၵ်ႇ​ၵႃႈၼိူဝ်​လိၼ်မိူင်း​မႃး​ၼၼ်ႉ​ဢေႃႈ။ မၼ်း​ၼၼ်ႉ၊မီး​ၶဝ်​သွင်​လႅမ်ႈ​ဢၼ်​မိူၼ်​ၸိူဝ်ႉ​ၼင်ႇ​ၶဝ်​သူဝ်းဢွၼ်ႇ​ၸဝ်ႈ​သေလႄႈ​မၼ်း​လၢတ်ႈ​ၵႂၢမ်း​မိူၼ်​ၸိူဝ်ႉ​ၼင်ႇ​ၼၵႃး​လၢတ်ႈ​ၵႂၢမ်း​ၼၼ်ႉ​ဢေႃႈ။- မၼ်း​ယၢမ်ႈ​ၸႂ်ႉ​ဢႃႇၼႃႇ​တၼ်းၶူဝ်း​တူဝ်ထိူၼ်ႇႁၢႆႉ​တူဝ်​ဢွၼ်တၢင်း​ၼၼ်ႉ​သိုဝ်ႈ​ၼႃႈ​တႂ်ႈတႃ​မၼ်း​လႄႈ​တဵၵ်းငႅၼ်း​ႁႂ်ႈ​ၵူၼ်းမိူင်း​လေႃးၵီႇ​တင်းလၢႆ​ဝႆႈ​တူဝ်ထိူၼ်ႇႁၢႆႉ​ဢၼ်​မီး​ႁွႆး​ၸဵပ်း​ဢၼ်​ၸၢင်ႈ​ႁႂ်ႈ​ထိုင်​တၢႆ​လႆႈ၊ဢၼ်​သမ်ႉ​ပေႃး​ယႃ​ႁၢႆ​ဝႆႉ​ယဝ်ႉ​ၼၼ်ႉ​ဢေႃႈ။