Popular Bible Verses from ငဝ်ႈ 45

Share

တေႃႈလဵဝ်​ၼႆႉ​ယႃႇပေ​မႆႈၸႂ်​လႄႈ​တၢင်ႇ​ဢပျတ်ႈ​တီႈ​တူဝ်ၸဝ်ႈၵဝ်ႇ​လူၺ်ႈ​လွင်ႈ​ဢၼ်​လႆႈ​ၶၢႆ​တူဝ်​ၵဝ်ၶႃႈ​ထိုင်​မႃး​ၵႃႈတီႈ​ၼႆႈ​ၼၼ်ႉ​သေၵမ်း။ ႁႂ်ႈလႆႈ​ၸွႆႈထႅမ်​ဢသၢၵ်ႈ​ပိူၼ်ႈ​ၸိုင်၊ၽြႃးပဵၼ်ၸဝ်ႈ​ပွႆႇၸႂ်ႉ​ၵဝ်ၶႃႈ​မႃး​ဢွၼ်တၢင်း​သူ​ဢမၢၼ်ႇၶၼ်ပဵၼ်​ဢေႃႈ။

ပိူဝ်ႈ​ၼႆ​လႄႈ​သူ​ပဵၼ်​ၵေႃႉ​သူင်ႇ​ၵဝ်ၶႃႈ​မႃး​ၵႃႈတီႈ​ၼႆႈ​ဢမ်ႇၸႂ်ႈ​ၵူၺ်း။ ပဵၼ်​ၽြႃးပဵၼ်ၸဝ်ႈ​သူင်ႇ​ဢေႃႈ။ ၽြႃးပဵၼ်ၸဝ်ႈ​ၶၢၼ်း​ၵဝ်​ဝႆႉ​မိူၼ်​ၼႂ်း​ဢရႃႇ​ပေႃႈ​ၶုၼ်ႁေႃၶမ်း​ႁႂ်ႈလႆႈ​ဢုပ်ႉပိူင်ႇ​ၼႂ်း​ႁၢင်ႈ​ၼႂ်း​ႁေႃ​ၸဝ်ႈ​တင်း​လူင်​လႄႈ၊လႆႈ​ပဵၼ်​ၶုၼ်​မိူင်း​ ဢေးၵျိပ်ႉ၊ တင်း​မိူင်း​ဢေႃႈ။

ၽြႃးပဵၼ်ၸဝ်ႈ​သူင်ႇ​ၵဝ်ၶႃႈ​မႃး​ဢွၼ်တၢင်း​သူ​ၼႆႉ​ပဵၼ်​ဢၼ်​လၢၵ်ႇလၢႆး​လီဢၢမ်း​ၼႃႇ​ပုၼ်ႈ​တၵ်း​လႆႈ​ၵႄႇသႄႇ​ဢသၢၵ်ႈ​သူ​ၼင်ႇ​ႁိုဝ်​ၸိူဝ်ႉၶိူဝ်း​သူ​တေ​ဢမ်ႇ​ၶၢတ်ႇ​ပႅတ်ႈ​သေ​ၵႃႈၼိူဝ်​လိၼ်မိူင်း​ၼႆႉ​ၵႂႃႇ​ၼၼ်ႉ​ယဝ်ႉ။

ယူဝ်းသႅပ်ႈ၊ ၸင်ႇ​လၢတ်ႈ​လႄႈ​ဝႃႈ၊ “သုတ်ႉ​မႃး​ၸမ်​ၸမ်​ၶႃႈ​တႃႉ၊” ဝႃႈ​ၼင်ႇ​ၼႆ​လႄႈ၊ၶဝ်​ဢွၼ်ၵၼ်​သုတ်ႉ​ၸူး​ၸမ်​ၸမ်​ဢေႃႈ။ မၼ်း​လၢတ်ႈ​လႄႈ​ဝႃႈ၊ “ၵဝ်ၶႃႈ​ပဵၼ်​ၼွင်ႉၸၢႆး​သူ​ ယူဝ်းသႅပ်ႈ၊ ဢၼ်​သူ​ၶၢႆ​ၵႂႃႇ​ၵႃႈတီႈ​မိူင်း​ ဢေးၵျိပ်ႉ၊ ၼၼ်ႉ​ဢေႃႈ။

ပီ​ဢၼ်​ၶဝ်ႈၵႃႈမၢၵ်ႇပႅင်း​ၼၼ်ႉ​မီး​သွင်​ပီ​ယဝ်ႉ​ဢေႃႈ။ ပီ​ဢၼ်​တေ​ဢမ်ႇ​ၸၢင်ႈ​ႁဵတ်း​ၼႃး​ဢမ်ႇ​ၸၢင်ႈ​လႆႈ​ပၢတ်ႇ​ၶဝ်ႈ​သိမ်း​ၶဝ်ႈ​ၼၼ်ႉ​ယင်း​တေ​မီး​ထႅင်ႈ​ႁႃႈ​ပီ​လူးၵွၼ်ႇ​ဢေႃႈ။

ယူဝ်းသႅပ်ႈ၊ လၢတ်ႈ​တီႈ​ပီႈဢၢႆႈ​မၼ်း​ၸိူဝ်း​ၼၼ်ႉ​လႄႈ​ဝႃႈ၊ “ၵဝ်ၶႃႈ​ပဵၼ်​ ယူဝ်းသႅပ်ႈ၊ ဢေႃႈ။ ပေႃႈ​ၵဝ်ၶႃႈ​ယင်း​ဢသၢၵ်ႈလိပ်း​ယူႇ​ၶႃႈ​ႁိုဝ်း၊” ဝႃႈ​ၼင်ႇ​ၼႆ​ဢေႃႈ။ ၵူၺ်းၵႃႈ၊မိူဝ်ႈ​ဢၼ်​ပီႈဢၢႆႈ​မၼ်း​ၸိူဝ်း​ၼၼ်ႉ​ငိၼ်း​ၸိုင်၊ၶဝ်​ၵူဝ်ႁႄ​ၼႃႇ​ထၢၼ်ႈပေႃး​ဢမ်ႇ​ၸၢင်ႈ​ၶိုၼ်း​တွပ်ႇ​ၶိုၼ်း​လၢတ်ႈ​ၵႃႈသင်​ယဝ်ႉ​ဢေႃႈ။