Popular Bible Verses from Rom 8

Share

Avaha kanamanei Yaubada ya nuanua ahiahina wayahika mamaei, ka kadu tauna honeka iuna ya nuanua nau‑iaiavana kavaniahei. Wayahina, ataina itoka Yaubada kadune‑nuanuaiei, ka tauna dewa aitamoata aitamoata ivin'‑omo‑nananena wayahikaia paipaisewei itoka yaka vidoha wayahina.

Udueyei. Yaubada avaha ya dune‑nuanuai ani‑vainena wayahikaia viwaveneka taina deina. Tauna Natu‑hoina Tau Ito‑yavuha Iesu yaka Kauvea vi‑tunei omo wayahikaia. Ka Yaubada ya dune‑nuanuai wayahika aitam manawa kainumu bagibagi‑vainena deina, ka eha aitam aviani o eha aitam dewa ana pata manawana na‑upwe. Yaka aniga eha ana pata, ka yawaika eha ana pata. Eha aitam anelose ana pata, ka eha aitam kini V ana pata. Eha aitam aviani mamaei ataina ana pata, ka eha aitam aviani omomo tuta tepakaia ana pata. Eha aitam papani teaka mamae, ka eha aitam papani bebega mamae manawana vi‑kutakuta. Iuna manawana ana pata. Eha aitam aviani Yaubada ya vevewana nihenina ana pata manawana na‑upwe. Yauke, Paulo, avaha nua‑uyana anamane‑yehai. Ana pata deina.

Ka kadu Yaubada Nuana Ahihinata vo‑taitaieka yaka ihanua wayahia deina. Iuna eha kat'‑anamane medeina kaviama tunuhina. Ka tuta tuta Yaubada Nuana bebebewa na‑ivaiteka, ka tauna toutou kadu viama bagibagina wayahika Yaubada matana.

Vona ahiahina, memeanina kadueyei Yaubada ya dune‑nuanuai aitamoata aitamoata wayahikaia vivane ani‑vainena. Wayahina, itoka nau‑wawanika kanau‑kaiwa Yaubada wayahina ya dewaia wayahina. Yaubada yaka tau vo‑taitai kadu tauna yaka tau ito‑yavuha kadu aka niam. Wayahina, aituhu tomotau imana‑giboeka, o aituhu inau‑havieka, taui Yaubada ai havia deina.

Ka pai nau‑yehata wayahina, yau ipupu a nau‑itava ananina taina. Aituhu aviyaivia wayahikaia avaha Tau Ito‑yavuha Iesu nui kavi‑niana, tauka vivane Iesu hutana, ka tauna nihenina kamamaei. Wayahina, tuta ataina eha aitam aka dewa‑yaiyai potapotaka yaka goyona wayahi.

Aituhu aviyaivia iawaehei goyona taui yai nuanua veimeyei, akanai taui inini nihenina dewa goyona idedewei, ka tuta pai nau‑yehata wayahina taui ai nau‑pata dewa goyo‑naia ivaniahei vivane aniga ainua. Aitam aniga inini nihenina ivaniahei, ka kadu aitam aniga nuai nihenina ivaniahei. Kate aituhu aviyaivia iawaehei Yaubada Nuana taui yai nuanua veimeyei, ka aituhu taui Nuana ivi‑ateteyei, akanai taui yawai‑vavaha ivaniahei, kadu nua gomagomanina Yaubada wayahina ivaniahei.

Ka avonemi, dewa habuhabuna pai dune aka inahe ivin'‑omo‑nananena wayahikaia. Ka Yaubada dune‑nuanuaieka, kadu tauna yana ivaita ani‑vainena wayahikaia. Wayahina, itoka aka pata inahe aitamoata aitamoata kavane‑tawanei.

Ataina itoka inahe kavaniahei tanopia, ka apaina didigaka kavaniahei wahuma. Ka avonemi aituhu aka inahe ataina ka didigaka apaina ainua kabou‑viwavei, didigaka apaina aka inahe ataina vane‑tawane‑vainei.

Ka Tau Ito‑yavuha ya dune‑nuanuai wayahika ani‑vainena kadu bagibagi‑vainena. Tauna ya dune‑nuanuai wayahika tomotau aitamoata aitamoata yai bagibagi bagibagi‑tawanei. Ka kadu ya dune‑nuanuai wayahika dewa habuhabuna bagibagi‑tawanei. Eha aitam vita, o inahe, o am navovo, o nagonegonena, o matauta aniga wayahina ana pata Yaubada ya dune‑nuanuai wayahika na‑bagibagi‑tawane.

Ka Yaubada avaha nuaka anamanei kadu yaka nuanua anamane‑yehai, iuna tauna naunau‑nene nuaka nihenina. Ka kadu aviani Nuana nuanua, tauna anamane‑yehai. Iuna Yaubada Nuana viama itoka Yaubada natunatuna wayahika, ka Nuana ya nuanua ka Yaubada ya nuanua vivane aitamoata.

Nonova itomi umatamatauta aniga wayahina, iuna aniga bagibagina. Kate aituhu Yaubada Nuana uawaehei na‑nu nihenimia kadu veimeyemi, akaka Yaubada n'‑awaehemi itomi vivane natunatuna. Yaubada Nuana eha ta‑yohonimi uvi‑tau paisewa‑kavokavovo matauta wayahina, nonova deina. Kate Yaubada Nuana nuami vo‑vinei, ka ataina itomi Yaubada natunatuna. Ka aituhu aviyaivia iawaehei Yaubada Nuana yawai veimeyei, vona ahiahina, taui Yaubada natunatuna. E Yaubada Nuana eta‑naoeka, e Yaubada kavi‑wahani, “Aba V , Amau!”

Aituhu aviyaivia iawaehei goyona taui yai nuanua veimeyei, akanai taui inini nihenina dewa goyona idedewei, ka tuta pai nau‑yehata wayahina taui ai nau‑pata dewa goyo‑naia ivaniahei vivane aniga ainua. Aitam aniga inini nihenina ivaniahei, ka kadu aitam aniga nuai nihenina ivaniahei. Kate aituhu aviyaivia iawaehei Yaubada Nuana taui yai nuanua veimeyei, ka aituhu taui Nuana ivi‑ateteyei, akanai taui yawai‑vavaha ivaniahei, kadu nua gomagomanina Yaubada wayahina ivaniahei.

Iuna Yaubada tauna Natu‑hoina eha ta‑nua‑tania, kate awaehei kadu vi‑nomui itoka wayahika. Yaubada dewei deina, iuna ya nuanua na‑vo‑vi‑tunutunuhika matana. Nau‑wawanika tauna ya dewana ananina kanuanuani. Wayahina, memeanina tauna wayahina aituhu aviani habuhabuna kikituna nau‑wawanika, akanai tauna ya dewa‑haiawa nui veneveneka.

Ka Yaubada Nuana kadu itoka nuaka ainua iawaehei aitamoata deina vivane itoka Yaubada natunatuna. Wayahina, ataina, aituhu Tau Ito‑yavuha ana inahe kavaniahei, ka kadu aituhu inahe‑naia nihenina katoha‑vi‑anai nonova Iesu toha‑vi‑anai deina, akanai itoka nau‑wawanika Yaubada yana gabu kavaniahei, Tau Ito‑yavuha avaha yana gabu vaniahei aitamoata deina. Ka aituhu tuta ataina kadedewei deina, apaina Iesu tauna didigana na‑vo‑pataka vivane itoka didigaka.

Aituhu aviyaivia iawaehei goyona taui yai nuanua veimeyei, vona ahiahina, taui vivane Yaubada a havia. Iuna taui Yaubada ya veimea itana‑bwegebwegei, ka kadu taui eha ai pata tauna ya veimea ivi‑ateteye.

Vona ahiahina, Yaubada ya vevewana habuhabui ipotapota (tomotau ipotapota deina) kadu nuanuai ananina Yaubada tauna natunatuna habuhabui na‑si‑vin'‑omanei idudueyei.

Tuta naona a itoava tuta ataina wayahina, Yaubada ya vevewanaia ibebebewa, itoutou, vaivine yai viha ivi‑natuna wayahina deina.