Popular Bible Verses from Epeso 6

Share

Buku nang otaw yang pyapagtanaman ta awgaid si Satanas aw yang kanaan manga maropig na sogwanun na buku nang maynatu na manga otaw. Aon digkanilan manga sogwanun ni Satanas na dakora yang gaom na yamaimo pangoro nang kanilan sakop digpagawanan aw asang karowagan nang donya. Arag aon digkanilan yagabaya sang pagimo sang maat disang manga nasyon, wakaw maynang kyakangitngitan yang karowagan nang donya kay yaan yang yagaari pa si Satanas na maropig. Gimadaigan arag yang manga magbabaya aw mangkaraat na syosogo ni Satanas antak magbaya sang manga otaw na saraun.

Abay kamo pagampo aw pagbantog sang Dios, pangayo kamo kanaan nang tabang antak di kamo daugun ni Satanas aw antak di kamo daugun nang manga sogwanun naan na mangkaropig. Butangan sang ginawa mayo yang pagampo mayo na pyagabayaan nang Balaan na Espirito, ayaw kamo magtangku. Maski diin abay kamo pagampo sang Dios. Pangayo sang Dios na panalanginan naan yang kariko nang manga tomotoo.

Kamo maynang manga otaw na yapagtanam na byobokad ni Satanas. Wakaw dawata yang kariko nang tabang nang Dios kamayo kay daw kamo daugun nang gaom ni Satanas na laban matigam magimoimo sang manga kagaro antak kamo tomoo kanaan.

Wakaw abaya dawata yang kariko nang tabang nang Dios kamayo antak kamo makaimo somopak sang kariko nang kang Satanas manga sogwanun aw domorod silan kamayo. Maski abay kamo nilan tintarun, ayaw kamo magpadaug kanilan, di da kamo magosos antak kariko nilan daugun mayo.

Abaya pakadiguna yang pagkanarig mo sang Dios kay mayn yaan nang karasag mo na makasaranig kanmo antak di kaw masogat nang kang Satanas papana na gadara nang atoron. Yaan yang pagtintal kanmo ni Satanas na maropig. Pagdakoraa sang ginawa mo si Jesu Kristo na kyakanarigan ta kay yaan yang yagapakamatay tungud kanatu antak kita makagawas sang gaom ni Satanas. Yaan na imo ni Kristo mayn yaan nang sadok na potaw na makasaranig sang oro mo. Yaan yang papagbayaa sang pagalaong mo yang Balaan na Espirito antak kaw domaug kang Satanas pinaagi sang sorit nang Dios kay mayn yaan nang matarum na kakana.

Dasiga yang ginawa mayo antak kamo domaug sang sakop ni Satanas. Abay paglaongan yang matungtung na sorit kay mayn yaan nang urun mo disang awak mo. Paggaon sang batasan nang Dios na poros madyaw kay mayn yaan nang limbotong mo. Butangan sang ginawa mo yang madyaw na batok bain kang Jesu Kristo kay mayn yaan nang sapatos sang siki mo.

Yani yang kyampusan na pagalaong ko kamayo na ayaw mayo pagkaringawi. Abaya butangan sang ginawa mayo si Jesu Kristo, akatabangan kamo nang kanaan dakora na gaom na way tatamanan.

Dumduma yang manga balaod nang Dios, aon yuupud na saad naan na yagalaong, “Pagtaoda si ama mo aw si ina mo, antak maaba yang omol mo, aw antak madyaw yang kabutang mo.” Amasiling naan yang manga isu aw mangagad sang kanilan taganak.

Kamo na manga isu, abaya mayo pangagadi yang kamayo manga taganak, kay yaan yang pagbuut nang Dios kamayo na sakop ni Kristo.