Popular Bible Verses from Roma 14

Share

Diyà kenitadon migpesakop diyà te peglowan te Timanem, mepakay pengkey eden se kànen aw inemen tadon. Meneng keilangan metòlid se inangen tadon, aw melinaw se pedowan tadon diyà te doma otaw, aw yan begayan kidon te Espiritu Santo te keluba te pedowan tadon. Aw yan se inangen te kedita tadon egtolò ki Cristo, meluba se Timanem kenitadon, aw mikagi heman se doma otaw te mèpiya se eg-inangen tadon.

Dalem te wedà kidon pa kematay, Pengolo tadon si Cristo se egseligan tadon. Pengkey matay kidon, sikandin heman se seligan tadon. Yan, pengkey dalem te wedà kidon pa kematay, pengkey matay kidon, sakop kidon pa te Pengolo tadon.

Nayan, pengkey eden se inangen tadon, keilangan eneng-enengen tadon amon eked kebàti se kelinaw te pedowan tadon, amon megpetebangay kidon te pegtaking tadon ki Cristo.

Yan ikà niyo egsila te ketanem egtekingan te menge doma sakop i Cristo. Meneng keilangan eneng-enengen niyo tepad te ketanem egtekingan niyo amon eked kedàti se menge doma sakop i Cristo tandà te eg-inangen niyo, aw amon wedad heman otaw meboyo meg-inang te salà.

Netegahan tadon te benal iyan, so mebasa tadon se kagi te Pengolo tadon kidoen te kagi te Timanem insolat, “Metoman se kagi ko kenyo seini. Doen aldaw domateng te lomongken se kedita te otaw diyà kanak. Domuyun se kedita te otaw te Timanem.” Yan keilangan sominalo se teg sebad-sebad kenitadon te Timanem amon meg-indan kidon te benal tepad te kedita te ininang tadon dini lanto te tanà.

Nayan, peekopi niyo se otaw migpesakop diyà ki Cristo pengkey wedà pa ontò ketaga-taga te kebenalan. Pengkey sebad se aneng-aneng din tepad te pegpenimanem, ikà niyo egdindil kandin.

Eked kepakay aw silahen tadon se ketanem egtekingan te menge doma otaw singed aw kenitadon sineligan, so olò amo dan se mepakay mikagi te mèpiya aw medaet se ketanem egtekingan te sineligan din. Meneng mèpiya se eg-inangen tadon menge sakop din, so egpeketabang se Pengolo tadon kenitadon.