Popular Bible Verses from Efesasi 5

Share

E'ina hu'negu Anumzamo nehia avu'avakna hutma tamavutmavara hiho, nankure tamagrira agu'areti avesi nermantea mofavre'a mani'naze, tamagra vaheku tamavesi nezmanteta, Kraisi'ma agu'areti avesiranteno agra'a avufga atreno tazama hu'neakna nehutma, Agra'a avufa tagriteku huno Anumzamofontega mananentake'za kre sramna vu'neakna hiho.

E'i zanku kama vano hananana kva huo, antahi'za omne vahe knara osunka, antahi'za me'nea vahe kna huo, kazigzi hutma maka knafina knare eri'za e'neritma maniho, na'ankure menina kefozamo hakare hu'neanknafi nemanune.

Waini tina netma negia oneho, na'ankure anazamo tamazeri haviza hugahie. Hianagi atrenkeno Avamu'mo tamagu'afina avitena, atruma nehanutma, Deviti zgame ene (Sams), mono zgame'ene, avamu'mofo zgame nehutma, Rantmimofona tamagu'areti musena hunenteta, hakare zupa maka zampina Ranti Jisas Kraisi agifi, Anumza Nafatimofona musena hunteho.

E'i zanku tamagra negi vahe knara osutma, Rantimofo avesi'zama hanaza zankuke tamagesa antahiho.

Vene'nemotma, a'ne tmia tamagu'areti zmavesi zamanteho, Kraisi'ma mono kevu'agu agu'areti avesi zamanteno zamahoke heno ana a'ku (sios) fri'nea kna hiho.

Na'ankure korapara hanizampi mani'nazane, hianagi menina Ramofo Msafi mofavre'aza hutma, ana msafi vano hutma maniho.

Kraisina antahi'nemitma rumokizmia ovesinte avesinte hiho.

A'nemotma, Ramofo agorga nemniza kna huta tamavenanehe'i agorga maniho.

Anahuga hianagi, amu'nontamifina mago mago'mo'a nenaronkura avesi nenteno agra avufagu agesa nentahiankna nehnigeno, nenaro'a anazanke huno nevena antahi nemino ke'a erizafa hugahie.

E'i ana agafare Vemo'a nefane, nererane znatreno, nenaro'ene eri hagerafige'ne, tarega'mokea magoke znavufaza hugaha'e. (Anumzamofo avon tafepi amanage huno krente'ne). (Jen-Agf 2:24)

Rga'a reonteno hani avu'ava zantera tragora otetma, ke huta eriama hiho