Popular Bible Verses from Loma 8

Share

Kadu'e kahalamanena ide gaveyao yada nuwanuwa Yaubada againe kasena amanadi gavadi gavadi agaideya gilakayemu, Yaubada medema vitai-dina yada yamumu fa'ina ginakiviladi, ide Yaubada yana inuba fa'ina gikovada-ma kalivai-dana.

Fa'ina Yaubada ginuwanuwa lakahina ide agaideya yo yada Kaiwabu Yesu Keliso gi'iveninisena be ide fa'ideya gi'alika. E, Yaubada yana nuwanuwa agaideya lakahina, lakahi-mo'ena ada iya ganuwave'avina vaita keke tamo gavadi o keke tamo hakwadi Yaubada nimane anafaiweya ginalemada. Ka'i kana'alika o ka'i wayawaida kanamiyami, au Bana nimane kanamiyamiya-vagata. Badi lobama ana tovenuwa'ata o ka'i balauma o ka'i lobama hinafana ana tofaiwala keke-mo'a adifaiweya Yaubada nimane hinalemada. Kadu keke tamo gavadi tova adamoya gidadauda o aimo tova mulina ginalakayemu amanadi, kadu keke tamo gavadi wesei getane o gava dibune, e keke tamo gavadi gaitoma moya'aidi i'ibubunidi agaidiya Yaubada nimane ginalemada, keke keke-mo'a.

Kadu'e ide nuwadeya kagakowakowa tu Alu'aluwa Mahalina giveluvelugada. Gavaimi gilubodada be kanave'o'ola ma keke kadahalamaneni, tu Alu'aluwa Mahalina nuwahinagedeya ve'o'ola toyogina gi'alaveleveleda, ana ayauna ma vaita yawai'ohi lakahina keke ana wahifufu.

Hida Yaubada yana inuba ana nuwanuwa tulina tulina ide yana kaliva yana vevine fa'ideya kalukahihiyena. Gavaiyami? Yaubada ide gilulugolegoleda fa'ina, badi hivenibaineda-ma yadi faiwala gaitoma-kawowo keke-mo'a adifaiweya hinafaiwalahegeda.

Tu Yesu Keliso yana alika againe yada koyona ana laufata giwahina fa'ina, ide gaveyao tova adamoya Yesu Keliso buye kave'atutamo'aida medema ada matahiwadi keke, keke-mo'a.

Ka'i dibuda koyona againe nuwada kanasena, alika kananuhagana. Ka'i Yaubada Alu'aluwana againe nuwada kanasena, wayawaida ivaguna kadu yada wa'aseniwalova kanamiyami.

Mena vitai-dina Keliso nimane keke-mo'a ginalemada. Au Bana'e ide agaideya Tauna gihawahegena amanadi gifaiwalaveleda-yo vitai-dina moya'aidi agaidiya kafaiwala-mo'a, e tofaiwalahega-mo'a kamimiyami.

Tu iya ganuwanuwa vaita aulolo tagiya tova adamoya kawahiwahina-ma gaitoma kabi'ona. Mena kaiwabu aimo tova mulina Yaubada ginaveleda-yo Bana buye kanakaiwabu-ma gaitoma lakahina, lakahi-mo'ena. Keke adafaiweya aulolo tagiya agaidiya kanahawaluveluveni.

Keliso yana nuwanuwa agaideya lakahina, lakahi-mo'ena keke-mo'a ginahavaini. Gavadi ginalakayemu-yo Keliso nimane ginalemada? Keke, keke tamo. Ka'i vita tulina tulina agaideya ginalakayemu, ka'i ase'u'aulolo o ada kivekoyo kaliva nimadiya, o mafulauga o yada lifi keke, o abagilagi o luve'alika, ka'i mena vitai-dina agaideya hinalakayemu, au keke-mo'a Keliso nimane hinalemada.

Bana Yaubada ide kaliva nuwada gi'itafolena-ma Alu'aluwa Mahalina yana nuwanuwa gihalamanena. Ada Alu'aluwa Mahalina gihalamanena gavaimi Yaubada nuwanuwana ginagugai. Medema fa'ina Alu'aluwa Mahalina giveluvelugada be ve'o'ola toyogina Yaubada yana nuwanuwa amine nuwahinagedeya gi'alaveleveleda.

Gaveyao Yaubada Alu'aluwana hivenovenogalena, medema Bana natuneyao.

Gaveyao dibudi koyona ana nuwanuwa amine hihuluhuluva, medema dibudi koyona ana nuwanuwa againe nuwadi hisena. Atu gaveyao Yaubada Alu'aluwana yana nuwanuwa amine hihuluhuluva, medema Yaubada Alu'aluwana ana nuwanuwa againe nuwadi hisena.

Yaubada Tauna Natuna keke gidanuwaloloneni, au moya'aida fa'ideya alikeya gihawahegena. Natuna gihawahegena fa'ina, kadu makewa abahawahega tulina tulina Bana buye ginaveleda.

Ide Yaubada natuneyao ma taudeyao ka'ayaunena ada Yaubada Alu'aluwana alu'aluwadeya gi'alakakila gigayo, “E, o Yaubada natuna.” Kadu'e ide Yaubada natuneyao fa'ina, aimo gavadi gavadi Yaubada badi natuneyao adi du'u fa'ina gisevehailena, medema kananuhagana, kadu gavadi gavadi Yaubada Keliso ana du'u fa'ina gisevehailena, medema ide Keliso buye kananuhagana. Gavaimi-yo Keliso ana du'u ide Bana buye kananuhagani? Me ka'i ve'umagigi Keliso ginuhagana-ma amine meda ide Bana buye kananuhagana, au kadu ide Bana buye kanakaiwabu.

Fa'ina hai kaliva dibuna koyona ana nuwanuwa againe nuwana gisena, medema Yaubada givenibainena. Dibuna koyona ana nuwanuwa nuwana gi'abina fa'ina, bana Yaubada yana vehimeya keke gida'idibumuhigeni kadu keke anafaiweya gina'idibumuhigeni.

E, ide Yaubada natuneyao Keliso buye kanakaiwabu, ada Yaubada yana aibubuna matatabudi nuwanuwadi lakahina Bana Yaubada badi natuneyao yadi wakikaiwabu gina'ivemogatalidi ada natuneyao adi ivemogatala fa'ina gaitoma moya'aidi i'ibubunidi hibodaboda.

Ide kahalamanena tuwai-lokalokana be hinunauwena tova adamoya gaitoma moya'aidi i'ibubunidi hiyawayawai'ohi, vaita kwamayoku yadi venatuna ana yawai'ohi amine.