Popular Bible Verses from Aroma 6

Share

Nĩ ũndũ mũcaara wa meehia nĩ gĩkuũ no kĩheeo kĩrĩa Ngai aheanaga nĩ muoyo wa tene na tene, thĩinĩ wa Kristũ Jesũ Mwathani witũ.

Inyuĩ-rĩ, mũtiagĩrĩirwo nĩgwathagwo nĩ meehia, nĩ ũndũ rĩu mũtirĩ rungu rwa Watho mũrĩ rungu rwa wega wa Ngai.

Tondũ ũcio, rĩrĩa twabatithirio twathikanĩirio hamwe naake na tũgĩkua hamwe naake, nĩ geetha o ta ũrĩa Kristũ aariũkirio akiuma kũrĩ akuũ nĩ hinya mũnene wa Ithe, o ũguo o na ithuĩ tũtũũrage mũtũũrĩre mwerũ.

O na ningĩ mũtikaarekage ciĩga cianyu ihũthagĩrwo ta indo cia gũtungatĩra meehia. Handũ ha gwĩkaga ũguo-rĩ, mwĩheanageei harĩ Ngai ta andũ mariũkĩĩtio kuuma gĩkuũinĩ, na mũmũrutĩre ciĩga cianyu ituĩke cia kũmũtungatagĩra maũndũinĩ ma ũthingu.

Nĩtũũĩ atĩ ũmũndũ witũ wa tene nĩwambirwo mũtharabainĩ hamwe na Kristũ, nĩ geetha mwĩrĩ wa meehia ũniinwo tũtigacooke gũikara twĩ ngombo cia meehia.

Kwoguo o na inyuĩ mwagĩrĩirwo nĩkwĩyonaga mũkuĩte ũhoroinĩ wa meehia, na mũikarage mũrĩ ngwatanĩro na Ngai mũhotithĩĩtio nĩ Kristũ Jesũ.

Hakĩrĩ ũguo-rĩ, tũkiuge atĩa? Tũtũũre meehiainĩ atĩ nĩguo wega wa Ngai wongerereke? Kũroaga gũtuĩka ũguo! Ithuĩ-rĩ, nĩtwakuire ũhoroinĩ wa meehia! Twakĩhota atĩa gũtũũra o thĩinĩ wamo?

Kaĩ mũtooĩ atĩ mũngĩĩheana kũrĩ mũndũ o wothe mũtuĩke ngombo ciake mũmwathĩkagĩre mũrĩ ngombo ciake; ngombo cia meehia marĩa mareehage gĩkuũ kana ngombo cia wathĩki ũrĩa ũreehage ũthingu?

No rĩĩrĩ, Ngai arogaathwo! Nĩ ũndũ inyuĩ arĩa mwarĩ ngombo cia meehia, rĩu nĩmwathĩkĩire na ngoro yothe ũhoro wa ma ũrĩa mwarutirwo. Inyuĩ-rĩ, nĩmwohorirwo kuuma meehiainĩ mũgĩtuĩka ngombo cia gwĩkaga maũndũ ma ũthingu.