Popular Bible Verses from 1 Pita 4

Share

Môp xêyaa vin lecên tibed wê luu môp vɨhati yang ge vêl. Om xam xêmyaa i vin lec lime vɨhati, ên môp xêyaa vin lecên tɨyi wê ob pɨlepac nipaên wê xomxo vông vô il ge vêl.

Anutu vông xovôên toto vô xam ên nêb xam toto vông yuac ya. Om xam vông yuac i nivɨha ên i ngɨdu xam lime xôn. Xam obêc vông bêge ge od xam ob vông xovôên toto wê Anutu vông vô xam ge vô nôn lec.

Om Anutu obêc vông xovôên vô xomxo ti ên nêb i nêl kɨyang ge od xomxo tige i nêl Anutu kɨyang. Dɨ Anutu obêc vông xovôên vô xomxo ti ên nêb i ngɨdu xomxo xôn ge od xomxo tige i ngɨdu xomxo xôn ya xêkɨzêc wê Anutu vông vô i ge. Xam obêc vông Anutu yuac toto bêge ge od xomxo ob yê yuac wê xam vông ge nivɨha dɨ pɨmil Anutu lec Yesu Kɨlisi lê. Xêkɨzêc hɨxôn xêseac i yêp vô i luta lêc luta. Nôn.

Om xomxo ti obêc vông vɨyin vô xam ên wê xam vông i vin Kɨlisi ge od xam nim i o yoc lêm. Nge, xam pɨmil Anutu lec Kɨlisi lê.

Buc wê susu vɨhati yang obêc tɨyôô ge vô kwabo lec. Om xam viac xam dɨ xovô nivɨha dɨ kɨtaa vô Anutu i tɨyi buc vɨhati.

Xam lige wê a xêgyaa vin lec xam ge, gwêbaga vɨyin yuu myavɨnê levac, tɨyi xocbê ngwax myavɨnê nux xam ge, tulec xam ên nêb ob tɨxuu xam. Om le i lêc yetac ên vɨyin tige lêm, dɨ le i lêc xo dɨ nêl bêga bê vɨyin tige paha ti lêm. Nge, xam kɨlê vɨyin tɨyi xocbê Kɨlisi kɨlê ge, om xam xêmyaa i nivɨha. Ên buc tɨmuên wê Kɨlisi hɨxôn xêseac wê i vông ge obêc lam le seac ge od xam xêmyaa ob vô nivɨha yang.

Xam lime vông vinên ya obêc mɨloc vô xam ge od xam vev ngwax vô he dɨ viac he nivɨha dɨ le i lêc vông hɨxôn nɨlôm yuu lêm.

Xolac nêl bêge, mêgem Anutu obêc tyuc lec ên nêb vɨyin ti i tulec xam ge od xam vông môp nivɨha dɨ vông nɨlôm yuu nimnɨvi i loc vô Anutu. Ên Anutu tung il lec kɨbun ga dɨ viac il nivɨha, dɨ obêc sea kɨyang wê hɨlu vô il ge lêm.

Kɨlisi kɨlê vɨyin lec ninɨvi om xam xovô wê i kɨlê vɨyin ge dɨ tɨmu vô i vɨxa, ên xomxo ti obêc kô myavɨnê lec ninɨvi ge od sea môp nipaên pyap dɨ ob tɨmu vô i tii vac lêm. Mêgem buc vɨhati wê obêc dô kɨbun ga ge, od ob la vac môp wê nɨlô kɨdu i ên nêb i vông ge lêm. Nge, ob vông môp nivɨha vɨhati wê Anutu xovô ên nêb i vông ge.

Om xomxo obêc nêl nipaên lec xam ên wê xam vông i vin Kɨlisi ge od xam xêmyaa i nivɨha, ên Anutu Myakɨlôhô Ngɨbua hɨxôn xêseac wê i vông ge dô hɨxôn xam pyap.