Popular Bible Verses from Filipi ne 2

Share

Táá méé tu cẽè di guu, naka bóòse guu, igaba méé tu cg'áré-cg'arese, naka gatu ka c'ẽe ne, gatu ka cgáése séè. Wèém khóè ba méém táá gam di zi gúù zi cúí zi q'õé guu, igabaga méém c'ẽe ne khóè ne di zi gúù zi gataga q'õé.

Gatu dim tc'ẽe ba méém Jeso Krestem dim khama ii.

Ncẽe xg'ao Nqarim dis iis koe hàna a Gam cgoa cúí ii ba, igabam ko Nqarim cgoa tòóa xg'aesean táá qgóóa qari, kúrúm gas gúù sa. Igabam xg'ao cg'ãa-cg'anasekaguse a qãàm dis téé-q'oo sa séè, a khóèm dis iis koe ábàèa. Eẽm ko khóèan di iian koe sao-xg'aeè kam kò cg'áré-cg'arese, a x'ooan koe ga igaba máàse, xgàus dis x'oos koe ga igaba.

Nqari ba ko gatu koe tséé, tc'ẽe tu kos koe hẽé naka kúrú tu kos koe hẽéthẽé e, qãè-tcaokaguèm gha ka.

Gaas gúùs domkam kò Nqari ba kaisase kaikagu Mea, a ba a wèé zi cg'õè zi ka kaias cg'õè sa máà Mea. Nxãasegam gha wèém qúrù ba Jesom dis cg'õè sa qo̱m̀a máá ka, wèé gúùan nqarikg'ai di hẽé, naka nqõómkg'ai di hẽé, naka nqõóm ka nqãaka hànan hẽéthẽé e. Nxãasega zi gha wèé zi ta̱m zi gataga nxàe, Jeso Kreste ba X'aiga Me e sa ka, Nqarim Xõòm gha x'áàkaguè ka.

Wèé zi gúù zi méé tu kg'ui-kg'uise tamase kana mẽéku tamase kúrú, naka tua gha nxãasega káàn chìbi naka q'ano ii, qãè tu cóá tu Nqarim di tu iise, tshúù caus qhàòs ho̱àra hãas xg'aeku koe. Gane xg'aeku koe méé tu x'áà, nqarikg'ai di tco̱nòan khama ma

Ncàm̀-ncamsa tu tiri tuè, wèé x'aè ka tu kò komsana, ẽer hàna hãa ka cúí tamase, igaba kaisase káà ra a x'aè kaga. Ke méé tu ncẽeska gatu di kgoarasean koe tséé, q'áòan hẽé naka cgùruan hẽéthẽé cgoa.