Popular Bible Verses from HEBRENA 11

Share

Vira ni tin huruŋ gasi kay va ma aŋ ka saa kamma, aŋ wi va namma ka u iriŋgi may aŋ vi kaŋ gasi ana va namma ni na daŋ may. Suu ay jewna gol gasi Lona ni u vira.

Bay vira sana ka gol ii Lona jiviɗi. Kay ndaɗta sa ma min mba eg Lonna vi ki kam ana Lona kaa, nam warak suu ka halamma.

U vira aygi hum ana tlena halaŋŋi min ay ni u boyna vi Lona. Kay tlesuu aygi ka wasi u iriygina minisi ni vama sa ka wam u irimbina.

U vira Abraham hum vun Lona hu li ma nam yamma, nam tuɗ hu mbassa ndaŋga Lona ɦamba a jonara. Nam hin mbas mamba kiyo, tuɗ hu mbas mayra bay nam waɗta. U vira Abraham kak hu mbassa Lona vi vunum kaɗ u namba, ko nammi ŋgayna na. Nam kak hu mbutluɓma u Isaak u Yakob asi ni suu Lona vi vunum u asi ko nam na may na.

U vira Nowa hum vun Lona hu li ma nam dam kay va ma hin li ha fokŋa, ni nam ka wi dla ndaɗta u irim tuɗi lay. Nam hum vun Lona, ceɗ lumba, suɗ tam ki u suu mamma huruɗu. Ni nam kaɓakŋa kay suuna hu duliyara, ni u viimba, Lona mbuɗ golom a sa ma ɗegeena.

U vira Henok miɗ kaɗi, Lona tlam ha kolo egemu, sa fam ka oloɗi. Bay tlam ha kolo tura wanni magaara diki ana Henok ii Lona jiviya.

U vira Abel li ɓivun ma jivina maŋ Lona su ma vi Kainna. Lona di kam ana nammi sa ma ɗegeena ni kay viimba. Lona u tamba di ki jivi kay ɦal mamba. Nam ki miɗi lay ni cecemi Abel ka ɓak tuwa.

U vira Abraham mbuɗ sa ma ndaki a vuɗ goona, basaɗam jak ki ka gin a vuɗ oloɗi, Sara u taɗta lay ni ka ndak a vuɗ goo oloɗi lay. Nam tin hurum ana Lona hin li u va ma nam damma.

Kay ndaɗta Abraham juɓmi zi ma um tini eŋ coco, jivi cocona. Lona ni sa ma ŋga u zira miniɗ ni nam lay.

U vira Moiz wul wulni mbuɗ ki ŋgolla ni ka min ana sa yam a goŋ goora vi mulna Farawnda oloɗi. Moiz min lassa vi suu vi Lona jivi irim su mayra li furira hu cora buu ew daŋga. Nam furi kay ŋgulla vi Kristu irim saɓak su begera Egiptera, nam saa mamba tini kay warak ma fokŋa. U vira Moiz hin ndaŋga Egipte li ndaa ka ko yara vi mulnaraɗi, nam kak u ɗigilla na en, ko nam wi Lona u irim na.

U vira Abraham li ɓivunna u Isaak hu li ma Lona min tukumma. Lona vi vunumi u nam Abraham, ni nam hin dam ana nam li ɓivunna u gorom ma dewna olo.

U vira Rahab, cara gawlaŋga, miɗ ka duk suu ka min a vi Boy Lonanaɗi naɗi, kay ndaɗ vi suu mba gol lina varaɗu.

U vira suu Israelna taɓa mbo Lum ma Cerewna ko ndaŋga eŋga na, suu Egiptena min a li ko asi na may ni mbo lumma tluɓusi halaŋ.

U vira gulumun ma Yerikona bow ki kaŋga ko suu Israelna ŋguy kam buuna kiɗisiyara.

U vira nam gijaŋ li Pak, di ana yam busuna fun ziginina, kay sa sunda huulona ma ci suuna mba ci goryoŋ Israel suu vuɗ jewna kiɗi.

U vira Yosef hu daɓpa vi iiri mamba wanni ɓak kay cukka vi suu Israelna hin cuk ay ki Egiptera, di kay va ma asi hin lam u sokomma olo.

U vira Yakob paɗ vunum ki kay goryoŋ Yosefna jew miɗ mamma. Nam goɓ tam kay tokolo mamba cen Lona.

U vira Isaak paɗ vunum ki kay Yakob u Ezaw a tak ki kay dlaasira hin li ha fokka.