Popular Bible Verses from Ekihsatahs 12

Share

“Mii hsa 'i ahpii tipihkahk, misiwe kaawiih shaaposhkaayaan i'imaa Iicipahkiink (Egypt) ewii nihsakwaa nihtam nehtaawikiwaatc eniniiwiwaatc, aya'aawihshak itahsh kaye. Niwii nana'ahsaak kaye manitoohkaanak eyaawaatc Iicipahkiink. Niin iitok kaaTipenciketc nintinow. I'i hsa miskwi kaakiih shishoonamek, mii hsa 'iwe ke⁠kihkinawaaci'ikoyek aaniinti waahkaa'ikanink eshitaayek. Ahpii tahsh waapantamaan miskwi kika aansweshkawininim, kaawiin itahsh kika pakamishkaakohsiim ke⁠nihshiwanaaci'ikoyek ahpii pahkihte'amaan Iicipahki.

Mii hsa 'owe kaa⁠kiishikahk ke⁠inahkamikisiyek ci⁠wiihkwantiiwahkamikisiyek. Keni ayaanihke nihtaawiki'itiwaatc hsa 'i tani inahkamikisiwak ci⁠wiihkwantiiwahkamikisiwaatc kaaTipencikenitc onci, mii hsa 'owe nehpic iko keshi anami'ehcikenk.”

Ahpii tahsh ocihcihsenik kiniicaanihsiwaak o'o ininekwaa, ‘Wekonen tahsh o'o ke⁠onci ishihcikeyaank ci⁠kanawentamaank o'o wiihkwantiwin?’ Miihsh o'o keshi nahkwehtawekwaa, ‘Mii hsa 'iwe Pimaaci'ikoowi Wiihkwantiwin kaakiih pakitinaahsoohtamawintipan kaaTipenciketc ke⁠onci maamihkawiyek. Aaniihsh okii aansweshkaanan kitaawininaanin kiinawint Isriyalak kaatinowiyank, ahpii kiih⁠pimi ayaakopanen o'omaa Iicipahkiink. Iicip kaatinowinitc iitok wiin kii⁠nihsaakopan, kiinawint tahsh wiin kaawiin kikiih papaamenimikohsiinaan.’ ” Miitahsh Isriyalak kaakii animihkohtaawaatc ekii anami'ehtawaawaatc kaaTipencikenitc.