Popular Bible Verses from ᐅᕒᐆᒪᓇᒃ 8

Share

ᑭᑭᑫᑖᒥᓐ ᑕᔥ ᐋᓃᓂᑯ ᑫᐃᔑᐌᐱᓯᐗᑴᓐ, ᑭᔐᒪᓂᑑ ᒣᑴᔭᐄ ᑭᑕᓄᑳᑕᒫᑯᓈᓐ ᑫᔑᒥᓄᔮᐸᒋᐃᑯᔭᕽ, ᑮᓇᐎᓐᑦ ᓴ ᑳᑮᐊᑐᒥᓇᕽ ᓃᔮᒃ ᑳᑮᐃᔑᐅᓀᑕᒧᑯᐸᓀᓐ᙮

ᐗᐐᑫ ᐋᓃᔥ ᓂᑫᒋᓈᐁᑖᓐ: ᑳᐐᓐ ᑫᑰᓐ ᑭᑖᐸᑫᐎᓂᑯᓰᒥᓐ ᒋᐐᒌᐎᑯᓯᐗᕽ X ᑳᐃᔑᔕᐌᓂᒥᓇᕽ᙮ ᑳᐐᓐ ᓂᐳᐎᓐ ᑖᐃᔑᒋᑫᒪᑲᓯᓅᓐ, ᑳᐐᓐ ᑲᔦ ᐱᒫᑎᓯᐎᓐ, ᑳᐐᓐ ᑲᔦ ᐁᒐᓬᐊᒃ, ᐃᔥᐱᒥᕽ ᑲᔦ ᑳᑕᔑᑎᐯᒋᑫᐙᒡ, ᑳᑕᔑᒪᔥᑲᐌᑖᑯᓯᐙᒡ ᑲᔦ, ᑳᐐᓐ ᑖᑲᔥᑭᒋᑫᓰᐗᒃ᙮ ᑳᐐᓐ ᑲᔦ ᓅᑯᒻ ᑳᐱ ᐃᔑᓭᒃ, ᓃᑳᓇᔭᐄ ᑲᔦ ᑖᐃᔑᒋᑫᒪᑲᓯᓅᓐ᙮ ᑳᐐᓐ ᑕᔥ ᑲᔦ ᐃᔥᐱᒥᕽ ᑳᐊᔮᑭᓐ, ᐌᑎ ᑲᔦ ᓃᓴᔭᐄ ᑳᐃᔑᐊᔮᑭᓐ, ᑳᑕᓯᑭᓐ ᐃᑯ ᑲᔦ ᐋᑎ ᓴ ᑯ ᑳᐅᔑᒋᑳᑌᑭᓐ᙮ ᑳᐐᓐ ᑲᓇᑫ ᐐᑳ ᑫᑰᓐ ᑭᑖᐸᑫᐎᓂᑯᓰᒥᓐ ᐁᑳ ᒋᐐᒌᐎᑯᓯᐗᕽ ᑭᔐᒪᓂᑑ ᐅᔕᐌᓂᒥᐌᐎᓐ ᐃᐃᒫ ᑳᐅᒋᒦᓂᑰᔭᕽ X ᒋᓴᔅ ᑳᑎᐯᓂᒥᓇᕽ᙮

ᒦᑕᔥ ᐯᔑᑾᓐ ᐊᐊᐌ ᐊᒑᒃ ᑭᑲᐱᓈᑕᒫᑯᓈᓐ ᑳᐃᔑᓃᓇᒥᓯᔭᕽ᙮ ᑳᐐᓐ ᐋᓃᔥ ᑾᔭᒃ ᑭᑭᑫᑕᓰᒥᓐ ᐋᓃᓐ ᑫᔑᐊᓇᒥᐋᔭᕽ᙮ ᑎᐱᓇᐌ ᑕᔥ ᐊᐊ ᐊᒑᒃ ᑭᑲᓅᒋᑫᑕᒫᑯᓈᓐ ᐁᐸᑯᓭᓂᒫᒡ ᑭᔐᒪᓂᑑᓐ᙮ ᐃᐃ ᐁᐃᔑᒨᑯᓀᒧᒡ ᑳᐐᓐ ᑖᑲᔥᑭᒋᑳᑌᓯᓂᓂ ᒋᐐᒋᑳᑌᓂᒃ᙮

ᐋᔕ ᐅᓄᐌᓂᐗᓐ ᐁᑭᑫᑕᒪᕽ, ᒦ ᐅᐌ ᑫᐃᑭᑐᔭᕽ: ᑭᔐᒪᓂᑑ ᐃᔑᐐᒋᐃᓇᕽ, ᐊᐌᓀᓐ ᑫᔖᑰᒋᐃᓇᑭᐸᓐ? ᑳᐐᓐ ᐊᐎᔭ!

ᒦᑕᔥ ᐅᑯᐌᓂᐗᒃ ᑳᑭᑭᐱᒫᑎᓯᐙᒡ ᒋᓴᔅ Xᑕᓐ ᑳᐐᓐ ᑭᔐᒪᓂᑑᓐ ᐅᑲᐃᑯᓰᐙᓐ: ᑭᑲᓂᔑᐗᓈᑎᓯᒻ᙮

ᐊᐎᔭ ᐃᔑᐅᓈᑲᑕᐌᒋᑲᓂᒡ ᐃᐃ ᑫᑌᐃᓈᑎᓯᐎᓐ ᑳᐃᔑᐊᔮᒪᑲᒃ, ᒦᔥ ᐃᐃᐌ ᐱᒌᓇᒃ ᒋᓂᐳᐎᓂᐗᕽ᙮ ᐊᐎᔭ ᑕᔥ ᑳᐃᔑᐅᓈᑲᑕᐌᒋᑲᓂᒡ ᑭᔐᒪᓂᑑᓐ ᐅᑕᒑᑯᓂ ᑳᐃᔑᐊᑕᐌᑕᒥᓂᒡ, ᒦ ᐃᒫ ᑕᐅᒌᒪᑲᓐ ᐱᒫᑎᓯᐎᓐ, ᐱᓵᑌᑕᒧᐎᓐ ᑲᔦ᙮

ᐅᓄ ᑕᔥ ᑲᑭᓇ ᐋᓇᐃᔑᐌᐱᓯᔭᕽ, ᔖᑰᒡ ᐗᐐᑫ ᑭᑑᒋᐸᑭᓈᑫᒥᓐ ᐐᓐ ᐅᒋ ᐁᐐᒋᐃᓇᕽ ᑳᑮᔕᐌᓂᒥᓇᕽ᙮

ᓂᑎᓀᑕᒻ ᐃᑕᔥ ᐅᐅᐌ ᓅᑯᒻ ᑳᐃᔑᑲᒀᑕᑭᑑᔭᕽ, ᐗᐐᑫ ᑕᐸᑳᓀᑖᑾᓐ ᐃᐃᐌ ᑫᐃᔑᓭᒃ ᑭᒋ ᐃᓀᑖᑯᓯᐎᓐ ᑭᔐᒪᓂᑑ ᑫᓈᑯᑕᒪᐎᓇᕽ᙮

ᑫᑰᓐ ᐃᓇ ᑭᑖᐸᑫᐎᓂᑯᒥᓐ ᐁᑳ ᒋᐐᒌᐎᑯᓯᐗᕽ X ᑳᔑᔕᐌᓂᒥᓇᕽ? ᑮᔥᐱᓐ ᐗᓯᑖᐎᓭᔭᕽ, ᐅᒑᓂᒥᓭᔭᕽ, ᑮᔥᐱᓐ ᑲᒀᑕᑭᐃᓇᕽ ᐊᐎᔭ, ᑮᔥᐱᓐ ᐁᑳ ᐅᒦᒋᒥᒥᓯᐗᕽ, ᓅᑌᑯᓇᔦᔭᕽ ᑲᔦ, ᓇᓃᓵᓂᓯᔭᕽ ᑲᔦ, ᐊᐴᔥᑫ ᑲᔦ ᓂᓯᑰᔭᕽ, ᒦ ᓇ ᐃ ᐁᔑᓈᑾᓂᓂᒃ ᒋᒥᒋᒥᓂᑯᓯᐗᕽ ᑳᐃᔑᔕᐌᓂᒥᓇᕽ? ᑳᐐᓐ!

ᐊᐊ ᑕᔥ ᑭᔐᒪᓂᑑ ᑳᑭᑫᓂᒫᒡ ᐁᔑᓈᓈᑲᑕᐌᒋᑫᓂᒡ ᐃᐃ ᐯᒫᑎᓯᓂᒡ, ᐅᑭᑫᓂᒫᓐ ᑲᔦ ᐃᓂ ᑎᐱᓇᐌ ᐅᑕᒑᑾᓐ ᐋᓃᓐ ᐁᓀᑕᒥᓂᒡ᙮ ᐋᓃᔥ ᐊᐊ ᐊᒑᒃ ᐅᑲᓅᒋᑫᑕᒪᐙᐞ ᑭᔐᒪᓂᑑᓐ ᐅᐱᒫᑎᓰᒪᐞ, ᒪᔮ ᐁᐸᑯᓭᓂᒫᒡ ᐁᔑᐊᑕᐌᑕᒥᓂᒡ ᑭᔐᒪᓂᑑᓐ᙮

ᐋᓃᔥ ᒦᐗᒃ ᐃᑭᐌᓂᐗᒃ ᑭᔐᒪᓂᑑ ᐅᑯᓯᓴᐞ, ᑳᐱᒥᓂᔕᐙᐙᒡ ᑭᔐᒪᓂᑑᓐ ᐅᑕᒑᑯᓂ ᐋᓃᓐ ᐁᑯᐙᒡ᙮

ᐃᑭᐌᓂᐗᒃ ᐃᑕᔥ ᑳᓂᐊᔨᑎᐙᒡ ᐁᔑᐊᔮᒪᑲᒃ ᐃᐃ ᑫᑌᐃᓈᑎᓯᐎᓐ, ᒦ ᐁᑕ ᐃ ᐁᔑᓈᑾᓂᓂᒃ ᐅᓈᓈᑲᑕᐌᑕᒧᐎᓂᐙ ᑳᐃᔑᐊᑕᐌᑕᒨᒪᑲᓂᓂᒃ ᐃᐃ ᑫᑌᐃᓈᑎᓯᐎᓐ᙮ ᐃᑭᐌᓂᐗᒃ ᐃᑕᔥ ᐐᓐ ᑳᐄᔑᐱᒫᑎᓯᐙᒡ ᑭᔐᒪᓂᑑ ᐅᑕᒑᑾᓐ ᑳᐃᑯᐙᒡ, ᒦ ᑲᔦ ᐐᓇᐙ ᐁᔑᓈᑾᓂᓂᒃ ᐅᓈᑲᑕᐌᑕᒧᐎᓂᐙ ᑳᔑᐊᑕᐌᑕᒥᓂᒡ ᐃᓂ ᐊᒑᑾᓐ᙮

ᑭᔐᒪᓂᑑ ᑳᐐᓐ ᐊᐴᔥᑫ ᐅᑮᒪᓈᒋᐋᓰᓐ ᑎᐱᓇᐌ ᐃᓂ ᐅᑯᓯᓴᓐ, ᐁᑮᐸᑭᑎᓈᒡ ᐃᑕᔥ, ᑮᓇᐎᓐᑦ ᐁᑮᐃᔑᒋᑫᑕᒪᐎᓇᕽ᙮ ᑕᑯ ᑲᔦ ᑌᐺ ᑭᑲᔑᔕᐌᓂᒥᑯᓈᓐ ᑲᑭᓇ ᑫᑰᓐ ᒋᒦᓂᓇᕽ᙮

ᐃᓂ ᐋᓃᔥ ᑭᔐᒪᓂᑑ ᐅᑕᒑᑾᓐ ᐅᐐᒋᑮᔗᒫᐞ ᑭᑕᒑᑯᓈᓂᐞ, ᑌᐺ ᑭᔐᒪᓂᑑ ᐁᐅᓃᒑᓂᓯᒥᓇᕽ ᐁᐃᓂᓇᕽ᙮ ᒦᔥ ᐃᐃ ᑌᐺ ᐋᔕ ᐁᐅᓃᒑᓂᓯᒥᓇᕽ, ᑭᑲᒦᓂᑰᒥᓐ ᒋᑎᐱᓇᐌᐎᓯᐗᕽ ᐃᓂ ᑫᑰᓇᓐ ᑭᔐᒪᓂᑑ ᐙᐃᔑᔕᐌᓂᒫᒡ ᐅᐱᒫᑎᓰᒪᐞ, ᑲᔦ ᑭᑲᑕᑯᒦᓂᑰᒥᓐ ᑲᔦ ᐐᓐ X ᐙᐃᔑᒦᓂᑯᒡ ᑭᔐᒪᓂᑑᓐ᙮ ᑮᔥᐱᓐ ᐋᓃᔥ ᐅᒋᐐᒌᐗᕽ X ᐅᑲᒀᑕᑭᐃᑰᐎᓂᕽ, ᑭᑲᑕᔑᐐᒌᐙᓈᓐ ᑲᔦ ᐅᑭᒋ ᐃᓀᑖᑯᓯᐎᓂᕽ ᑳᐐᒦᓂᓐᒡ᙮

ᑮᔥᐱᓐ ᐁᑕ ᐊᐎᔭ ᐃᔑᓈᑲᑕᐌᑕᕽ ᐁᔑᓈᓈᑲᑕᐌᑕᒨᒪᑲᓂᓂᒃ ᐃᐃ ᑫᑌᐃᓈᑎᓯᐎᓐ, ᐅᑲᔒᑫᓂᒫᓐ ᐃᓂ ᑭᔐᒪᓂᑑᓐ᙮ ᑳᐐᓐ ᐃᐃᐌ ᐅᑲᑑᑕᓰᓐ ᑭᔐᒪᓂᑑᓐ ᐅᑎᓈᑯᓂᑫᐎᓂᓂ ᑳᐃᑯᒡ, ᑳᐐᓐ ᐅᑖᑲᔥᑭᑑᓰᓐ ᐃᐃ ᒋᐃᔑᒋᑫᒡ᙮

ᑲᑭᓇ ᑫᑰᓐ ᑳᐅᔑᒋᑳᑌᒃ ᐋᑯᐲᐆᒪᑲᓐ ᒋᐅᒋᒋᓭᒃ ᐃᐃ ᐊᐲ ᑭᔐᒪᓂᑑ ᑫᓈᑯᐋᒡ ᑲᑭᓇ ᐅᑯᓯᓴᐞ᙮

ᑭᑭᑫᑖᒥᓐ ᑕᔥ ᑲᑭᓇ ᑳᐅᔑᒋᑳᑌᒃ ᐁᒨᒀᐱᓀᒪᑲᒃ ᑖᐱᔥᑰ ᐃᑴ ᑳᐃᔑᒨᒀᐱᓀᒡ ᐁᐐᓂᑖᐎᑭᓈᐗᓱᒡ᙮