Popular Bible Verses from ᑑᑕᕒᐋᓇᒦ 8

Share

ᑭᑲ ᒫᒥᑲᐎᒻ ᐃᑕᔥ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᐐᓐ ᐄᑐᒃ ᑳᒦᓂᓀᒃ ᒪᔥᑲᐎᓰᐎᓐ ᑫᐅᒋ ᐌᓅᑎᓯᔦᒃ᙮ ᒦᑕᔥ ᐌᒋ ᐃᔑᒋᑫᒡ ᐁᐐ ᓈᑯᑑᒡ ᑳᑮ ᐅᔑᑑᒡ ᐊᔓᑕᒫᑫᐎᓐ ᑳᑮ ᐋᔩᒋ ᐊᔓᑕᒪᐙᑯᐸᓀᓐ ᑭᑫᑌᔭᐋᒥᐙᐸᓃᐞ, ᑖᐱᔥᑰ ᓅᑯᒻ ᑳᑮᔑᑲᒃ ᑳᐃᔑᓈᑾᒃ᙮

ᒦᑕᔥ ᑳᑮ ᑑᑕᐎᓀᒃ ᒋᑕᐸᓭᓂᑎᓱᔦᒃ, ᑭᑮ ᐸᑭᑎᓂᑯᐙ ᑲᔦ ᒋᓅᑌᔅᑲᑌᔦᒃ, ᒣᓇᐗᓐ manna ᑕᔥ ᑭᑮ ᐊᔕᒥᑯᐙ ᑳᑮ ᑭᑫᓂᒥᒫᓯᐌᒃ, ᑭᑌᑌᐙᒃ ᑲᔦ ᑳᑮ ᑭᑫᓂᒫᓯᒀ᙮ ᒋᑭᑫᑕᒧᐌᒃ ᐃᑕᔥ ᑳᑮ ᐅᒋ ᑑᑕᐎᓀᒃ ᐊᐎᔭ ᓴ ᐁᑕ ᐸᑴᔑᑲᓂᕽ ᐁᐅᒋ ᐱᒫᑎᓯᓯᒃ, ᐱᑯ ᑕᔥ ᐁᐅᒋ ᐱᒫᑎᓯᒡ ᑲᑭᓇ ᑫᑰᓐ ᐁᑭᑐᓂᒡ ᑳᑎᐯᒋᑫᓂᒡ᙮

ᒫᒥᑲᐎᒃ ᐃᑕᔥ ᑳᑎᐯᒋᑫᒡ ᑭᑭᔐᒪᓂᑑᒥᐙ ᐋᓃᓐ ᒥᓯᐌ ᑳᐲᐃᔑᐎᓂᓀᒃ ᐱᑾᑕᑲᒥᒃ ᐅᓄ ᓃᒥᑕᓇ 40 ᑕᓱ ᐱᐴᓐ᙮ ᑭᑮ ᑲᑴᒋᐃᑯᐙ ᓴ ᒋᑕᐸᓭᓂᒧᐌᒃ, ᒋᑭᑫᑕᕽ ᑲᔦ ᑭᑌᐃᐙᕽ ᑕᑲ ᒋᐐ ᑲᓇᐌᑕᒧᐌᑴᓐ ᐁᓈᑯᓂᑫᒡ, ᑯᒫ ᑲᔦ ᐙᑲᓇᐌᑕᒨᐙᓯᐌᑴᓐ᙮

ᒫᑭᔖ ᐋᓃᔥ ᐅᐅ ᑭᑖ ᐃᑭᑐᒻ, ᓃᓇᐎᓐᑦ ᓴ ᑯ ᓂᒪᔥᑲᐎᓰᐎᓂᓈᓂᕽ, ᐁᔑ ᒪᔥᑲᐎᓂᑫᓂᔮᕽ ᑲᔦ ᓂᑑᒋ ᑲᔥᑭᑕᒫᓱᒥᓐ ᐅᐅ ᑳᔑ ᐌᓅᑎᓯᔮᕽ, ᑭᑖᐃᑭᑐᒻ᙮

ᐊᔮᒀᒥᓯᒃ ᐃᑕᔥ ᑫᒋᓈᒡ ᒋᐗᓃᑫᓄᑕᐙᓯᐌᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᒋᒪᓈ ᐗᓃᑫᔦᒃ ᑲᔦ ᒋᑲᓇᐌᑕᒧᐌᒃ ᐅᑎᓈᑯᓂᑫᐎᓇᓐ, ᐅᑕᓇᒥᐁᒋᑫᐎᓇᓐ, ᐅᑎᑭᑐᐎᓇᓐ ᑲᔦ ᓅᑯᒻ ᑳᑮᔑᑲᒃ ᑳᐐᑕᒪᐎᓇᑰᒃ᙮

ᑭᑌᐃᐙᕽ ᓴ ᐃᔑ ᑭᑫᑕᒧᒃ ᑖᐱᔥᑰ ᐃᓂᓂ ᑳᔑ ᒫᒦᓄᒫᒡ ᐅᑯᓯᓴᓐ, ᒦ ᓴ ᐯᔑᑾᓐ ᑳᑎᐯᒋᑫᒡ ᑭᑭᔐᒪᓂᑑᒥᐙ ᐁᑑᑕᐎᓀᒃ᙮

ᐊᐲ ᑕᔥ ᑮᐐᓯᓂᓀᒃ, ᑮᑌ ᐃᓇᒪᒋᐅᔦᒃ ᐃᑕᔥ, ᒦ ᓴ ᐃ ᒦᑴᒡ ᒋᐃᓀᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᐃᐃ ᐅᒋ ᐊᑮᓂ ᐌᓂᔑᔑᓂᓂᒃ ᑳᑮ ᒦᓂᓀᒃ᙮

ᒦᑕᔥ ᒋᑲᓇᐌᑕᒧᐌᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᐅᑎᓈᑯᓂᑫᐎᓇᓐ, ᒋᐃᔑ ᐱᒧᓭᐌᒃ ᑲᔦ ᐁᔑᑣᒡ ᒋᑕᑯ ᑯᑖᓀᓂᒣᒃ᙮

ᐌᑎ ᓴ ᐱᑾᑕᑲᒥᑯᕽ ᒣᓇᐗᓐ manna ᑭᑮ ᐊᔕᒥᑯᐙ ᑭᑌᑌᐙᐸᓃᒃ ᐐᑳ ᑳᑮ ᐊᒸᓯᒀ᙮ ᒦᑕᔥ ᑳᑮ ᐅᒋ ᑑᑕᐎᓀᒃ ᒋᑕᐸᓭᓂᒧᔦᒃ, ᑳᑮ ᐅᒋ ᑲᑴᒋᐃᓀᒃ ᑲᔦ, ᑮᓇᐙ ᓴ ᐱᑯ ᒋᐅᒋ ᒥᓄᓭᔦᒃ᙮

ᐊᔮᒀᒥᓯᒃ ᑲᔦ ᐊᐲ ᑮᑌᐐᓯᓂᔦᒃ, ᑮᐃᔥᒀ ᐅᔑᑑᔦᒃ ᐃᑕᔥ ᐙᑳᐃᑲᓇᓐ, ᑖᓄᑕᒣᒃ ᑲᔦ, ᐊᐲ ᑲᔦ ᑭᐱᔑᑮᒥᐙᒃ, ᑭᒫᓇᒑᓂᔑᒥᐙᒃ ᑲᔦ ᐊᓂ ᐹᑏᓄᐙᒡ, ᐙᐹᐱᑯ ᔔᓂᔮ ᐙᐱᒃ, ᐅᓵᐎ ᔔᓂᔮ ᐙᐱᒃ ᐊᓂ ᐹᑏᓄᒡ, ᑲᑭᓇ ᑲᔦ ᑫᑰᓐ ᐁᔮᔦᒃ ᐊᓂ ᐹᑏᓇᑑᔦᒃ, ᑭᑌᐃᐙᕽ ᐃᑕᔥ ᐊᓂ ᐃᔑ ᑭᒋ ᐃᓀᓂᑎᓱᔦᒃ, ᒦ ᓴ ᐃ ᒋᐗᓃᑫᓄᑕᐌᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᐄᒋᐸᑮᕽ Egypt ᑳᑮ ᐱᐅᒋ ᓵᑭᒋᐎᓂᓀᒃ, ᑳᑮ ᐃᔑ ᑲᒀᑕᑭ ᒥᑕᓄᑮᐃᑰᔦᑭᐸᓐ᙮

ᑳᑎᐯᒋᑫᒡ ᑭᑭᔐᒪᓂᑑᒥᐙ ᐋᓃᔥ ᑭᐐ ᐃᔑᐎᓂᑯᐙ ᐁᔑ ᐅᓂᔑᔑᓂᓂᒃ ᐊᑮᕽ᙮ ᐌᓅᑕᓅᓐ ᓴ ᓰᐲᓴᓐ, ᒨᑭᒋᐗᓂᐲᓐ, ᒥᓯᐌ ᐱᑯ ᓂᐱ ᐁᐊᔨᔑᒋᐗᕽ ᐁᔑ ᐸᐸᓴᑎᓈᒃ, ᐁᔑ ᐸᐲᑾᑎᓈᒃ ᑲᔦ᙮ ᒦ ᓴ ᐃᐌ ᐊᑮᕽ ᐁᔮᒃ ᐸᑴᔑᑲᓂᐎ ᑭᑎᑳᓀᓴᓐ, ᐸᕒᓬᐄ barley ᑲᔦ ᑎᓄ ᒪᓅᒥᓐ᙮ ᔔᒥᓈᑎᑰᒃ, ᐱᒃ fig ᑲᔦ ᑎᓄᐙᑎᑰᒃ, ᔒᐎᒦᒋᒥᐙᑎᑰᒃ ᑲᔦ ᐃᐃᒫ ᐊᔮᐗᒃ᙮ ᐊᔮ ᑲᔦᐃᒫ ᐋᓬᐃᑉ ᐱᒥᑌ, ᐋᒨᐎ ᓰᓯᐹᑾᑦ ᑲᔦ᙮ ᐃᐃᒫ ᑕᔥ ᐊᑮᕽ ᑳᐐᓐ ᐐᑳ ᒦᒋᒻ ᑕᑸᓇᐌᑖᑾᓯᓅᓐ, ᑳᐐᓐ ᑲᔦ ᑫᑰᓐ ᑭᑲ ᓅᑌᓭᓰᒻ᙮ ᒦ ᓴ ᐃᐌ ᑲᔦ ᐊᓯᓃᒃ ᐁᔑ ᐲᐙᐱᑯᐎᐙᒡ, ᐁᔑ ᐸᐲᑾᑎᓈᒃ ᑲᔦ ᐅᓵᐙᐱᒃ ᑭᑲ ᐅᑖᓂᑳᑖᒻ᙮

ᐌᐌᓂ ᑕᔥ ᐃᔑᒋᑫᒃ ᒋᐱᒥᓂᔕᐊᒣᒃ ᑲᑭᓇ ᐃᓈᑯᓂᑫᐎᓇᓐ ᑳᒦᓂᓇᑰᒃ ᓅᑯᒻ ᑳᑮᔑᑲᒃ ᒋᐱᒫᑎᓯᔦᒃ ᐃᑕᔥ, ᒋᐊᓂ ᐹᑏᓄᔦᒃ ᑲᔦ᙮ ᒦᑕᔥ ᑲᔦ ᒋᐲᑎᑫᔥᑳᔦᒃ ᐃᐃ ᐊᑭ ᒋᑎᐱᓇᐌᐎᓯᔦᒃ ᑳᑎᐯᒋᑫᒡ ᑳᑮ ᐋᔩᒋ ᐊᔓᑕᒪᐙᑯᐸᓀᓐ ᑭᑫᑌᔭᐋᒥᐙᐸᓃᐞ᙮

ᑳᐐᓐ ᓴ ᑭᓅᑌᔥᑲᓰᒻ ᑭᑭᑭᔥᑭᑲᓂᐙᓐ, ᑳᐐᓐ ᑲᔦ ᑭᑮ ᐸᐹᑭᓯᑌᓰᒻ ᓃᒥᑕᓇ 40 ᑕᓱ ᐱᐴᓐ ᒥᓂᒃ᙮

ᐐᓐ ᐄᑐᒃ ᑳᑮ ᔖᐳᐎᓂᓀᒃ ᐃᐃᒫ ᐱᑾᑕᑲᒥᒃ ᑳᑮ ᐃᔑ ᑭᒋ ᓇᓃᓵᓀᑖᑾᓂᓂᒃ, ᐐᑫ ᑳᑮ ᐃᔑ ᐹᑯᑲᒥᑳᓂᒃ, ᐊᐙᒡ ᑲᔦ ᐁᓂᐲᑳᓯᓂᓂᒃ᙮ ᐁᔑ ᐊᔮᓂᒡ ᑲᔦ ᑳᒌᓱᐌᓂᒡ ᑭᓀᐱᑰᐞ, ᒪᓂᒎᔕᐞ ᑲᔦ ᑳᒌᓱᐌᓂᒡ᙮ ᓂᐲᓂ ᓴ ᑭᑮ ᐅᒋ ᐲᑕᒫᑯᐙ ᒪᔥᑲᐗᓯᓃᕽ᙮