Popular Bible Verses from ROMANS 8

Share

Diyin God ayóó'ádayó'níinii t'áá bí yinahaz'áanii bik'ehgo yíká ádííniidígíí bich'į' áhooníłígíí t'áá ałtso bá yá'át'éeh dooleełgo ahindaalnish áyósingo nihił béédahózin.

Háálá t'áadoo shił naaki nilíní shił bééhoozingo ts'ídá t'áadoo Diyin God yits'á nihóníłí da, aniné nidi doo yíneel'ą́ą da, iiná nidi dooda, diyingo nidaal'a'í nidi dooda, bídahólníihii nidi dooda, bee adziilii nidi dooda, k'ad dahólóonii nidi dooda, dahodooleełii nidi dooda, dego ahool'áhígíí índa yaago ahool'áhígíi nidi dooda, t'áadoo le'é ádaalyaii nidi t'áá ałtso, Diyin God yee ayóó'ánihó'níinii Christ Jesus nihiBóhólníihii bee hólóonii yits'ánihidooniłgi doo yídaneel'ą́ą da.

T'áá ákót'éego ałdó' doo danihidziilígíí éí Níłch'i Diyinii nihíká análwo'. Háálá át'éegi sodidiilzįįłígíí áádóó bíká sodidiilzįįłígíí doo nihił béédahózingóó saad bee hadiidzihígíí nihee ádingo Níłch'i Diyinii t'áá bí t'áá íiyisí di'níigo nihá ná'ookąąh.

Kódaat'éhígíí bąą ha'át'íishą' dadidii'niił áko? Diyin God nihich'ijí nilį́įgo t'áadoo nihik'eshdódle'í da.

Éí bąą k'ad Christ Jesus bił łá'í dajílíinii ts'ídá t'áadoo bee há nidahót'áłí da. Éí doo ts'ísee k'ehgo áhwiinidzinii bik'ehgo dajíkáah da, nidi Níłch'i Diyinii bik'ehgo dajíkááh.

Jó, ts'ísee k'ehgo nidzinii éí aniné nináhádleeh, nidi Níłch'i k'ehgo nidzinii éí iiná índa ach'į' hózhǫ́ nináhádleeh.

Dooda lą́ą! Jó, Christ ayóó'ánihó'níinii bee ak'eh hididleehii biláahdi ádaniit'éego át'é!

Díí k'ad hoolzhishígíí biyi' bik'ee ti'dahwii'níihii Christ yee ayóó át'éii yee ił hóshóonii nihich'į' yit'íní íidoolíłígíí t'óó bił ahąąh nidoo'niłgi nidi doo yą́ą́h nilį́į da nisin.

Ákoshą', háí Christ ayóó'ánihó'nínígíí yits'ánihidoonił? Da' ach'į' nahwii'náásh? Da' tsístł'ah hazt'i'ísh, da' atí'él'į́į́sh, da' dichinísh, da' té'é'į́į́sh, da' náhádzidísh, da' diltłish bee nihi'diisyį́įgoósh?

Diyin God éí diné bijéí haisíidii éí Níłch'i Diyinii íinízinii bił bééhózin, háálá Níłch'i Diyinii éí Diyin God íinízinii bik'ehgo bidiyį́į́' yá ná'ookąąh.

Jó, t'áá ádzíłtso Diyin God biNíłch'i Diyinii hoo'ishii éí Diyin God ba'áłchíní dajílį́.

Háálá ts'ísee k'ehgo áhwiinidzinii yik'ehgo dahináanii éí ts'ísee k'ehgo áhwiinidzinii bíni' danilį́, nidi Níłch'i Diyinii íinízinii yik'ehgo dahináanii éí Níłch'i Diyinii t'éiyá bíni' danilį́.

Diyin God t'áá bí biYe' doo ánéísįįdgóó t'áá áníiltso nihá ninéidiní'ą́, da' doósh éí t'áá bił t'áá ałtsoní t'áá jíík'e nihaa yiiníił da doo?

Nihijéí tł'áahdi Níłch'i Diyinii t'áá bí nihiníłch'i ííłní, Diyin God ba'áłchíní danohłį́. Áko ba'áłchíní daniidlį́įgo, ba'áłchíní yá dah yooléełii nihíí' dadooleeł, éí Christ bił ałts'ą́ą́' da'niilk'iiz doo. Christ bił ti'dahwii'nííh ládą́ą́' yee ayóó át'éii bił ałts'ą́ą́' da'niilk'iiz doo.

Háálá ts'ísee k'ehgo nidzinii éí Diyin God ye'ana'í nilį́; éí Diyin God yee has'áanii doo yíhółníih da, t'áá aaníí doo óone' át'ée da.

Háálá Diyin God ádayiilaii t'áá ałtso Diyin God ba'áłchíní yit'íní íidoolíiłgi t'áá íiyisí nidayólíigo yiba' ádaat'é.

Jó, ádaalyaii t'áá át'é díí jį́įjį' ił hodiniih yik'ee nidadi'ni'go nihił béédahózin.