Popular Bible Verses from Esaya 60

Share

Ima iwe Sioni, akubengeshima nga kasuba pantu nalwisa ulubuuto lobe, ubucindami bwakwa Yawe bulebengeshimina pali iwe.

Imishobo ya benafyalo ikaileta ku lubuuto lobe, ne shamfumu nasho shikaileta ku kubengeshima kwa lubuuto lobe ulukaba nga kasuba akaletula.

Pantu mona imfifi ikafimba pano isonde, ne kumbi ilyafiitisha likafimba abantu bonse, lelo iwe ulubuuto lwakwa Yawe lukalakubengeshimina, Yawe umucindami iwe eukalaba nobe, no bukata bwakwe bukaba pali iwe.

Nangu ulupwa lobe ulwaba ulwacepeshapo kabili ulwafyefye, awe nalo lwine lukaba umushobo wa bantu uukulu kabili uwamaka. Ifi fintu ine nkaficita bwangu inshita iilingile nga yafika, nine ne Yawe nalanda.

Te kasuba kakalakusanikilako ilyo bukalaca iyoo, te mweshi ukalakusanikilako ilyo bukalaila iyoo. Ala ni Yawe umwine akalakusanikilako pe na pe, ni Lesa umucindami, eukaba ulubuuto lobe.

Akasuba kakulamubalikilafye lyonse ukwabula ukuwa, no mweshi wakulabalika ukwabula ukufimbwapo. Kabili Yawe akalaba ulubuuto lobe pe na pe, elyo inshiku shakulilishikamo shikapwa.

Iwe wakulati nga walolesha, awe tepakutemwa, wakulabilimafye ku nsansa. Ifyuma fya mishobo ya benafyalo niwe fyakulalungama, ifyuma fyabo filya bapisha pali bemba fikesa kuli iwe.

Sansula amenso, lolesha konse konse, umone. Abantu bobe bonse nabalongana pakuti baleisa uko uli. Bamwano abaume bakulatula ukutali, bamwano abanakashi bakulaisa nabasendwa pa maboko nga bana.

Abantu bobe bakalabafye bonse abololoke, bakalakwata ne calo pe. Nine nabashimpamo, nine nababumba, pakuti baleebako na bambi ifyo ine napuulama.

Icongo cabuluku tacakaleumfwika nakabili mu calo cobe, ubonaushi tabwakaponene nakabili icalo cobe iyoo. Yawe akalakulinda no kulakucingililako nge linga, ukalamulumbanya pa mulandu wakukupusushako.

Inshiku shonse impongolo shobe shikalaba ishaisuka, akasuba no bushiku tashakesalwe, epakuti mishobo ya benafyalo bakaleleta ifyuma fyaiko, ne shamfumu shabo eshikalatangilila mukukucindika.

Ingamila shakulaisa imilongo, imisepela ya ngamila ukutula ku calo ca Midiani ne ca Efah. Shakulatula ku Sheba pakukuletela golide no bubani. Abantu bakalalumbilisha Yawe pafyo akucitila.

Abenafyalo bakabuukulula amalinga yobe, ne shamfumu shabo shikalakubombela. Nangu ine nakulimwine cipyu cipyu, awe nomba lino lyena nakulakukwatila icikuuku, kabili nakulakulangulukilako.

Nangu abantu bakusuulile no kukupata icakuti takwali no walepita mu calo cobe, ine nkakucindamika umuyayaya, inkulo ne nkulo shikalasekelela muli iwe.

Iwe ukalaonka ibele lya mishobo ya benafyalo pamo ne shamfumu shaiko, nga filya fine nacifyashi asungilila mwane. Elyo ukashininkisha ukuti nine ne Yawe nakupususha, nine ne Lesa ne Mpalume yakwa Yakobo nakulubula.