To bairi Festo Jerusalén'pʉre jicã semana netobʉjaroacã ani, ca-tunucoajupʉ Cesareapʉ. Cʉ̃ ca-ejarica rʉmʉ bero macá rʉmʉ majuu ʉpaʉ camajare dije caroorije cʉ̃ cá-átajere jeniña bejerica arʉapʉ cá-aájupʉ. Topʉ ejaʉ Pablore cʉ̃ cá-atí roti jooyupʉ. To bairi Pablo ca-ejayupʉ. Topʉ cʉ̃ ca-jãa ejaro Jerusalén macana judío maja Festo mena cá-atána cʉ̃ tʉna ejanʉcari, “Capee wame caroorije majuu cá-ácʉ ãmi Pablo,” cʉ̃ ca-ĩiñuparã. To bairo ca-ĩirã anibana quena, “Ati wamena ãa cʉ̃ ye bui, cariape mʉjaare jã ĩi,” cʉ̃ ca-ĩi majiquẽjuparã.