Popular Bible Verses from Dewteronomi 28

Share

Mar koslewydh devri lev an ARLOEDH dha Dhuw ha gwaytyas gul oll y worhemmynnow esov orth aga worhemmynna dhis hedhyw, ena an ARLOEDH dha Dhuw a'th sett ughel a-ugh oll kenedhlow an norvys.

Hag oll an bennathow ma a dheu warnas ha tremena dresos, mar koslewydh lev an ARLOEDH dha Dhuw.

An ARLOEDH a'th wra dhe vos an penn a-der an lost; y fydhydh unnsel a-wartha, ha ny vydhydh a-woeles, mar koslewydh gorhemmynnow an ARLOEDH dha Dhuw esov orth dha worhemmynna hedhyw, dh'aga gwitha ha dh'aga gul.

An ARLOEDH a iger y dresorva dha, an nevow, dhe ri glaw dhe'th tir yn y seson ha dhe venniga oll an ober a'th leuv; ty a brest dhe lies kenedhel mes ty, ny gevydh prestenn.

An ARLOEDH a wra dhe'th eskerens, a sev er dha bynn, bos gweskys a-ragos. Yth ons mes er dha bynn yn unn fordh ha fia yn seyth fordh a-ragos.

An ARLOEDH a worhemmynn an vennath warnas ha war dha skiberyow ha war bup-tra may hworrydh dha leuv warnodho; hag ev a'th vennik y'n tir a wra an ARLOEDH dha Dhuw y ri dhis.

Benniges vydhydh pan dheudh a-ji, ha benniges vydhydh pan edh yn-mes.

Benniges vydhydh y'n dre, ha benniges vydhydh y'n gwel.

Benniges vydh frut dha gorf, frut dha dir, ha frut dha jatel, leughi dha vughes, hag eyn dha flokk.

An ARLOEDH a wra dha fastya dhe vos pobel sans dhodho y honan kepar dell dos dhis, mar kwithydh gorhemmynnow an ARLOEDH dha Dhuw ha kerdhes yn y fordhow.

Benniges vydh dha ganstell ha'th new-toesa.

An ARLOEDH a'th wra dhe seweni yn frut dha gorf, yn frut dha jatel, yn frut dha dir war an tir a dos an ARLOEDH dhe'th tasow y ri dhis.

Ena oll kenedhlow an norvys a wel ty dhe vos gelwys gans hanow an ARLOEDH; hag i a berth own ahanas.

Na dreyl a-denewen dhiworth oll an geryow esov ow korhemmynna dhis hedhyw, dyghow na kledh, dhe gerdhes war-lergh duwow erell dh'aga servya.

Mes mar ny woslowydh orth lev an ARLOEDH dha Dhuw, ow kwitha hag ow kul oll y worhemmynnow ha'y ordenansow esov orth aga gorhemmynna dhis hedhyw, ena y tons warnas oll an mollothow ma, hag i a dremen dresos.