Popular Bible Verses from Isaías 60

Share

Bab-Jehová soged: “¡Jerusalén-dulemar, be gwichigu! ¡Bela ibegwale be gumar! ¡Be-neg-ibegwaledi bese warmaknonikid! Ani Bab-Jehová-gued. An-gangued-yeerdaklegedi begi ibegwar naid.

Dule-yar-baid-baidgi-bukmaladi, be-neg-meegwadba gudii gumaloed, degi, reymar be-neg-ibegwaledba nanadii gumaloed.

Be dake, neg-gubyagwaledi napneg-gasanaid. Degi, negsichidi, dulemargi naid. Degi-inigwele, an-ibegwaledi begi mee-gaoed. ¡Begine, an-gangued-yeerdaklegedi oyolegoed!

Dula-ichegwadi bur miliba (1,000) mergudoed, bur-neggwebur-bipigwadi, neggwebur-gandikidga guoed. Ani an Bab-Jehová gued. We-ibmarmar-guoed-e-ibagan warmaknonikile, gwae-gwae-guega an imakoed.”

Bar dad-ibeler bega neg-ibgi, neg-meegwadga guosulid, degi, nii bar bega mee gaosurbalid. Ar Bab-Jehová bega gwallu-meegwad-degisadeguadga guoed. Be-Bab-Dummad be-gangued-yeerdaklegedga guoed.

Dad-ibeler bar bega argwanosulid, degi, nii-gaedi gwen mommolegosurbalid. Ar ani Bab-Jehová be-gwallu-meegwadga degisadegu guoed. Geb agi be-wile-itodiidi bergunonikoed.

Weyob be dakoed, degi, weligwaledba be yeer itodoed, ise-weligwaledba be-gwage dik-dik naguoed. Degi, be-gwage ise-yeer itonaoed. Ar begala neggwebur-demar-gakagi-bukmalad-e-ibmar-nuegan senonimaloed. Degi, dulemar-yar-baid-baidgi-bukmalad-e-ibmar-nuegan bese warmaknonikoed.

”Nue be atake, be-dikarba be nue neg-dake: Bela danar-ambikusmalad, bese danimalad. Be-mimmigana dikasuli bese danimaloed. Be-bunamala argangi-annikaa nidanimaloed.

”Degisoggu, bela innikigwadga be-dulemar guoed, degi, bela be-dulemar napneg gaoed. Sapi-ainiedyob ainidamaloed. Ani an deyob imakoed. An-sunnagwad an imakoed, an-nug odummolegoed.

Bipisaale bar be-yargi sabsur-imaklegedi, be itogosulid. Bar be-yalagi neg-bibichedgi, degi, neg-obelogedgi sunmaklegosulid. Ar ade, weyob be-galu-matusurmaladgi soglegoed: ‘Abonolegedye.’ Degi, be-yawagakmardi weyob bimarbaloed: ‘Bab-Dummad-nuggi-namaklegedye.’

Be-yawagak argasigu guoed, mutikidbali, degi, ibginedbali gwen atiosulid. Bega dulemar-yar-baid-baidgi-bukmalad-e-ibmar-nuegan seledanikoed, e-reymar bese ilekwaa seledanikoed.

Be-walik moli-yargan-muremalad engudoed. Madián-dulemar-e-moli-yargan-muremalad, Efa-dulemar-moli-yargan-muremalad engudoed. Bela Sabá-neggweburginmaladi bese nonimaloed, bega ina-wawagana, degi, ormar senonimaloed. Degine, an-nug-odummogagwale danimaloed.

”Dule-ainebarmalad bega gannar galu-matusurmalad soboed, degi, e-reymar bega arbamaloed. An-urwedgi an sabsur-be-odurdaksa-inigwele, an-sabguedgi an ise-wile be-dakoed.

”Be walagwen-melledgus-inigwele, degi, be isdardakles-inigwele, dule gwen be-igarba nanassur-inigwele, degisadegu nug-dummarba-guega an be-imakoed, degi, dulemar weligwar be-imakega an imakoed.

Dule-yar-baid-baidgi-bukmalad-e-mas be gunnoed, reymar-e-ibmar-nuegan bega uklegoed. Degisoggu, na be wisguoed, ani an Bab-Jehová be-Abonogedid. Ani an Jacob-wagan-e-Bab-Dummad-gandikid be-bendakedid.