Popular Bible Verses from FESUAKNA 10

Share

RENGPA’N Mosia kuang, “Faroa kuang va lûtin lân, hi ki isinsiahai hi anni laia ngêt kin entir theihaina hrangin a siahlohai le ama lungrîl khom ki inngartir pehai tâk a ni, anni laia thil irkhêl ki ithohai le, Aigupta mihai chunga i angin mo an chunga sin ki itho iti hi a nâipa le a tupahai laia an inhriat theina hrangin le; RENGPA ki ni, ti nin hriat theina hrangin,” a tia.

RENGPA’N Mosia kuang khan, “Aigupta ram pumpuia inthimin, irmai raka oma inthimin a hong om theina hrangin ni bân phar ro,” a tia. Mosia’n irvân tiang a bân a phara; khanchu sûn thum sûng chu Aigupta ram pumpui chu inthim irsa khakin a om tâka. Sûn thum sûng chu mi tukhom an om hmun ata suak thei loiin, a’rhmu khom irhmu thei loiin an oma, khan khom Israel irchihaiin chu an omna khan a vâr pehai maia.

Khanchu Mosia’n Aigupta ram chunga khan a khianghrol an lektira, khanchu RENGPA’N sûn khat le zân khovârin nisua tianga phâivua an hrângtira; zîng khua a hong vârin chu sak phâivua’n khâi a hong chôihaia. Khanchu khâi tamtak Aigupta ram sûnga khan an oma; Aigupta ram an bit zoi ta, an tam lam chu irkhêl tak a ni. Matona khan hiang reng hin khâi lei tam ngai mahaia, anni zoia hin khom om khom om ta ngai no ni.