Popular Bible Verses from Dionibai 13

Share

Enoya ya eme yaisina ibai imukenewaa uawe. Aina mi dawae iwoka daiwerebaie i buna abu ari rabunu kakurekanu ubi iwoka sifi. Ie i ari eno, i kakurekae moi minu ibi. I bio yaisina sikisi aderedi sikisidi sikisi (666).

Enoba yewa dooro ibifeisa orou yaisina i buna abu ari rabubairo guriguri ufeisa. Nono i awoena Mamoe abuma moi orou, Godima i eraerabusa yaisina ubu uke me i furo, emenu ibi ibi i feareibi awoena Mamoe abunu me ibene ibene ibeka orounu bukaro owaowa yanake odiba ibake i orou mane dubuenaroe i buna abu ari rabubairo guriguri da ufeisa.

Enoba i dubuenaro fari ena buna abu ari rabuma nae buna daiwerea weiba ibake eme yaisina, ibi bobo orouini me daabaro eneibeka orouini emua yaisina emenu baena wanaroma emenu awararoma danu bio muneibisa. Enoba aina ainabairo i buna abu ari rabunu bionu ibi emenu awararo ibe me orou emuae oima make uruna mune ise dakeibisa.

Aina mi dawae ome bobobaie yewa wake naukenewaa ufi. Ie i ari eno, aina mima danu arara moi Godinu wake naukeka mi ana ebaro odifine imufekuie odifeku. Nono aina mima moi Godinu wake naukeka mi bauma umafiro feafine imufekuie umafiro feafi. Enoya i ari eno ukeka daiwere fafekuie Godinu orou ya yanu Godi imukaisa ibai iroma ane imukenewaa uaweke enare ara uawe.

Nama nono erebaie i buna abu ari rabu dawararoma udiro amuiro ere. Dawae i ari eno, danu yawera yaisinae deni (10) nono danu bokai yaisinae seweni (7). Danu yaweraroe i dai yawokeka kini orounu barukeibaisa mogoiso yaisina deni (10) barukeibi. I bokai kai yaisina duboroe moi ibi ibi ibe fare ani. I ibi ibinu ubiye Godibairo i ibi ibi yaisinama wake meramawere weeka ibi ibi.

Dawama Godinu orouini uraneibisake dawama Godinu orou ma berekeibirie. Ibake dawama buna moi munike i orofa akaka imusu imusu orouini wake imusu imusu weibisa orouini ofe ubu imusu imusu orouini emua yaisina dawama arawere yawokeibirie.

Enoba Godima danu ukeibi ibai ere mediro dawama i ukeka ubu imusu imusu daiwere i bokai buna daiwere abu ari rabunu ibooro ibai ukaada eme yaisina uke irukeibiriie. Enoba dawama i orofa akaka orou yaisinabairo eno wei, yama ana muaweke i bokai buna abu ari rabu i danu onami ari i anama koiaweke i anama ubu ukeka rabubairo guriguri ukaada danu ibi we ma daiwere uawe eno wei. I buna abu ari rabue dawa adinaro bauma yanakaro fearike nono wiroike ibinua eawe wei. Godima danu ukeibi ibai ere mediro i dubuenaro fari buna abu ari rabuma i anama koisake i buna abu ari rabunu imumu uke oisa iboo ebaro imu sianeka mairo me ibaada wake weike i dawabairo guriguri uke dakeibisa orou yaisina ma fearie.

I buna abu ari rabu erebaie refodi weaisa abu ari eno ere. Nono danu umue bea weaisa abunu umu ari eno ere. Nono danu bebekue raioni weaisa abunu bebeku ari eno ere. I dai uwaya ari rabuma danu bunaini danu yaure ibaada yawokeibi orofaini danu yawokeibi buna yaisina i buna abu ari rabubairo mai.

Godima i buna abu ari rabubairo we kuure dauiba ibake i buna abu ari rabuma wake meramawere weibike dawama oya buubaini manabe sikisi (6) i eraerabusa yaisina yawokeibi.

I buna abu ari rabunu moi bokai kai ure yanake uisaro fearikema nono i bou biobao me siniro wiroi. Ibake i dooro ibisa orou yaisina foria uisake i buna abu ari rabunu umuro anisa.

Nama nono kubekuberoma erebaie moi buna abu ari rabu doo ubarenaroma uyarike duboro amuiro ere. Danu yawera kaiyaie moi awoena mamoe abunu yawera kaiyai ari eno. Nono danu wake weibi ibaie moi awoena i dai uwaya ari rabuma weibi wake ari eno weibi. I dubuena buna abu ari rabuma i bokai buna abu ari rabunu buna yaisina munike danu bunawere ukekabai i bokai buna abu ari rabunu ibooro uke ma iwoka ui. Enoba dawama nae buna daiwereya weiba ibake i orofa akaka orou yaisina danu arararo mane uisake i bokai buna ukeka abu ari rabubairo guriguri ukeibisa.