Popular Bible Verses from Hipuru 11

Share

Nimaaroijaho irake? Raka ka'ene 'ajaha hijujara mai'o rehunijina. Nimairoa pinijaho raka ka'ene mai'o rehuniji nimaa ronare'e 'ajaha hijujina. Nimairoa pinijaho nú núni niakaho pakavu'u vo ijara rehuniji nimaa rojujina. 'Ena'omo nitama ea 'aho'a nimaa rojumakame Godi pu nimaa vetiana.

Ijihuni hahi nimairoa pa'a Godi veje teamahuna niho'o areri pa'ana. 'Ena'omo ea irara Godoni ro'amajaho Godi ijí hinuji nimaa ro'amana. 'Ene ea irara Hu sa'amajaho Hu eha maa vajihi'ina ro'amana.

Ijihuna'e nú nimairoa vajijino hena kavujaho Godoni irijara akúpa mwe'akaho vejuma renana. 'Ena'omo uneunecha ka'ene nú kivujaho ijihuni vaja parena roara vo Godoni irijara rejara'omo ijí navu.

Nimairoa vajijino Eparahamiho Godira 'umenajaho Huni ira hena venana. 'Enarena huni ara are'ika'ivo kwaa pina ka'ene Godira hu mahuna ka'ene nahama 'waramaji va'ana. Hu va'ajaho kwaa ichihicha va'u roji'i pakama paheji'i va'ana. Nimairoa vajijino Eparahamira va'e Godira nahama 'waramani kwai 'e'unajaho harai ari venarena apiora puna'i rena hinana. 'Ene túna'i Aisikiho 'ee Jekapiho ijá harai ari hi'eme aachia nikwinu'ina kaji ahuma 'ekahunijaho kú'o nahama 'waramana.

Nimairoa vajijino Noaho saa hira'eje kachihwaha ni'ajihuna'e sisima venana. Unenu pina ka'ene mwe'akaho mai'o pareji'ina ka'ene rehunaka Godira 'waramajaho Noaho hena venana. Huni nimaaroa vajijino mwe'a ke'ura namahi'i vu Godina'ijaho ariramaa rena paranana.

Nimairoa vajijino Inakiho pakwa'eme Godira apene akúpi 'ahi va'ajihuna'e ea hu papiunavara. 'Enavo hu mai'o akúpa 'aha pavai'ini hura Godi teamahuna ka'ene venajaho ea pu nikavura.

Nimairoa vajijino Eporura Godoni swasa ka'ene venahajara Keni oni swasa asimana. 'Ejumakame Godira Eporu oni swasiji ura renajihuni maijaho Godi najuharena Eporuho ariramaa 'úma avanana. 'Ene Eporuho nikwavuma paranana vo hu majama huni nimaaroijaho hina 'warumuna.

Nimairoa vajijino Seraho paranamaa renana kaivo hu areri hari'i nenana. Ijihuni maijaho Godira raka ka'ene nahama 'waramajaho Hu areri ija'ina rehunijaho Seraho nimaa ronana.

Eparahamira ija'ina venajihuni maijaho ara natohwa ka'ene Godira Huni iji mina vene kuteja same 'ee ara natohwa maa ka'ene vena ajimaji sama avanana.

Nimairoa vajijino Mosisira emaina renajaho hu Pero oni 'apajijihuni hariha 'wahuna semana. Ijihuni hahi hu Godoni ehijijihi pu'úmo ahuma ahija apehuna ura renana vo sisea ka'ene hu ma'uako teamama para'eje venareje kú'o pa'arehunijaho hu pataarohe pavenana. Maijaho hu Keriso onijihuna'e sisei hihuna vo Ijipiti opuni kukua rukima'ura mamaijaho pave'eju ronana. Ijihuni maijaho Godira huni eha mamaa ka'ene vajahuniji kavi'i va'arena avanana. 'Ene nimairoa vajijino Mosisi Ijipiti opuni kwaa aremana. Hu kinijihuni sena pajuhamana. 'Enavo Mosisiho Keriso pakamana vo nimairoa vajijino Hu kavi'i va'ana.

Nimairoa vajijino Eparahamiho vea ka'ene Godira vena kamajaho hu Aisikiho areri swasa venana. Eparahamiho Godira nahama 'waramajihi henarena huni hariha nikwinu Aisiki swasa ve'iro amairiaramana.

'Ene nimairoa vajijino Rehapiho maraku'a 'uasa venajaho ea ka'ene huni ara kwaa natohwa vajijino Godoni ira he'iro senavi'inijipo kwamasaha ja'ina hu pakwamana. Ijihuni maijaho hu Isureri opuni júhoji'ina ka'ene roajihi ni'ajiha jihuna'e pakwamana.

'Ene nimairoa vajijino Isureri ora soha iha ka'ene Avi'ina 'wavujaho mwemaa re'eme sua va'ara. 'Enakaivo Ijipiti ora 'u'o sua va'eme soha kajara imwasamiana.

Nimairoa vajijino Isureri opo Jeriko verijaho na'ia iropu no'o tauhu'eme vera kajaho tira'usahe arihana.

Nimaaroa vajijino Mosisira Ijipiti vaji Isureri ora 'waravume pu Pasova vejara. 'Enareja pu 'aa 'ene vwichajiami tanihara. 'Ejakame kwamasahuri 'ona oji'inijara amura nahenaji asita'amarono avajara.

'Ene nimairoa vajijino Josapiho vea ka'ene kwa'i venajaho Isureri oni harihipo nimaa roji'i 'waramajaho Godira veje Isureri ora Ijipiti raname usehuna. Hu nimaa rona parana jihuna'e hu pu 'waramajaho pu use'i ve'avajaho huni 'atijija 'eka pu pu'úmo usema vahuna.

'Ene nimairoa vajijino Jekapiho vea ka'ene hu ema rena parane kwa'i venajaho hu Josapi oni harihija merajihana. 'Ene hu huni pijuhijino pijunavi'i Godi oja mahana.

'Ene nimairoa vajijino Aisikiho huni harihija Jekapi'o Iso'o merajihana. 'Ene Godira iraka ka'ene túna'i vehunijaho nimaa ronana.