मत्ती 20
20
दाखा री बारी रे मजदूरा रा दृष्टान्त
1स्वर्गा रा राज्य कासु घरा रे मालका रे बराबर साहा, जोह दोती निकतअ की आपणी दाखा री बारी में मजदूरा आणे। 2तेऊ मजदूरा का एक दीनार धयाडी री मजदूरी रोज की डाही होर त्या आपणी दाखा री बारी में भेजी। 3तेहुकी दोती नअ बाजे, तेऊ निखल़ी करे होरा लोका बजारे बेकार खड़े हेरी, 4होर तेऊ बोलू, तमे भी दाखा री बारी में नाहाँ, होर जोह कुछ ठीक साहा तमाबे देलअ। तेबा त्या भी कामा करदे नाठे। 5तेहुकी तेऊ दुपहरा रे वक्ते दूजे होर चिउंणे पहरे भी तेऊ तेडा ही करू। 6लगभग ब्यालके पाज बाजे, तेऊ भी निखल़ी करे होरा खड़े हेरी, होर तेऊ बोलू, तमे किबे अखे पूरी धयाड बेकार खड़े रहीदे ? त्याहे तेऊबै बोलू, एतकी तणी की कोही भी हमें कामा में नांई लाई। 7तेऊ त्याहबे बोलू, तमे भी दाखा री बारी बै नाहाँ होर काम करा।
8ब्यालके दाखा री बारी रे मालके आपणे भण्डारी बे बोलू, मजदूरा शादी करे पिछले का पहिले तणी तयाबे मजदूरी देआ। 9जेबा त्या आउए जूणी घंटे भरे काम करू, तेबा त्याह पूरी धयाडी री मजदूरी एक दीनार भेटी। 10जूणा पहिले आउए दे, त्याहे यह समझू कि हामा जादा भेटणा, पर त्या भी एक-एक दीनार भेटअ। 11जेबा भेटा तेबा त्याहे घरा रे मालका बे कुडकुडाई करे बोलदे लागे, 12याह पिछले एकु घंटे ही काम करू, होर तांई त्या हामा बराबर करी जूणी पूरी धियाड़ भरे चुआकी होर धूपा सहू? 13तेऊ त्याह मेज़ा का एकु बे उतर दीना, हे मित्र, हाऊं ताहका किछे बुराई नांई करदअ। कैह तांई ही महा का एक दीनार नांई बोलू,? 14जोह तेरा साहा चुआक होर नाह; मेरी यह इच्छा साहा कि जेतरा ताहब देऊ तेतरा ही पिछले बे देऊ। 15जो मेरा साहा, केह हाऊ आपणी मर्जी संघे तेत्का इस्तेमाल नांई करी सकदअ? कैह मेरा भले हुणा थारी आची में खटका? 16एसी रीति का जोह पिछल साहा, त्या पहिले हूँणे; होर जोह पहिले साहा, त्याह पीछे हूँणे।
आपणी मउती रे बारे री चिउंणी भविष्यवाणी
(मरकुस 10.32-34; लूका 18.31-34)
17यीशु यरूशलेम शहरा बे नाहंदे बारह चेले एकान्ता में नीई, होर बाता तयाबे बोलदअ लागअ, 18हेरा, हामा यरूशलेमा बे नाहणा; होर मणशा रअ शोहरू प्रधान याजका होर शास्त्री रे हाथे ढाकणे बझयाल़ण होर सह घाता रे लायक ठराउंण। 19होर सह अन्यजाति रे हाथे दीणअ कि त्याह तेऊ ठठे में उडाए, होर कोड़े बाहे, होर क्रुसा में चड़ाए, होर सह चिउंणे धयाडे जिऊंदअ हुणअ।
एकु आमा री बिनती
(मरकुस 10.35-45)
20तेबा जब्दी रे शोहरू री आमा, आपणे शोहरू संघे यीशु सेटा नीई करे झुकी करे नमस्ते करु, होर तेऊका कुछ माँगदी लागी। 21तेऊ तेसाबे बोलू, तूह कैह चाहंदा? तेसे बोलू, यह आज्ञा देह कि मेरे दुई शोहरू तेरे राज्य में एक दांई होर दूजअ बांई फेरे बेशे। 22यीशु उतर दिंना, तमे नांई ज़ाणदे कि कैह माँगा। जासू कटोरे हाऊं झूटण आल़अ साहा, कैह तमे भी झूटी सका? त्याहे तेऊबै बोलू, झूटी सका। 23तेऊ तयाबे बोलू, तमा मेरअ कटोरे झूटण, पर मेरे दाएँ होर बाएँ कुण बशागणे, यह मेरा काम नांई, यह जागहा त्याहा लोका बे आसा, जासकी तणी मेरे बापू यह तयार करू दा आसा। 24जेबा दस चेले बे यह पता लागा, त्या दुई भाई रा रोष होऊ। 25यीशु त्या आपु सेटा शादी करे बोलू, तमे जाणा कि अन्यजाति रे राजा त्याह पैंदे आपणा हक जमाई डाहदा, होर जोह हाकिम साह त्याह पैंदे हक डाहंणा चाहंदा। 26पर तमामें एडा नांई हूँणा, पर जोह कोई तमा का बढ़अ हूँणा चाहदा, सह थारअ सेबक बणे; 27जोह तमामें सभी का बडअ हुणा चाहन्दा, सह थारअ दास बणे; 28जेड़े की मणशा रअ शोहरू आपणी सेवा करदअ नांई; पर सेवा करने री तणी बहु रै बदले त्याहरी मुक्ति रे मोला में आपणे प्राण रा बलिदान दीनदअ आऊओ।
दुई काणे बै दृष्टिदान
(मरकुस 10.46-52; लूका 18.35-43)
29तेबा त्या यरीहो का निखलते , तेबा तेऊ पीछे एक बड़ी भीड़ लागी। 30होर दुई काणे जोह सडका रै कनारे बेठे दे थी, यह शुंणी करे कि यीशु नाहंदअ लागदअ, पुकारी करे बोलदे लागे, हे प्रभु, दाऊदा रे शोहरूआ, हामा पैंदे दया कर। 31लोके त्या डांटी कि चुप रहे; पर त्या होर भी जोरे करे बोलदे लागे, हे प्रभु, दाऊदा रे शोहरूआ, हामा पैंदे दया कर। 32तेबा यीशु खड़े होई करे, त्या शादी होर बोलू, तमे कैह चाहंदा की हाऊं थारी तणी करू? 33त्याहे तेऊबै बोलू, हे प्रभु, कि महारी आछी का हेरू लोडी। 34यीशु दया करी करे त्यारी आछी छुहीं, होर त्या तेभरी हेरदा लागा; होर तेऊ पीछे हाँडदे लागे।
Избрани в момента:
मत्ती 20: ISJNT
Маркирай стих
Копиране
Сравни
Споделяне
Искате ли вашите акценти да бъдат запазени на всички ваши устройства? Регистрирайте се или влезте
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.