मत्ती 19
19
तलाका रे बारे यीशु री शिक्षा
(मरकुस 10.1-12)
1जेबा यीशु या गला करी छेकी, तेबा गलीला प्रदेशा का नाठअ; होर यरदना नइ रे पार यहूदी रे प्रदेशा में आउअ। 2तेबा बड़ी भीड़ तेऊ पीछे होई, होर तेऊ त्या तखे ठीक करी। 3तेबा फरीसी तेऊरी परीक्षा करने री तणी तेउ सेटा इच्छी करे बोलदे लागे, कैह हर एकु बजा का आपणी बेटड़ी छाडणी मूसा री व्यवस्था रे साबे ठीक साहा? 4तेऊ उतर दिंना, कैह तमे नांई पढू कि जूणी त्या बणाई, तेऊ पहिले का मणश होर बेटड़ी बणाई करे बोलू,
5एउ बजा का मणश आपणे आमा बापू का अलग होई करे आपणी बेटड़ी संघे रहंणे होर त्या दुही रअ एक शरीर हूँणा? 6पर त्याहे एबा दुई नांई, पर एक शरीर साहा एतकी तणी जोह परमेश्वरे ज़ोड़ी, तेऊ मणश जुदा नांई करे। 7त्याहे तेऊबै बोलू, तेऊकी मूसा बेटड़ी बे तलाक करदे वक्त त्यागपत्र दीणे रा आदेश किबे दीना? 8तेऊ तयाबे बोलू, मूसा थारे मना री हठा री बजा का आपणी-आपणी बेटड़ी छाड़णे री आज्ञा दिंनी, पर पहिले का एडा नांई थी। 9होर हाऊं तमाबे बोला, कि जोह कोई ब्यभिचार छाड़ी होर कासु बजा का आपणी बेटड़ी छाड़ी करे दूजी संघे बयाह करे, सह ब्यभिचार करा; होर जोह तेसा छाड़ी दी संघे बयाह करे, सह भी ब्यभिचार करदा। 10चेले तेऊबै बोलू, अगर मर्दा रा बेटड़ी संघे एढ़ा सम्बन्ध साहा, तेबा बयाह करना ठीक नांई आंधा। 11यीशु तयाबे बोलू, सबे याह बचन ग्रहण नांई करी सकते, सीधी जासूबे यह बरदान दिंना भेटा दा आसा। 12किबेकि कुछ नपुंसक एडे साहा, जोह जन्मा का ही एडे जन्मी; होर कुछ नपुंसक एडे साहा, जूणा मणशे नपुंसक बणाई; होर कुछ नपुंसक एडे साहा, जूणी स्वर्गा रे राज्य री तणी आपणे आपा बे नामर्द बणाई। जोह एउ ग्रहण करी सका, सह ग्रहण करे।
बालका बे आशीर्वाद
13तेबा लोके बालक तेऊ सेटा बे आणी कि सह त्याह पैंदे हाथ डाहे होर प्रार्थना करे, पर चेले त्याह डांटी। 14यीशु बोलू, बालका महा सेटा बे ईहंण देआ, होर तयाबे मना नांई करा, किबेकि स्वर्गा रा राज्य एडे रा ही साहा। 15होर सह त्याह पैंदे हाथ डाही करे तखा का नाठअ।
सेठ मणश होर सदा री जिन्दगी
(मरकुस 10.17-31; लूका 18.18-30)
16एक मणश यीशु सेटा बे आउअ होर तेऊबै बोलू, हे गुरु, हाऊं कुंण ज़ेहा भला काम करू कि अनन्त जीबन पाए? 17यीशु तेऊबै बोलू, तुह महा का भलाई रे बारे में किबे पूछा? उतम एक ही साहा, पर जीबना में अगर प्रबेश करना चाहंदा, तेबा आज्ञा मने कर। 18यीशु तेऊबै बोलू, कुंण जेही आज्ञा? यीशु बोलू, यह कि हत्या नांई करनी, ब्यभिचार नांई करे, चोरी नांई करे, झूठी गुआही नांई दे;
19आपणे बापू होर आपणी आमा रा आदर कर, होर आपणे पड़ोसी संघे आपु बराबर प्रेम डाह। 20तेऊ जुआने तेऊबै बोलू, याह सभे गल्ला मांई मनीदी आसा; एबा महा में कासु गला री कमी साहा? 21यीशु तेऊबै बोलू, अगर तुह सिद्ध हूँणा चाहंदा तेबा नाह, आपणा माल बेची करे कंगाला बै दे, होर ताहबे स्वर्गा में धन भेटणा; होर इच्छी करे महा पीछे इच्छ। 22पर तेऊ जुआने मणशे या गला शुणी होर नराझ होई करे नाठअ, किबेकि सह बहू सेठ थी।
23तेबा यीशु आपणे चेले बे बोलू, हाऊं तमाबे सच बोला कि सेठा मन्शा रा स्वर्गा रे राज्य में नहांणा मुशिकल साहा। 24तमाबे भी बोला कि परमेश्वरा रे राज्य में धनबाना रै प्रबेशा करने का ऊंटा रा सिउंणी रे छेदा मेंज़ा का निखल़ना मुशिकल साहा। 25यह शुंणी करे चेले बहू परेशान होई करे बोलू, तेबा कासका उद्धार होई सका? 26यीशु त्याह फेरा बे हेरी करे बोलू, मणशा का तअ यह नांई होई सकता, पर परमेश्वरा का सब कुछ होई सका। 27एता पैंदे पतरसे तेयूवे बोलू, हेर, हामे सबे कुछ-छाडी ताह पीछे आउदे तेबा हामा क़ेह भेटणा? 28यीशु तयाबे बोलू, हाऊं तमा बे सच बोला कि नऊई सृष्टि में मणशा रे शोहरू आपणी महिमा रे सिंहासन में बेशलअ, तेबा तमे भी जोह महा पीछे आउए दे साहा, बारह सिंहासना पैंदे बेशी करे इस्राएला रे बारह गोत्रा रा न्याय करना। 29होर जोह कोही घरे, या भाई, या बहीणी, या बापू, या आमा, या बाल बच्चे, या खेच मेरे ना का छाडी दे साहा, तेऊ शअ गुणा भेटणा, होर सह अनन्त जीबना रअ हकदार हूँणअं। 30पर बहू जोह पहिले साहा, पीछे हूँणे ; होर जोह पीछले साहा, त्या पहिले हूँणे।
Избрани в момента:
मत्ती 19: ISJNT
Маркирай стих
Копиране
Сравни
Споделяне
Искате ли вашите акценти да бъдат запазени на всички ваши устройства? Регистрирайте се или влезте
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.